Read MAKI 14

MAKI14gvs_wbt

Yeisu ana nuwotulu ana losinapu tetelina

¹E maliyalina aiyuwo mlidi moe Basitáwana Aikanina be nakae Beredi Pokaka Aikanina adi tuta. Ago Tonúwala Gagaidi be Yaubada ina Katukeda ana tovatulukwanayao enao siilusala manakaedi bei idi pola goi itoboinedi Yeisu siyoisigau sikaumate.²Moe idi nuwonúwana go, sidigo kadi, ‘Go Basitáwana Aikanina sinaena geya tayoisiyeta, govila bei tomota madi egamogamogu sivakaleyeda.’³Yeisu ina Saimoni ina vada Betani goi ikaaiyaka. Saimoniyana boi tolepero tayamo. E Yeisu ikaaiyaka ikakáika go, vavina tayamo ima pútuma ma bootorina dedevina toina iikavale. Putumayana moe nadimaavadaina go, ana maisa gagaina. Ikavale ima botoriyana ikiguyali, Yeisu dabana goi isiwoi.⁴E tomota maniyedi sikaaiyaka, vavinayana ina guinuwa sigite, tuwo siegamogamogu, toinidi sidigo kadi, ‘Iyaa! Tauyana kogite? Manakae pútuma amo nakae ikavavaluge!⁵Moitamo. Neta putumayana ikaigimone, itoboine maisana mani gagaina toina ikabi; nakae neta tala tayamo ana paisewa ana maisa. Ikaigimone ikavava, maisana ikabi, tookaidi ivinidi. Go kaga unana tauna nakae geya iguinuweyeta?’ Tuwo sivatowo vavinayana siboove.⁶E kina go Yeisu idigo kana, ‘Tauyana kokalāve. Kaga unana mou kovinivini? Ina guinuwa yau yaigu moe guinuwa dedevina toina unana iwowoinegu.⁷Bogina koyagoi. Kidi tookaidi tuta liliuna sikaaiyaka yaimi. Ava tuta latuwomi, e itoboinemi kovaitedi. Go yau sem tuta kaakupina bei akaaiyaka yaimi.⁸Vavina ame kaga nakae itoboine bogina iguinuwe yau yaigu. Pútuma dabagu goi isiwoi mana wowoina sakavaigu igimikatubayasi guna valiwoga manuna.⁹E moe nakae dedevina iguinuwe go, ame alatuuwokoimi konōve: Poyapoya ana madabokina goi nako Vala Dedevina sitaalavaite, e ina guinuwayana tetelina nakae bei sivateteli go, tauyana sinuwokavate.’¹⁰Tuwo Yudasa guma Keriota, tauyana Yeisu ina tovatotówana tayamo yawou aiyuwo yaidi go, tuwo itáoya ina Tonúwala Gagaidi yaidi bego Yeisu inuwotuluye.¹¹E Yudasa ina livala sinove, ina tagona manuna siuyáwana be nakae sikatótula ina nuwotuluyana siemaisi. Tuwo amo tutayana goi tuta ana toboine iilusale bei Yeisu inuwotuluye.

