Read MAKI 10

MAKI10gvs_wbt

Yeisu ina vatulúkwana vaisobu manuna

¹E amoko goi Yeisu itáoya, mana tovatotowanayao amo asayana sikalave go, sina sákala Iyoridani goi sisaidámana sina bomatu dadavina, e sinonoina Yudiya ana dadava manuna. Go boda gagaina aiyuwoina sitaligógana simamaima Tauyana yaina. Tuwo, nakae ina sinapu aiyuwoina ivatuulukoidi.²Ivatuulukoidi go, kidi Parisi sima bego Yeisu sikatutao, sidigo kadi, ‘Manakae? Ida lovina goi koroto mana tagona monena ivaisobuye gea geya?’³E Yeisu idigo kana, ‘Mosese ava lovina boi tubudao ivinidi vaisobu manuna?’⁴‘Mosese itagona neta koroto latuwona monena ivaisobuye, e ana katae igini. Ikavava, monenayana ivini, ivaisobuye’, Parisi kaedi.⁵E kina go Yeisu idigo kana, ‘Imi dabakasa pasina moe lovinayana Mosese iginigini manumi.⁶Go boi nimatu tuta ana kaba vatowo goi, e moe nakae geya. Gínina Kimaasabaina kana,
“Yaubada tomota iwodugudi; tomotayadi koroto be vavina iwodugudi. Aba Vatowo 1:27, 5:2

⁷E tauna moe pasina koroto tamana be sinana yaidi itumasaba go, monena taiyao situyuwo⁸tauna adi taiyuwokova wowodi tayamo.” Aba Vatowo 2:24
Tauna geya tuwaina kada tauyadi tomota adi taiyuwo, go sem ame tuta tauyadi wowodi tayamo.⁹Tauna avatauwa neta Yaubada nai goi ivatuyuwedi, e tomota taabu sivatumaasabēdi.’¹⁰Niga vada goi Yeisu mana tovatotowanayao sikaaiyaka, e ina tovatotowanayao silumadádana ina bóbwara vaisobu manuna.¹¹Tauyana idigo kana, ‘Ava koroto neta monena ivaisobuyebeso bego inaidámana ituli ta vavina yaina, e bogina iroerata.¹²Ago vavina neta monena ivaisobuyebeso bego inaidámana ituli ta koroto yaina, e bogina iroerata.’

Yeisu gogómana ikaipaakuyedi tetelina

¹³Niga tomota maniyedi natudiyao giyaidi siimemedi Yeisu yaina goi bego ibisikonedi ikaipakuyedi. Go kidi ina tovatotowanayaoyadi sitáoya sibowoidi kadi, ‘Taabu kononōina Yeisu yaina.’¹⁴Go kina Yeisu igitedi, gamona igoyo, idigo kana, ‘Gogomanayadi taabu kosanaabodēdi, go sem kotagonēdi sima yaigu. Tomota nuwotookaidi ame tauyadi nakae Yaubada ina kalibúbuna sinaena goi bei sisiu.¹⁵Ame moitamo, tauna ame alatuuwokoimi konōve: Avatauwa komi neta Yaubada ina kalibúbuna kouuyaone gogómana nakae, e itoboinemi alibubunayana sinaena goi kosiu.’¹⁶Tuwo gogomanayadi ivayavaudi go, dabadi iyoisidi, e ikaipakuyedi.

Toesaesa ina lumadádana yawoina vata manuna

¹⁷Niga Yeisu itáoya bego ina go, koroto tayamo ilokoina ima Yeisu matana goi aena ivatugúyala, idigo kana, ‘Tovatulúkwana, kom todedevim. Ava guinuwa aguuinuwe bei yawoigu vata ababane?’¹⁸E kina go Yeisuyana idigo kana, ‘Kaga unana bego kuvayokoigu yau todedevigu? Tayamo anetava todedevina go, moe Yaubada.¹⁹Yaubada ina lovina bogina kuyaagoidi ae? Idigo kana,
“Taabu kokaaumāta; taabu korooerāta; taabu kovaaināwana; taabu kotalavaita polapōla; taabu koovāobuna; tamamiyao be sinamiyao kowowooinēdi.”’ Tateta 20:12-16; Atukeda 5:16-20

