2Korentiyawa2
1Sobon yomu na ni nkye na sakye zo anya ku gagaba de kede ni sa ku beki siki ba.2Nde ni sa ku beki siki, waa sa ni peri siki sede oku de ni sa ku bekisiki?3Ni rubuta yiri de ni saba nkye kwanki de ma zo kede ema ni beki siki anya worede sua sa ni perisiki. Ni ma sadishiya anya ku guru, kwa yi peri siki nja ni guru aku.4Sobon ni rubuta ku takada mu a siki basi dishiya nja beki siki nja anwe nyowa, de ni sa ku beki siki na ba sede de ku shina yowa ni so de ni manshi a kiya ku.5Nde nseda sa ku beki siki, Eni na e sa ni ba sede e sa guru aku na du, Ni yi yomu de mba ku wuya na ba.6Yiri poro de ntani nyowa sua beyi nkye e deta yomu.7Kuzukam, se ku yape yi nja ku beyi sori dishiya, sobon kede yowa beki siki mu e sa yi kuman beyi.8Na gila ku, nkayomu, se ku nana yi so aku.9Delili de ni rubuta takada mu, e shiya ma de ni geni nde kwa sakisi a siki gwada nja kwa bayi girima a siki guru mbo.10Guru nsude ku yape yi, eni ma ni yape nse ni du. Du mbode ni rigye yape nde mbodaa ma de na yape ni yape a siki ni Kiristi sobon aku,11De kede obiri e sha kiya amu. Sobon de kede mu lesa shina mumungu shiri ni obiri ba.12De ni zo a Taruwasa de ni beyi manki Kiristi kyakyawu nja Obagizi rigye bure ni turiki,13Ni tuku man selema a dishiya wo ba, sobon ni geni yayiwa na Taru anya ni ba. se ni yi su selema de ni ta Makidoniya.14Sede mma gbede Mirikisi, nsude yaa biya mu yaa sa mu sigeba a siki Kiristi nja a siki amu na guru anya sua zi kemeshi ni shina Yesu.15Sobon omu na muma kankye mbo kemeshi ni Kiristi anya Mirikisi a siki worede su sila nja worede su bebeta sobon su yi nyisa ni Mirikisi.16Anya worosu su de sua bila muntu mua yi kemeshi ni muntu; te anya worede Mirikisi sila su muma kankye kemeshi ni leyi la. Waa yaa la loni ni ANKI mu?17Sobon mu ma kankye ririgye ntani ba, de su la beta ni Mirikisi ma mbo ni riba la. yiri de e gye mu, a siki Kiristi na mua yi beta a geba Mirikisi ni dishiya daa, kankye ntani de Mirikisi saka su.
The Word for the World International