Yeisu mana tovatotowanayaoBasitáwana Aikanina sikakáika tetelina

¹²Beredi Pokaka Aikanina ana maliyalina vakuumgoina bogina ima. Amo tutayana Basitáwana Aikanina ana lami sikaumatedi sikasaledi Yaubada yaina. Maliyalinayana goi Yeisu ina tovatotowanayao sima silumadade sidigo kadi, ‘Nako goi latuwom Basitáwana Aikanina kakatubayasi bei takáika?’¹³Tuwo ina tovatotowanayao adi taiyuwo ilatuwokoidi idigo kana, ‘Kōna Yerusalema goi kosīu go, koroto tayamo aba tega maa bwaena iikavale bei ima ivalobodemi. Korotoyana kosabokulīye.¹⁴Ava vada goi isiusiu komi kosīu be toni vada kolatuwōko kami, “Ima tovatulúkwana idigo kana, ‘Im vada sinaena ava dadava kutagone bei magu tovatotowanayao Basitáwana Aikanina kakáika?’”¹⁵Nakae kolatuwōko go, vada diligaemaina vabodaupa tayamo gagaina dadavina katubaayasina bei ivatulukoimi. Moeko goi ida Basitáwana Aikanina kokatubayāsi.’ Ilatuwokoidi ikavava, ietunedi sina.¹⁶Tuwo moitamo ina tovatotowanayao adi taiyuwokova sitáoya sina Yerusalema goi sisiu go, kaga Yeisu bogina ilatuuwokoidi nakae sibabanedi. Tuwo amoko goi adi Basitáwana Aikanina sikatubayasi. Sikatubayasi ikavava, sikaluvila sima Tauyana yaina goi.¹⁷Bogina kinanatau, Yeisu mana tovatotowanayao yawou aiyuwo sitáoya sima vadayana goi.¹⁸Amoko goi situsobu sikakáika go, Tauyana idigo kana, ‘Ame dedevina taiyao takakáika go, ame alatuuwokoimi konōve: Koroto tayamo yaimi goi bei inuwotuluyegu. Tauyana taiyao kakakáika go, nava bei inuwotuluyegu!’¹⁹Tuwo kidi ina tovatotowanayaoyadi tamo tamo madi kategeda sidigo kadi, ‘Nakona yau?’²⁰E Tauyana kana, ‘Kita mada kabivekoveko noko tayamo goi ida beredi tavakuutuidi go, koroto tayamo komi yawou aiyuwoyami yaimi goi moe yau agu tonuwotulu.²¹Moitamo. Tomalatomota bogina inonoina nakae Gínina Kimaasabaina boi bogina igimitalavaite Tauyana manuna. Ego ana tonuwotuluyana ana toovalugo! Neta boi sinana geya ivenatuniyeta!’²²E tauyadi sikakáika go, Yeisu beredi ikabi, manuna ikauyagu Yaubada yaina. Ikavava, ikivisi ina tovatotowanayao ivinidi go, idigo kana, ‘Moe wowogu nakae. Kokābi kokāni.’²³Tuwo sikabi sikáika. Ikavava, oine ma keeigaina ikabi, manuna ikauyagu Yaubada yaina. Ikavava, keigayana ivinidi, e tamo tamo sikabi sinim²⁴go, idigo kana, ‘Moe ikaikaigu nakae. Ikaikaiguyana bei idaudau komi manumi be nakae tomota liliudi manudi. Ikaikaiguyana ina dau goi Yaubada ikanasiukoimi.²⁵Moitamo nakae bei isowóduwo go, ame alatuuwokoimi konōve: Oine ame geya tuwaina bei animnim ana kadókana tutayana Yaubada itagonegu akalibúbuna namliyeta baige oine vau bei anim.’²⁶Sikáika ikavava, Same vesina sivesiye Yaubada yaina. Sivesi ikavava, sisowóduwo sina Oribe Koyaina goi situko.

Yeisu Pita ina lawoiwoi itaalavaite tetelina

²⁷Niga Yeisu ina tovatotowanayao ilatuwokoidi idigo kana, ‘Sabamgo ame imi numisa goi bei kokapusi yau pasigu. Moe nakae Gínina Kimaasabaina goi Yaubada idigo kana,
“Sipi adi tomatakavata bei aláui go, ina sipiyadi bei sisapa sisiya.” Sakarayau 13:7

²⁸Go geya kada kokapusi vata geya, go sem ámasa goi Yaubada ikaitaoemneigu mlina bei avakumgo ana Galili.’²⁹E kina go Pita idigo kana, ‘Nakona madabokidi idi numisa goi bei sikapusi, go yau sem geya akapusita.’³⁰Go kina Yeisu idigo kana, ‘Moe dedevina neta moitamo go, ame alatuuwokoim kunōve: Ame sabamgoyana goi kom bogina bei sivato kulawoiwoiyekoigu namliyeta kamkam bei sivayuwoina itáiya.’³¹Kina Pita sopana imakimaki kana, ‘Neta akámasa kom taiyao, tuwo akámasa go, geya alawoiwooiyem.’ Ame nakae ina tovatotowanayao liliudi sidige.

