2Korentiyawa8
1Kuzukam, yayuwa na, mua bila de ku shina a kiya ni aniyeri de Mirikisi yi nsu biya Yesu de su ma a Makidoniya.2A siki totolo gwada nja takaasi, ni perisiki ku si geba ni beyi sedeka aku ni gyolo te ba ntani worede su ko de nkye kuma a siki lesa, sede ku beyi ni dishiya ku da ba ntani.3Ni sheeda mbo de su yi, su beyi kyakya sori asu. Su kwa beyi pi mbo de su manshi, ba nse da sa su dole ba.4Su ologba mu de su samu dama de su sua worede de su ma biya Mirikisi nto.5Su beyi pi mbo de mu sa dishiya de sua yi, sede npari su beyi kiya asu ba Obagizi nja omu du su beyi kiya asu te anya nupi Mirikisi.6Sobon yomu mu ologba Taru de e si geba ni tala sedeka tunde e shina e tala npari, yaa sua ku nto de ku karikye anki ku ni aniyeri.7Sede a yiri de kwa si geba a kowoni mbo, a siki beigaskye, a siki beta aku, a siki shina, ko a siki shina gaskye, ko a siki memeri de ku yi mbode e yi kyawu, nja so de ku manshi anya mu, sobon yomu ku si geba ni anki ku ni aniyeri nja beyi sedeka.8Ba mma sa ku dole na ba, sede na bila de ngonta kyakyawu dishiya ni so aku de ku manshi ba worede su.9Sobon ku shina aniyeri ni Obagizi mu Yesu Kiristi, ko de nkye e ma nsu mbo nani, sede sobon oku Yesu kuma ma potoruwa, de te anya potoruwa e yi mu samu mbo guru anya Mirikisi.10Showura na de na ba ku kyakyawu a kiya beta mu: Shekera de bise oku na ku ma ni pari ba anya beyi, sede nzun memeri de ku yi yomu.11Kuzukam ku karikye anki, ni yiri dishiya de ku para nshi, ku yi anki mu kyakya sori aku de ku man shi.12Sobon nde ku man memeri beyi kyawuta, kyawuta ku ma mbo keleba anya Mirikisi te yiri mbo de nse beki manshi, Mirikisi mma so de ku beyi pi mbo de sori aku yaa yiya yi ba.13Ba nkye mmaso de nja ku keyi nsu loni; de worede su kuma mba nsu mbo de man loni ba, sede guru aku kuma ni lobo kyakya.14A kwanki mu de ku mani mbo a nani nyowa se ku sua su nto a siki mbo de sua bila, kwanki de ku manshi ba osu ma sua sua ku nto a siki mbo de kwa bila. Yomuna konwawa yaa man lobo yi kyakya,15Yiri de ema a rubuta a siki beta Mirikisi: <<Ba nsu de tala nyowa e shina yaman nyowa ba, nsu de tala piri e manshi piri ba.>>16Ni gbede Mirikisi, de e sa a dishiya ni Taru yiri tunani de ni manshi a dishiya na a kiya ku.17Sobon Taru ema zo anya ku kokowe na ba, sede e ma zo anya ku sobon mbo de e rigye sa a dishiya yi de yi naka.18Mua saka ku yayiwa mu nja Taru de guru nsu biya Yesu sua yobo yi a kiya anki de yaa yi sobon nabari kyakyawu mu.19Abeyi yomu, e shiya nsu biya Yesu zabi de ema oboki tepiya amu a kiya anki ni aniyeri de mu ma yi mu beyi sobon de Obagizi e samu girima, nja de mu nana nkye muma ni dishiya ni sua nto.20Mua bila de muma mbo basi a kiya ni kyawuta de su ba mu ni dishiya daa mu ba.21Sobon kokori mu e shiya de mu yi mbode ma kyakya, ba a geba Obagizi kin naba sede a ndani ntani du.22Mua saka yayiwa mu nja su nsum de e nana mu a kowoni kwanki nkye e meyi memeri sua ntani nto soseyi, nja yiri de yaa yi kuzukam pi yiri de yaa yi sobon ni totolo yeda de e manshi a kiya ku.23Ku turunwa nkye Taru, ema oboki anki na la eni nja shi mu mayi anki mu sobon ku la; yayuwa worede su ma nja shi, nsubiya Yesu la su saka su anki asu ema ba Kiristi girima.24Nkayomu ku nana ntani yiri so de ku manshi a kiya asu nja delili dukwa geba amu a kiya ku, sobon de nsubiya Yesu su geni nkye e man gaskye la.
The Word for the World International