APISAWA5

1Tunde ku ma yaya de Mirikisi yaa so, se ku kokoyi dege anya yi a siki zunwa ku.2Ku yi zunwa ni so nja nkiaku yiride kiristi so mu, e beyi kiya yi ba mu kankye sedeka kyakyawu nsu kemeshi nja sedeka anya Mirikisi.
3Sede a siki aku kede su samu nseda de ema nsu kwana nja mase ko minzi nseda ba, ko nungwe berikete ba ko nsu opu ni mbo, sobon yiri mbo woromu yi kyawu ni yaya Mirikisi ba.4Kede ku yi anpani ni bebeki beta, ko kelima beta ni Odundu ko wasa banza, sobon e yi kyawu ni ntani Mirikisi ba, sede mu gbede Mirikisi.5Ku shina nkye, ba nsu yi lepi nungwe, ko nsu mungu dishiya ko opu nse, de e shi nja nsu bowuta boka su ma daa na, su mani gado a siki solota kiristi nja Mirikisi ba.6Kede nseda e shirigye ku ni kelima wopi, sobon yiri lepi woromu na anwashi Mirikisi ma sonka a kiya worede su ki biya beta yi.7Nkayomu kede ku gama kiya nja su.8Sobon oku ma a kwanki de bise kuma ntani dopuwa la, sede kuzukam kuma asikye na a siki Obagizi. Ku yi zunwa ni yaya asikye9sobon asikye yaa yapu ali kyakyawu, nja zunwa ni gangasi anya ni Mirikisi, nja pala gaskye10nja yi mbode yaa jima Obagizi.11Kede ku mani mbo daa ni yi nja ali dopuwa de mani anpani ba, sede ku pelesa su a pili.12Ema mbo kumnya la de nsubiya Yesu su pala mbode ntani mumungu su ma yi a boyi.13Sede kowoni mbode ma a siki asikye yaa pelesa a pili,14sobon asikye la yaa pelesa kowoni mbo. Daa mu nama mbode sa beta Mirikisi pala nkye:<<Pelenka, eke de ka yi kwana,dege a kwana, eke de ki muntu,kiristi yaa ba ke asikye.>>
15Sobon yomu ku kula, ni yiride ku mayi zunwa, kede kuma kankye worede ma nsimi ba, sede nsu simi16ku yi anpani ni kowoni dama de ku yi mbo kyakyawu, sobon kwanki de mu ma a siki yi mu e sika ni mungu mbo.17Nkayomu kede ku ma Odundu ba, sede ku shina mbode Obagizi yaa bila de ku yi.18Kede ku sha giya bugu, de yaa sa ku bebeta. momoko yomu, se mu bila Aworo Mirikisi de biya mu a turiki kyakyawu.19Ku yi beta nja nkyaku ni kelima wonka zabura, ni wonka yobo nja wonka aworo. Yi wonka yobo dege dishiya ku te nja Obagizi.20Kowoni nana ku gbede Mirikisi Adaa mu sobon guru mbo, a siki seni Obagizi Yesu Kiristi.
21Ku ba nkyaku girima a siki ni womba Kiristi.
22Oku mata amere, ku ba menza aku girima yiri de kwa ba Obagizi.23Sobon yaa minzi mani yiko a kiya mata yi yiride Kiristi mani yiko a kiya nsubiya yi woto, nki yi, de e shi ma nsu sila su.24Kuzukam yiride nsubiya Yesu beyi kiya su te nja Kiristi, yomuna mata ku beyi kiya ku kpataka ba menza ku a kowoni turiki.
25Oku menza amere, ku so mata aku, yiride Kiristi so nsubiya yi de e beyi kiya yi de e muntu sobon e shi.26Yesu yi yomuna de sayi e man nsuseki, de shire yi te anya wonkye yi ni riki ni kelima beta Mirikisi,27Yesu yi yomuna de e la mu nsubiya yi ba kiya yi de muma nsu dereja soseyi ba dola ko pita ko worosu su suwo, sede nsuseki nja mere lepi.28A turiki yomuna, menza amere ema dole la de ku so mata aku yiride kwa so nkyaku. Du nsude so mata yi e so kiya yi aka.29A beyi yomu, ba nseda de taba ki nki yi ba, sede yaa beyi mbosi yaa kula nshi, yiride Kiristi yi nsubiya yi30Sobon omu mu ma ganga nki Kiristi na.31Kankye yiride ema rubuta a siki beta Mirikisi nkye, <<Sobon yomu nseminji yaa bila adaa yi nja amaa yi de e mala mata yi, osu bi su ma nki daa.>>32Mbomu eman wuya shina. Sede eni mmayi beta a kiya Kiristi nja nsubiya yi na.33Nzun yomu, kowoni nseda aku ema dole na de e so mata yi yiride yaa so kiya yi, nja ema dole na mase e ba minzi yi girima.

The Word for the World International

https://app.library.bible/content/14c608286b5b94d2