Takada dege anya YAKUBU5
1Kuzukam, ku zi ni oku ntani nsu mbo nani, ku yi kuka nja kuruwa sobon beki siki de yaa zo a kiya ku.2Mbo nani ku e rubu, ngana sua suku keyi sa nki ku.3Aziripa nja zinari aku sua bebeta. Se sikwa asu yaa ma sheeda a kiya aku nkye kuma nsu nonwa nja yaa suku nama nki aku kankye wuta. Oku de ku tala mbo nani aku nana karishe.4Kone! ku ki ba worede su yi ku ANKI a bikiya aku gyolo asu, nsu yi ANKI mu su ma yi kuka. Kuka ni nsu yi ANKI mu e keyi anya ni Obagizi nsu girima.5Ku yi zunwa zi dadi a siki durinya nja zunwa yiride kwa bila. Ku yi nki kankye timshiya de yaa pekye nana yanka.6Ku bebeta ntani mere lepi nja ntani gangasi ku kisa su, ku nkye su ma nsu lepi su kuma yi geba nja ku ba.7Sobon yomu, yayuwa, ku kadishiya ari nana de Obagizi yaa zo. Kone yiri kadishiya de nsu bikiya su mayi sua pekye ari kwanki de mbo bikiya yaa yi kyakyawu yaa kwa pekye de riki ni nunkwa nja riki karishe.8Oku ma du, ku yi kadishiya nja ku sakisi nsori, sobon zo ni Obagizi yi kusa.9Yayuwa, kede ku yi mumungu beta nja nkiya ku, sobon kede Mirikisi e yi ku shiriya. nsu shiriya e yi kusa de e zo!10Yayuwa, ku kokoyi kadishiya nja takuwa anya nsu anebi de su Genbeki anya pala beta a siki seni Obagizi, ku biya seni tepiya asu de su sakisi nsori a siki Genbeki.11Yiride ku shina, mu la worede su sakisi nsori su ma nsu anabirika la. Ku zi yiride Ayuba sakisi nsori nja ku geni mbode Obagizi zo yii nshi a karishe. Obagizi de sika ni toseyi nja aniyeri.12Yayuwa na, totolo mbode mma bila de ku shina e shiya ma, kede ku melese ni bisi ko ni kisi ko ni mbodaa jaja. Bila de <<Ee>> aku e ma <<ee>> nja <<Yi,>> aku e ma yi, sobon kede Mirikisi e yi ku shiriya.13Ko nse daa ma a siki aku de ma Genbeki? se e yi lepa de Mirikisi e sua yi nto. Ko nse daa ma a siki ku de mayi peri siki? Se e yi wonka ni yobo Mirikisi.14Nde nse daa a siki aku ma yi suwo? e sukwa toree ni nsubiya Yesu de su zo yii lepa, su nya yi mayi a kiya a siki seni ni Obagizi.15Sobon lepa de su yi a siki beigaskye yaa sa nsu suwo yaa worikye; Obagizi yaa dege yi a bisi. Nde e yi lepi, Mirikisi yaa yape yi lepi e yi.16Nkayomu ku gye nkiya ku lepi aku se ku yi nkiya ku lepa sobon de Mirikisi e worikye ku. Lepa ni nse gangasi e ma ni sori nja yaa yi anki.17Iliya ma nsebeki na kankye omu. E yi lepa soseyi de kede Mirikisi e zon riki ni bisi, Mirikisi kwa yi riki ba ni shekera wuku ni rebi.18De Iliya kwa sakye yi lepa, se bisi sonka riki, kisi kuma butu ni mbosi.19Yayuwa na, nde nseda ku bila turiki gaskye se nse daa keyi zo a turiki,20Nseni e shina nkye: Du nsude juyi nsu lepi bila mungu mbode e mayi e sila nshi dege muntu kuma e ripe lepi nyowa .
The Word for the World International