1 Yaaya5

1Du nsude beigaskye nkye Yesu e ma Kiristi e ma yaa ni Mirikisi la: nja du nsude yaa so Adaa yaa so yaa du.2Yomu na mu shina nkye mua so yaya ni Mirikisi: te anya so Mirikisi nja biya doka yi.3Osu na e ma so ni Mirikisi: mu biya doka yi nja doka yi e man loni ba,4Sobon kowon yaa Mirikisi e man sori de yaa shakiya ni durinya. Beigaskye mu a siki Kiristi e shiya samu shakiya ni durinya.5Waa ma nsude yaa shakiya durinya mu? sede nsude beigaskye nkye Yesu nama Yaa ni Mirikisi.
6Su pelesa Yesu nkye e ma Yaa Mirikisi te anya tunkwasa yi a siki riki nja zini yi de nya a kiya gidiri. Ba ni riki ndandaa yi naba, sede a siki riki nja zini. Aworo de mani gaskye, e beyi sheeda a kiya e yi.7Mu mani mbo wuku de beyi sheeda:8Aworo Mirikisi, ni riki tunkwasa nja zini de nya a kiya gidiri sobon omu; osu wuku mu la su sheeda nkye Yesu e ma Yaa Mirikisi la.9Mu yeda ni sheeda ni nsebeki, sede sheeda ni Mirikisi e pi sobon sheeda ni Mirikisi, de e beyi a kiya Yaa yi.10Du nsude Yeda nja Yaa ni Mirikisi yaa mani sheeda mu a dishiya e yi. Du nsude ki yeda nja Mirikisi e la yi ma nsu yaruwa, sobon e ki yeda ni sheeda de Mirikisi beyi a kiya Yaa yi.11Osu na e ma sheeda nkye: Mirikisi ba mu leyi ni gbogbo, leyi mu e ma a siki Yaa e yi na.12Du nsude man Yaa e man leyi; du nsu de man Yaa ni Mirikisi ba e man leyi ba.
13Ni rubuta ku mbo worosu mu oku de ku yeda ni seni Yaa ni Mirikisi de ku shina nkye ku ma ni leyi ni dindindin.14Osu na ma sori dishiya de mu ma nshi a geba Mirikisi: nkye nde mu minya kowoni mbo a siki nupi yi, yaa zi mu.15Tunde mu shina nkye mu te ologba e yi yaa zi mu, mu shina nkye yaa ba mu du mbode mu ologba yi.
16Nde nseda geni yayiwa e yi ni minzi ko ni mase yi lepi de e keyi ni muntu ba, se e yi lepa de Mirikisi e ba nsu lepi mu leyi. Mma yi beta mu a kiya worede lepi asu keyi ni muntu ba. Mu man lepi de e ma ni muntu. Ba lepi muntu na Ni nkye ku yi lepa a kiya e yi ba.17Guru mbo mumungu e ma lepi la, ba guru lepi na yaa keyi nse ta muntu ba.
18Mu shina nkye du nsude e ma yapu ni Mirikisi yaa sigeba ni yi lepi ba; sobon Yaa Mirikisi yaa tengele su, obiri yaa kpa su ba.19Mu shina nkye mu ma yaya Mirikisi la, nja guru durinya ma a nani obiri.20Mu shina nkye Yaa ni Mirikisi zo de e ba mu shina, de mu shina nkye e shiya ma gaskye. Omu muma a siki yi e shi de e ma gaskye, ko Yaa yi Yesu Kiristi. E shiya ma Mirikisi ni gaskye nja leyi ni gbogbo.
21Oku yaya na de mma so ku, ku yi nyisa dege boka.

The Word for the World International

https://app.library.bible/content/14c608286b5b94d2