Takada dege anya YAKUBU3
1Yayuwa na, kede nyowa ku su ma nsu Male ba, sobon ku shina nkye omu de ma male ni beta Mirikisi sua yi mu shiriya de pi ni ririgye ntani.2Guru amu mua yi kusukuri a turiki nyowa. Nde nsude yi lepi a siki mbo de yaa pala ba, e sika nsebeki naka, yaa kpanku nki e yi guru.3Nde mu sa nizami a baki ni doki de e yi mbode mua bila de e yi, mua yi yaa juyi nki doki mu.4Ko mu la kwanto totolo de ema misali. Kode nkye kwanto e ma totolo akusuka nsu sori yaa yiri yi, sede ni gwala piri na nsu tunkwa kwanto yaa juyi ta a turiki de sua so.5Yomuna arishiya ma ganga dende a siki nki, sede yaa pala mbo totolo de pi sori e yi. Kone yiri de totolo sanwa yaa suwuta guru ni arishiya wuta dende.6Arishiya nsebeki ema kankye wuta la, yaa shiriya mungu mbo a siki ganga ni nki guru. Arishiya yaa bebeta zunwa ni nsebeki, e kwa alaka ni leyi ni nsebeki ni wuta, ema wuta de butu yiri gizi wuta la.7Guru yiri nama bikiya, nsusuwa, alankpa nja nama de su ma a siki riki nsebeki na yaa sa su de su yi mbode yaa so.8Sede ba nsude yaa shakiya ni arishiya e yi ba. Yaa taba pushe ni yi mungu mbo ba, e ma ni kapi de yaa kisa nsebeki.9Ni arishiya na mua yobo Obagizi nja Adaa amu, nja shi na mua pala bebeki beta gyen ntani, sobon Mirikisi yi mu a siki kamani e yi la.10Butu a siki baki amu na mua yobo Mirikisi nja basi ntani. Yayuwa na, nsubiya Yesu mbo mu e yi kyawu yomu ba.11Riki kyakyawu nja riki de mani giri sua butu a ndani riki daa ba?12Yayuwa na, ntasi bori yaa yapu yaya ni zetu, ko akayam yaa yapu bori? yomuna ndani riki kyakyawu yaa taba butu riki mumungu ba.13Waa man simi nja shina a siki aku? Bila de e nana simi e yi a siki kyakyawu ali e yi, te anya ANKI bwala kiya de yaa yi na e butu a siki ni simi.14Sede nde kwa yi zunwa mumungu nja kwa yi kishi nja nkiku nja kwa yi sokiya a siki dishiya aku, kede ku dukwa geba a kiya yi ko ku ki gaskye.15Yiri <<Simi mu>> e butu a bisi anya Mirikisi na zo ba sede e ma ni durinya la, e ma ni seki ba, e ma ni obiri la.16Sobon anya de kishi nja sokiya ma a siki e yi, kwa samu dege dishiya nja kowoni yiri mungu mbo.17Sede simi de butu anya Mirikisi ni pari e shina e man seki; zunwa selema nja so ntani, nja nsu so kula ni ntani, nja buala kiya, nsu toseyi nyowa, e ma nana bombom ba ko zunwa munabuki18nsu zunwa selema nja ntani sua sa ntani su yi zunwa gangasi nja Mirikisi.
The Word for the World International