IZO23gub_wbt

Uwazar Izo waze'eg wanupe

Hepurukwaw wer Tupàn hexakaw rehe, i'i

1Izo uze'eg putar a'e nehe kury.
2Ihewe uzeapo ma'e kwer iro ihewe a'e rihi. Amume'u Tupàn hemiapo kwer ikatu 'ymaw ihe no.Napuner kwaw hekuhem ire hepytu'u haw rehe.3Hepurukwaw wer hexakaw rehe.Ma'e pe aexak putar nehe. Heho wer zepe heko haw pe.4A'e mehe mo amume'u mo hekatu haw izupe.Amume'u mo heremiapo kwer paw ikatu haw izupe.5Hepurukwaw wer mo ihewe hemimume'u ràm rehe,Heze'eg ihewe hemiwazar ràm rehe no.6Aipo Tupàn weityk mo upuner haw paw hekutyr.Nan. Herenu mo azeharomoete a'e.7Aiko awa imunar 'ym ma'e romo ihe.Apuner mo hekatu haw imume'u haw rehe izupe.Nezewe mehe — Ikatu ma'e romo ereiko ne, i'i mo ihewe azeharomoete.

Aekar Tupàn ihe

8Aekar kwarahy heixe haw kutyr. Tupàn nuiko kwaw a'e pe.Naexak kwaw kwarahy ihemaw kutyr no.9Naexak kwaw ma'e iapo mehe kwarahy heixe haw awyze har kutyr.Naexak kwaw kwarahy ihemaw awyze har kutyr izeàmim mehe no.10Nezewe rehe we Tupàn ukwaw heata haw pitàitàigatu a'e.Aze heragaw nehe, — Heko haw nuzawy kwaw or ikatuahy ma'e, i'i putar ihewe nehe.11Ata pe ihewe hemixak kar rupi ihe.Napiza kwaw izuwi.12Aruzar Tupàn hemiapo kar.Azapo hemimutar tuweharupi.Nazapo kwaw heremimutar.

Tupàn uzapo wemiapo putar haw uze'eg awer rupi a'e

13Tupàn uzapo wemimutar a'e.Aze ipurapo wer ma'e rehe,Ni amo nupuner kwaw imupytu'u kar haw rehe wà.14Umume'u ma'e ihewe wemiapo ràm a'e. Umumaw putar a'e ma'e iapo haw nehe.Uzapo putar amo wemimume'u kwer paw rupi katete nehe no.15A'e rupi hekàgaw uhem ihewi henataromo hereko mehe.A'e ma'e rehe hema'enukwaw mehe akyzeahy.16Ipytunaw hemuigo kar hehàpyhà 'ym ma'e zàwenugar romo. Ipytunaw nahemukyze kar kwaw.Tupàn upuner wera'u ma'e umur hekyze haw herehe.
expand_more
Search