Yeisu ina kawanoi be ana yóitaGedesemane goi tetelidi

³²Niga Yeisu mana tovatotowanayao sina asa tayamo yoina Gedesemanegoi go, maniyedi ilatuwokoidi idigo kana, ‘Ameko kotusōbu kokaaiyāka. Kai kana dobala go, yau bei akawanoi Yaubada yaina.’³³Tuwo moitamo situsobu go, Pita, Yemesa be Iyoni ikabidi taiyao sina. Sinonoina go, kina Yeisu bogina nukotona taitáiya iuyoi be nakae atena igeda gagaina toina.³⁴Tuwo adi taito ilatuwokoidi idigo kana, ‘Nuwogu taitáiya iuyoi, nakae bei akámasa. Komi ameko goi kokaaiyāka go, koyauyāusa.’³⁵Ibóbwara ikavava, ivayavakova ikanakabobo go, ikawanoi Yaubada yaina goi neta itoboine ina gedageda ana tuta geya ibabaneyeta.³⁶Ina kawanoiyana goi idigo kana, ‘Abba, Tamagu, kaga liliuna ikakapu yaim. Tauna neta gedageda keigaina ame kukābi kunāve. Go sem yau geya guna nuwonúwana geya, go sem kom im nuwonúwana kuguinūwe.’³⁷Ikawanoi ikavava, ikaluvila ima ina tovatotowanayaoyadi ibabanedi sikanaamatáiya, tuwo iwoinidi, e Pita ilatuwoko idigo kana, ‘Saimoni, manakae? Kom kuumasisi? Manakae? Geya itoboinemta tuta giiyaina goi kuyauyáusa ae?’³⁸Ago adi taito ilatuwokoidi kana, ‘Koyauyāusa nakae kokaawanōi bego aba vakakona goi geya kokapusita. Balomaimi latuwodi toina go, wowomi sineneta.’³⁹Niga Yeisu ivayavamna ina ikawanoi nakae maine bogina ikawanoi.⁴⁰Niga sivayuwoina ikaluvilamna ima ina tovatotowanayaoyadi ibabanedi sikanaamatáiya. Bogina kuyagoi. Matadi inosedi gagaina. Iwoinidi go, odi imayamaya, tauna geya siyagoiyeta manakaedi bei sikatumapu. E Yeisu ivayava ina ikawanoi.⁴¹Ikawanoi ikavava, sivatonina ikaluvila ina ina tovatotowanayaoyadi adi taito ibabanedi sikanaamatáiya. Tuwo iwoinidi go, idigo kana, ‘Manakae? Nava koomasisi be kowaaiwasi ae? Moe tuwo. Tomalatomota ina tuta bogina ima. Ana tonuwotulu bei toogoyoidi nimadi goi iyato.⁴²Kotāoya tāna. Kogīte; guna tonuwotuluyana bogina imamaima.’ Tuwo moitamo sitáoya go, ina tovatotowanayao ainima aito nakae iduduwedi sima.⁴³E Yeisu nava ibobóbwara go, Yudasa isowóduwo ima. Tauyana tovatotówana tayamo yawou aiyuwo yaidi goi. Isowóduwo go, boda madi sisi be madi kepati taiyao sima. Bodayadi kidi Tonúwala Gagaidi be Atukeda ana tovatulukwanayao be nakae Diyuu idi tomoyamoya sietunedi sima.⁴⁴Ego Yeisu ina tonuwotuluyana aba kinana tayamo bogina ivinidi bei siiyagoi ava koroto moe Yeisu, tauna kana, ‘Avatau neta ayowoi, e amo Tauyana koyōisi konāve go, komatakavatedōko.’⁴⁵Tuwo Yudasayana isowóduwo go, mainao iseivata ima Yeisu goi idigo kana, ‘Tovatulúkwana Toolagaim, uyagu!’ Ikavava, iyowoi.⁴⁶E bodayadi sigite, tuwo sibala sima Yeisu siyoisi.⁴⁷E toyoko tayamo ina sisi ibuyagi, ibala ina Tonúwala Toolagaina ina pákwana taiyana kakataina ivakanáupe.⁴⁸Ago Yeisu bodayadi ilatuwokoidi idigo kana, ‘Manakae? Yau bego tokapipilova tayamo, tauna komi mami sisi be mami kepati koma koyoisigu?⁴⁹Maliyalina tamo tamo Vada Kimaasabaina goi akaaiyaka yaimi goi avaatulúkwana go, geya koyoisiguta. Yau geya tokapipilova geya, go sem Gínina Kimaasabaidi itoboinedi simalatomotamna.’⁵⁰Tuwo Yeisu ina tovatotowanayao liliudi Tauyana sikalave go, sisiya.⁵¹Ego tubuwau tayamo ma paiwaina ana tanigo itanigoeyamo Yeisu iikitau, e nakae ikaaiyaka. Ago tovayaviya sima bego siyoisi⁵²go, ana tanigo kaka siyoisiyamo sikiwowo. Tuwo tubuwauyana ma paiwaina isiya.

