1 KORINTIYAWA3
1Yayuwa, Ni yi ku beta kankye worede mani Aworo Mirikisi ba sede kankye ntani durinya, kankye yaya dende a siki Kiristi.2Ni ba ku madara la ba mbosi nsu sori ba, ari kuzukam ku deta ni si to nsu sori ba.3Sobon ku tuku zunwa ntani durinya. Tunde tuku yi sikiwuta nja nkiya ku nja yi rikishi nja nkiya ku, nsu nana kuma ni durinya naka bo? ku ma kankye ntani durinya naka bo?4Sobon worosu su nkye, <<Mua biya Bulusu,>> nja worosu su nkye<<Sua biya Apolos,>> Da mu e ma ali ni arinya nsebeki naka bo?5Bulusu minya ntani nkye, waana ma Apolos? Nja waana ma E shi Bulusu? Guru asu su ma bunwa la, anya worede de su yeda nja su, kowoni nseda asu Obagizi bayi ANKI de yaa yi.6Bulusu nunkwa saba, Apolos nya riki, sede Mirikisi na sayi tompa de yi girima.7Sobon yomu nsude nunkwa nja nsude nya riki su ma yi mbodaa daa, sede Mirikisi de sa saba tompa de yi girima.8Nsude nunkwa nja nsude nya riki guru asu su ma daa la, sede konse yaa keleba nani wuta ANKI de e yi.9Ku shina nkye Bulusu nja Apolos guru asu su ma yaya manki Mirikisi la; oku kuma kankye bikiya Mirikisi nja Kuma kankye laki Mirikisi.10Sobon ni aniyeri de Mirikisi ba ni, Ni kapa kutiri gizi kankye nsude e ya gini, se nseda mbo mu yaa gina a kiya yi. Sede konse e mani ankeli ni yiride yaa yi gini a kiya yi.11Ba nsude yaa kapa kutiri laki de pi daa de su rigye kapa mu, e shiya ma Yesu Kiristi.12To, du nsude yi gini a kiya kutiri gini da mu ko e yi anpani ni aziripa ko zinari ko dunsi kyakyawu, ko ntasi, ko kakala, ko sanwa13ankiyi yaa nana waa ma e shi, sobon nana yaa zo de ankiyi pelesa a siki asikye, yaa pelesa ni wuta, wuta yaa gwada ANKI ni konse de e shina waa ma e shi.14Nde ANKI de e yi suwuta ba, yaa samu nani wuta e yi.15Nde ankiyi su suwuta ka yi totolo lesa; kode nkye e shi nkiya yi yaa sila, sede yaama kankye nsude su sila nshi a siki arishiya wuta.16Ko ku shina nkye kuma kankye laki lepa Mirikisi la nja Aworo Mirikisi yaa zunwa a siki aku ba?17Nde nsu de juru laki lepa Mirikisi, Mirikisi yaa juru yi, sobon laki lepa Mirikisi e ma nsuseki, ku shina oku na kuma kankye laki lepa Mirikisi.18Kede ku shishirigye nkiya ku. Nde nseda aku geni kankye e ma nsu wayo yiride durinya manshi, e la kiya e yi e ma <<Odundu>> sobon de e ma nsu simi anya Mirikisi.19Sobon simi ni durinya mu e ma Odundu na anya Mirikisi. Yiride e ma rubuta: <<Mirikisi yaa ka nsu wayo yaruwa su>>;20e kwa ma rubuta a siki takada Mirikisi nkye, <<Obagizi shina tunani siki dishiya nsu wayo e ma wopi la.21Sobon yomu kede nseda e dukwa geba ni nsebeki ba! guru mbo ma na ku la,22ko Bulusu ko Apolos ko Kepasi ko durinya ko leyi ko muntu ko kuzukam nja ko ta geba, guru mbo ma na ku la,23oku kuma ni Kiristi, Kiristi e ma ni Mirikisi.
The Word for the World International