1 KORINTIYAWA1
1Takada butu anya Bulusu yaamanki Yesu ni yeda Mirikisi, nja yayiwa amu Sastanisu,2E ni Bulusu ni ma saka manki te anya nsubiya Mirikisi de su ma korenti, worede Mirikisi zabi a siki Yesu Kiristi de su ma nsuseki, yere nja guru worede su ma sukwa seni Obagizi Yesu Kiristi a kowoni anga, Obagizi su nja namu:3Aniyeri nja selema ni Mirikisi Adaa mu nja Obagizi Yesu Kiristi e ma nja ku.4Na gbede Mirikisi kowon nana sobon aniyeri de e ba ku te anya Yesu Kiristi.5Sobon a siki Yesu kuma nsu mbo nani a kowoni turiki, anya yi beta nja guru shina,6sobon sheeda amu a kiya Kiristi a siki aku e ma gaskye la.7Nkayomu ku lesa samu kyawuta ni Aworo Mirikisi ba, nja sa ndani pekye nana de Obagizi Yesu Kiristi yaa kuma.8De yaa ba ku sori ari karishe, sobon kwa ma mbo basi a nana de Obagizi amu Yesu Kiristi yaa zo ba.9Mirikisi, de sukwa ku a siki tala kiya nja Yaa yi Yesu Kiristi Obagizi amu, nsu gaskye.10Mma ologba ku, yayuwa na, a siki seni Obagizi amu Yesu Kiristi, de guru aku, ku yeda nja nkyiaku sobon kede ku laba kiya e ma a siki aku ba nja de kwa man tala kiya a siki dishiya aku nja tunani aku.11Oku yayuwa na nsubiya Yesu, ntani gizi Kuluwi gyeni nkye rikishi ma sisika aku.12Mbode na yi nupi e shiya ma: Worosu su a siki aku nkye, <<Sua biya Bulusu>>; Worosu su sua nkye <<Sua biya Apolos na>>; Worosu su nkye, <<Sua biya Kepasi na>>; Ari kuzum nse daa nkye, <<Na biya Kiristi na.>>13Mina sa de kua yi rikishi, Kiristi e ma lalaba na? Su gidiri Bulusu sobon ku? Ko su yi ku tunkwasa a siki seni Bulusu na?14Ni gbede Mirikisi de ni yi nseda a siki aku tunkwasa ba, sede Kirisbu nja Gayusu,15sobon yomu kede nseda e pala nkye su yi tunkwasa a siki seni Bulusu ba.16Kuzukam ni turunwa, Ni yi ntani gizi Isitipanus tunkwasa du. A beyi da mu ni shina ba ko Ni sakye yi nseda tunkwasa.17Sobon Kiristi saka ni de ni yi nseda tunkwasa na ba, sede e saka ni de ni beyi manki nabari kyakyawu, ba ni simi nsebeki ba, sobon kede ntani su rigye sori dereja muntu Kiristi a gidiri ba.18Sobon manki gidiri Yesu e ma mbo wopi na anya worede su bebeta, sede omu de mu samu sila e ma ni sori Mirikisi la.19Sobon e ma rubuta a siki takada Mirikisi nkye:<<Na bebeta simi ni nsu wayo;Na la wayo ni nsu nana wayo ma banza.>>20nsu wayo ma angana? nsu male doka Musa ma angana? Worede sua geni nkye su shina mbo guru a kwanki mu ma angana? Ema yomuna, Mirikisi sa simi ni nsu simi durinya mu de e ma Odundu bo?21Tunde Mirikisi geni ntani durinya a siki simi asu su shina e yi ba, nzun yomu e jima Mirikisi te anya manki mu de sila worede su ma nja shi.22Yawudawa sua bila de su geni mbo mamanki, se Helenawa sua bila simi.23Sede omu mua beyi manki muntu Kiristi a gidiri: ema ongbomu de mbode sa Yawudawa titimi de su ki keleba manki gidiri Yesu nja sa Odundu ni worede su ma Yawudawa ba.24Sede Kiristi ema sori ni Mirikisi nja simi ni Mirikisi ba worede Mirikisi sukwa su, ni Yawudawa nja Helenawa.25Sobon mbode ntani geni ema Odundu na Mirikisi yi e pi simi ni nsebeki, mbode su geni ema nsu kasa na ni Mirikisi e pi sori ni nsebeki.26Yayuwa ku yi tunani yiride ku ma kapi de Mirikisi sukwa ku. Ba guru aku na ntani la aku kuma nsu shina ba; ntani piri a siki aku na su mani solota; ba guru aku na su la ku ma yaya toree ba.27Sede Mirikisi zabi mbode ntani la ma Odundu, e yi yomu de e ba ntani nsu shina ni durinya kumnya. Mirikisi zabi mbode mani sori ba de e ba nsu sori kumnya.28E zabi mbode ntani la ma mbo daa ba, ko mbode ntani nene yi, se Mirikisi la yi mani anpani durinya ba de juru mbode durinya leyi mani anpani.29Mirikisi yi yomu na sobon kede nse daa e dege dolo a geba E yi ba.30Mirikisi na sa de kuma a siki Yesu Kiristi, E shi na sa Yesu ma simi amu anya Mirikisi, wato nse gangasi, nsuseki nja nsu butu mu.31Nkayomu, yiride e ma rubuta nkye: <<nsude yaa dege dolo e dege dolo a siki Obagizi.>>
The Word for the World International