Yeisu ana kotu Diyuu idi tomoyamoyamatadi goi tetelina

⁵³E tuwo bodayadi Yeisu siyoisi, sinave Tonúwala Toolagaina ina vada goi. Amoko goi Tonúwala Gagaidi, Diyuu idi tomoyamoya be nakae Yaubada ina Katukeda ana tovatulukwanayao bogina sigugúguna.⁵⁴E kina go Pita tupwana masigava goi Yeisu isabookuliye ina Tonúwala Tolagainayana ina vada ana kali goi isiu itusobu Vada Kimaasabaina ana polisi taiyao. Iitusobu go, polisiyadi taiyao yeu goi sibuuvavaya.⁵⁵E kidi go Tonúwala Gagaidi be nakae Diyuu adi kotu ana tolovinao liliudi vadayana sinaena sikaaiyaka Yeisu ana totalavaita polapola siluusaledi bego idi talavaitayadi goi Yeisu sitakino toogoyoina bei sikaumate go, geya tayamo sibabane.⁵⁶Moitamo. Tomota badabadaidi sitalavaita polapola go, idi talavaitayadi geya sivavaseta.⁵⁷Ago maniyedi sitáoya sitalavaita polapola, sidigo kadi,⁵⁸‘Tauyana kanove, idigo kana, “Vada Kimaasabaina ame tomota nimadi goi siyowo, e nava bei atauwe go, maliyalina aito mlidi goi ituli ta Vada Kimaasabaina bei ayowo go, geya tomota nimadi goi geya.”’⁵⁹Nakae sibóbwara go, idi talavaitayadi nakae geya sivavaseta.⁶⁰Sitalavaita ikavava, tolovina nauyayanaidi goi Tonúwala Toolagaina itáoya, Yeisu ilumadade idigo kana, ‘Manakae kom im katumapu? Ame kaga manuna tauyadi sitalavaaitem?’⁶¹Go kina Yeisu iitugau, geya tayaamo kaga ikatumapu. E kina Tonúwala Tolagainayana idigo kana, ‘Kom moitamo Guyau, Yaubada aba yapali Natuna?’⁶²E kina go Yeisu idigo kana, ‘Yau Tauyagu. Nava Tomalatomota bei kogite mana lovina wowoina basekoina Tokalika kakataina goi iitusobu be nakae yábana geleoina yatadi goi imamaima.’⁶³Go kina Tonúwala Tolagainayana mana egamogamogu ana kwama ikiise giyaina go, idigo kana, ‘Kaga ana dedevina totalavaita tuwaina taalusale? Geya!⁶⁴Ina digopopóita bogina konove! Komi manakaemi koolovina?’ E liliudi sitakino kina toogoyoina, sidigo kadi, ‘Moitamo Tauyana itoboine ikámasa!’⁶⁵Ago maniyedi sitáoya Yeisu sigiwoli go, maniyedi matana sisikobode. Ikavava, sipwaiki go, sikaiwotete kadi, ‘Kulatuwokōima avatau iilauim!’ Ago Vada Kimaasabaina ana polisi sima Yeisuyana siyoisi sidabi.

Pita ina lawoiwoi tetelina

⁶⁶E Pita tonoko Tonúwala Toolagaina ina vada ana kali sinaena goi ikaaiyaka go, Tonúwala Toolagainayana ina pákwana woiyaina tayamo ima⁶⁷Pitayana igite ibuuvavaya. Tuwo ipotekavate go, idigo kana, ‘Kom woi amo guma Nasareta, Yeisu, ina tosabokuli tayamo!’⁶⁸Go kina Pita ilawoiwoi idigo kana, ‘Moe kaga kudigedige yau geya ayagoiyeta!’ Tuwo, ibala ina aliyana ana kaba siu goi ikaaiyaka go, kamkam itáiya.⁶⁹Woiyaiyana Pita igite, toyokoyadi ilatuwokoidi idigomna kana, ‘Koroto ame Yeisu ina boda tayamo.’⁷⁰Go kina Pita sivayuwoina ilawoiwoimna kana, ‘Yau geya!’ E tuta giyaina toyoko maniyedi nakae sibala sima Pita silatuwoko sidigo kadi, ‘Kom woi Yeisu ina boda tayamo. Moitamo. Kom guma Galili.’⁷¹Go kina Pita ikanatamada idigo kana, ‘Iyagoida! Neta apola, Yaubada itoboine ilauigu. Amo korotoyana kodigedige yau geya ayagoiyeta geya!’⁷²E mainao kamkam sivayuwoina itáiya go, kina Pita Yeisu ina livala inuwopeye boi idigo kana, ‘Namliyeta kamkam sivayuwoina itáiya, e kom bogina bei sivato kulawoiwoiyekoigu.’ Tuwo to itaiyamo.