²⁰‘Tovatulúkwana, moe lovinayadi madabokiidi lavayana yau boi gómana go, ima ame tuta, bogina akabikaaonedi’, korotoyana kaena.²¹E kina go Yeisu idobala korotoyana idumaakavate go, imatakoiye, e idigo kana, ‘Go tayamo guinuwa kukiseeyeseye. Kūna konam liliudi kwaigimonēdi go, maisadi kwabīdi, kūna tookaidi yaidi goi kwaiguyauyēdi, e yábana goi bei kom mam esaesa. Kwaiguyauyedi ikavava, kūma kusabokuuliyēgu.’²²E kina go korotoyana nukotona taitáiya iuyoi Yeisu ina livala pasina, tuwo mana nuwomou ina. Bogina kuyagoi. Tauyana konana badabadaidi go, nukotona iyoi.²³E Yeisu imatavilavila go, ina tovatotowanayao ilatuwokoidi idigo kana, ‘Kidi madi esaesa idi siu Yaubada ina kalibúbuna goi moumou isaki.’²⁴E kidi go ina tovatotowanayaoyadi ina livala pasidi nukotodi siwowówana. E Yeisu aiyuwoina ilatuwokoidi idigo kana, ‘Natugowo, Yaubada ina kalibúbuna ana siu moumou isaki.²⁵Kameri yoguyogu gagaina, tauna geya itoboineyeta siláluma taporaina goi isiu ae? Ago toesaesa nakae. Bego Yaubada ina kalibúbuna sinaena goi sisiu go, geya itoboinedita, geya toina.’²⁶E tauyadi nukotodi siwówana gagaina toina ina livala pasidi, tauna taudiva sibobóbwara kadi, ‘Iyaa! Neta toesaesa geya itoboinedita yábana goi sisiu, avatau itoboine ana yava ibabane?’²⁷Yeisu iipotedi go, idigo kana, ‘Tomota yaidi goi moe geya itoboineyeta, go sem Yaubada yaina goi itoboine. Moitamo. Yaubada yaina goi kaga liliuna sikakapu.’²⁸Go kina Pita idigo kana, ‘Go kai bei manakaema? Kai kaga liliuna yaima bogina kakalavedi go, kama kasabokuuliyem.’²⁹Yeisu idigo kana, ‘Moitamo kaga liliuna bogina kokalavedi go, ame alatuuwokoimi konōve: Avatau neta ina vada o senao o niunao o sinana o tamana o natunao o ina kaba lovina ikalavedi yau pasigu be nakae Vala Dedevina pasina,³⁰e ame tuta goi ana katumapu ivakaigaga toina bei ibabane. Nakae vada, senao, niunao, sinanao, natunao be aba lovina go, moe mou taiyao bei ibabanedi. Ago tuta imamaima yawoina vata bei ibabane.³¹E badabadaidi ame tuta toolagaidi go, nava bei tauyadi toosobudi. Badabadaidi ame tuta toosobudi go, nava bei tauyadi toolagaidi.’

Yeisu ina kámasa ana talavaita aitonina

³²E Yeisu mana tovatotowanayao situko sinonoina Yerusalema manuna go, enao goi Yeisu ivakumgo inonoina. Kidi ina tovatotowanayaoyadi siyagoi Yeisu latuwona ina Yerusalema, tauna nukotodi siwówana. Ego boda Yeisu mlina sisabookuliye simatoita. E enao goi sinonoina go, Yeisu ina tovatotowanayao yawou aiyuwo aiyuwoina aditava iduduwedi sima, ilatuwokoidi kaga kaga bei siisowóduwo yaina.³³Idigo kana, ‘Konovēgu. Ame tuta tatukotuko Yerusalema manuna go, maeko goi tomota tayamo bei itáoya Tomalatomota inuwotuluye Tonúwala Gagaidi be nakae Yaubada ina Katukeda ana tovatulukwanayao nimadi goi, gobe Tauyana sitakino ámasa goi. Sitakino ikavava, Tauyana bei sikabi, Totuyoyowo nimadi goi siyato.³⁴Ago kidi Totuyoyowoyadi bei sivaponuponuye, sigiwoli, sidabi be nakae sikaumate go, maliyalina aitonina goi bei itaoyamna.’

