TAKADA NI BI NI Biturusu3
1Oku nsu oboki na, kuzukam nsumu na ma takada ni bi de mma rubuta ku nshi. Ni rubuta ku nshi guru de ni ja ku sori guyam de ku yi tunani kyakyawu.2Eni ma bila de ku turunwa ni kelima beta de anebi nsuseki nja doka de su ba ku te anya Obagizi mu nsu sila mu te anya yayamanki yi.3Mbo ni pari de ku shina e shiya ma a nana karishe nsu siya sua zo, sua ku siya sobon de kwa biya Mirikisi, sua biya turiki ni memeri mungu su.4Sua minya nkye, <<Zo yi de e yi anikowori managa? Tunde nsu adatolomu muntu, kowoni mbo sigeba yiri de e ma dege pari de su yi durinya.>>5Nsu pala yomu su ma yi dende geri na nkye te anya kelima Mirikisi na a kwanki de bise, Mirikisi yi bisi nja kisi. Mirikisi yi kesa dege siki riki nja riki de gyowe yi.6Te totolo riki mu la Mirikisi juru nja bebeta durinya guru.7Yomuna te kelima beta mu Mirikisi yi bisi nja kisi su tele ni beta Mirikisi sobon de su suwuta yi ni wuta, ntani worede shina Mirikisi ba su tele su pekye nana shiriya nja juru.8Yayuwa na de mma so: kede ku mosi mbo ndandaa mu, nana daa anya Obagizi ema kankye shekera dubu daa la, shekera dubu daa ema kankye nana daa la.9Obagizi yaa ki seberi ni sika anikowori ba, yiride worosu su ma kone lesa seberi Mirikisi, sede yaa kadishiya pekye ku, sobon yaa bila de kede nseda e bebeta ba, sede yaa so de guru ntani su juyi bila lepi asu.10Sede nana ni Obagizi yaa zo kankye bolowa la. De bisi yaa beta ni totolo kuruwa; Guru mbode ma a bisi yaa bebeta ni wuta nja guru mbode ma a siki durinya sua beta.11Tunde Mirikisi yaa juru guru mbo woromu yomu, woni yiri ntani na e kamata de ku ma? Se mu yi zunwa seki nja zunwa ali de jima Mirikisi.12Yiride mua sa ndani pekye nana zo ni Mirikisi nja de mua yi kokori de mu sa nana mu de e zo seberi, nana de Mirikisi yaa juru bisi ni wuta, nja guru mbode su ma a siki bisi nja kisi sua nyeleka ni dimi wuta.13Sede a siki anikowori Mirikisi: mua sa ndani pekye sabuwa bisi nja kisi, gizi anya de ntani gangasi sua zunwa.14sobon yomu, yayuwa na de mma so, tunde kuma nya ndani pekye nana mu, ku yi kokori de ku yi zunwa mere lepi nja ba dola a geba Mirikisi, nja ku yi zunwa selema a geba yi.15Ku turunwa nkye ka dishiya ni Obagizi ema nana nkye yaa bila de ntani su sila, yiride yayiwa mu Bulusu rubuta ku nshi, ni simi de Mirikisi beyi.16Kowoni nana ema yi beta a kiya yiri mbo woromu na a siki guru takada yi. A siki takada yi e rubuta worosu mbo de su man wuya shina, de worosu ntani mere shina nja worede man sori a siki beigaskye ba, su ma shenja maana yi, yiride su yi ni worosu anya a siki beta Mirikisi. Nka su ma keyi kiya su alaka na.17Sobon yomu, yayuwa na de ma so, tunde ku rigye shina mbomu yomu, se ku kpanku dishiya ku de kede ku biya turiki ntani mere biya doka Mirikisi nja de kede ku juyi bila beigaskye ku18Sede ku sigeba ni yi girima a siki aniyeri nja shina ni Obagizi amu nja nsu Sila mu Yesu Kiristi. Te anya yi dereja dege kuzukam ari gbogbo! Ema yomu.
The Word for the World International