Yemesa be Iyoni idi kawanoi tetelina

³⁵E Sebedi natunao, Yemesa be Iyoni, sima Yeisu yaina sidigo kadi, ‘Tovatulúkwana, latuwoma bego kaga kakawanoiye yaim, e kom kuguinuwe manuma.’³⁶‘Kaga latuwomi aguinuwe manumi?’ Yeisu kaena.³⁷E tauyadi kadi, ‘Neta kutagonēma bego tutayana im kalibúbuna goi am káeyana kuvagitakoe, latuwoma kai katusobu kébana dedevidi kikim, tayamo kakataim go, tayamo kekelim.’³⁸E kina go Yeisu idigo kana, ‘Imi kawanoi ana yagoina komi geya koyagoiyeta. Gedageda keigaina goi bei anim go, manakae? Komi itoboinemi nakae konim, gea geya? Nakae gedageda ivakaigaga bei alotowo go, manakae? Komi itoboinemi nakae kolotowo, gea geya?’³⁹‘Itoboinema’, kaedi. E kina go Yeisu idigo kana, ‘Moitamo. Keigayana goi bei anim komi bei konim. Aiyuwoina gedagedayana bei alotowo, komi bei kolotowo.⁴⁰Go yau geya agu lovinamo alovina bego avatau kakataigu o kekeligu goi itusobu, go sem aba tusobuyadi Yaubada bogina ikatubayasidi tauyadi kiinavaidi manudi.’⁴¹Ago tutayana ina tovatotowanayao yawou sinove kaga sediyao Yemesa be Iyoni sikawaanoiye, e siegamogamoguyedi.⁴²Tuwo yawou aiyuwo Yeisu iduduwedi sima ilatuwokoidi idigo kana, ‘Bogina koyagoi tauyadi tomota sikiinanedi Totuyoyowo adi tolovinayao siilovina makimaki Totuyoyowoyadi yaidi goi. Nakae toolagaidi idi lovina toogagaina siguuinuwe makimaki tomota yaidi.⁴³Ago komi yaimi moe nakae geya, go sem avatauwa yaimi goi bego toolagaidi, tauyadi itoboinedi komi ami tovaitayao nakae silovina.⁴⁴Nakae avatauwa yaimi goi bego toosakidi, tauyadi itoboinedi idi lovina goi komi liliumi yaimi imi pakonayao nakae.⁴⁵Tomalatomota nakae, tauna komi nakae itoboinemi. Tauyana ima geya kada bego tomota sivaite geya, go sem Tauyana ima bego tomota ivaitedi. Yawoina moe tomota adi kaba tateta go, yawoinayana toinina ikasale ámasa goi, tomota liliudi adi katumapu.’

Yeisu tokebo yoina Batimiyo ikideedevine tetelina

⁴⁶Niga Yeisu mana tovatotowanayao sima Yeriko. Tutayana Yeriko sikalave, boda gagaina taiyao sinonoina go, tokawanoi tayamo ma matakebokeboina enao kikina goi iitusobu iiduduwo; tauyana Timiyo natuna yoina Batimiyo.⁴⁷Tauyana vala inove bego Yeisu guma Nasareta ikaaiyaka. Tuwo iduduwo idigo kana, ‘Yeisu, Devida tubuna, kunuwokapisiyēgu!’⁴⁸Go tomota maniyedi sikaaiyaka tokeboyana siboove kadi, ‘Kom kumaigāu!’ Go kina tokeboyana tuwaina iiduduwo kana, ‘Devida tubuna, kunuwokapisiyēgu!’⁴⁹Tuwo Yeisu itáoya idigo kana, ‘Tauyana kodudūwe ima.’ Tuwo moitamo sina tokeboyana siduduwe sidigo kadi, ‘Tauyana iduuduwem. Tauna kwatepātu go, kutāoya!’⁵⁰E moitamo ana tanigo inisi ikalave go, ikabitaotáoya ima Yeisu yaina goi.⁵¹Ima, Yeisuyana idigo kana, ‘Kaga go bei avekoim?’ ‘Tovatulúkwana toolagaim, bego agita dókana’, tokeboyana kaena.⁵²Yeisu idigo kana, ‘Kūna im kasa. Im numisa pasina bogina matam sidedevina.’ Tuwo mainao igita dókana, e ivatowo enao goi Yeisu isabokuliye.