Zozue7
1Ma hio wi mɔ Israel dea gdangamɔ nɛ gdanga gdang ha wen zu hio wi mɔ ka Wankpoo kafa ha mbwa mɔ ku. Ma wi hazang kandɔ pɛ Zuda, Akan, bem pɛ Karmi, wɛnɛ fin bem pɛ Zabdi hinɛ beata pɛ Zera. Wen zua Wankpoo dea ngambi a tɛ hio wi mɔ Israel.2Ha Zeriko, Zozue tomsa hio wei ha wal Ai, ma le ha gutɛ swe mɔ Betel, sanga nɛ Beth-Aven. Wɛnɛ tɔa ha mbwa: « Ɛnɛ dang nɛ ki zugoto lea.» Mbwa dea yo.3Mbwa nduko tɛ tɔ pataa ha Zozue: «Yo nɛ mɔsoykilemɔ mɔ tomsi hio zugili bulo fɛt a nɛa dea mɔ ngaya ha Ai. Hio wei saki bwa mana saki tar belɛm. Hio wi mɔ kandɔ lea bo nɛ dɔka nde ɔ yengisi hio bele bɔna.»4Hio wi sanga nɛ saki tar pena ha bio tumbo, ma mbwa yuomɔ ha Sɔngsi hio bele mɔ Ai.5Mbwa gbɛa mbwa sanga nɛ bhukɔa tar zanga mɔrkɔ gbala ndang ha soko mbwa. Mbwa naka hio oloa angiri ha nu le gboa Sebarim, hazang gbongolo, mbwa gbinsio mbwa. Yo gɔ mbwa bo fin nɛ da na, sila mbwa kio mbwa.6Zozue nɛ hio kotowi mɔ Israel gbaa la ha tɛ mbwa, mbwa Sɔa Sɔngsi mbwa nɛ fok nu. Mbwa goka li mbwa ha nu ha Sɔngsi kubha pɛ Wankpoo gboa mbolo.7Zozue tɔa: «Woo, Wankpoo Sɔ! Ha wen zu ge mɛ kuo ɔ ku nɛ̂ nɛ Zurdain nde? Mɛ de mɛgi mɔ ku ɔ haa hio Amori mɔ tɔnde mbwa ha gbɛ ɔ? Ka bo nde ɔ bhɔn se nɛ ha kuli li, yo bedung nɛ dedea.8Mi betɔ nde ge, Wankpoo, sising hio wi mɔ Israel yuomɔ ha Sɔngsi hio kɔmbɛ mbwa.9Hio wi mɔ Kanan hinɛ hio ma hio ma wi mɔ ma le bewesiri may sungiri nɛ ɔ nɛ mbwa begbɔndisi ɔ fɛt. Mɛ bede mɛng mɔ ing nɛ gasa pɛmɛ nde?»10Wankpoo kiforo wen a Zozue: «Gu tɛ mɛ! Ha wen zu ge mɛ gok zu mɛ ha nu e?11Hio hio wi mɔ Israel dea sɛmbɔ. Mbwa karsa mbon pɔm, ɛngɛ ka mi haa nu ha mbwa mɔ haa zio ha yo. Mbwa kuo hio dede mɔ ka mi bakafi nde mbwa a ku. Mbwa zuo yo nɛ mbwa uso ha soko hio toe pɛ mbwa.12Ha zang hio wi mɔ mɛgi, mbwa lɛm mɔ balia ha Sɔngsi hio kɔmbɛ pɛ mbwa na. Mbwa beyu mɔ ha Sɔngsi mbwa, mbwa betɛ tuka hio wi mɔ wi ka ɛ gdea mɔ gbɛ fɛt. Mi lɛm mɔ dung ha soko ɛnɛ na, ka ɛnɛ tɛ gdangsi hio wi mɔ fɛt ka mi kafa nde ɛnɛ ku na.13Sising, hio kandɔ ha bhɔngiri tɛ mbwa mɔ kpa mi nɛ mɔsa. Mɛ betɔa mbwa: “Ɛnɛ bhɔngiri tɛ ɛnɛ nɛ alowa zɛm fɛt a li Wankpoo”, ha zu zɔk mɔ ka mi, Wankpoo, Sɔ Israel, mi tɔa ha hio wi mɔ Israel: Ɛnɛ kuo hio wi mɔ ka mi ba kafi nde ɛnɛ ku. Ɛnɛ lem mɔ zati na ha Sɔngsi hio kɔmbɛ pɛ ɛnɛ gboa ngimɔ ka ɛnɛ tɛ gbasi hio wi mɔa na nɛ wi ka kuo hio wi mɔa.14Mɔsa nɛ sutele, ɛnɛ betɛ ha sɔngsi mi kandɔ nɛ kandɔ. Kandɔ ka mi beosi betɛ pɛl nu gala nɛ pɛl nu gala, nɛ kandɔ ka mi beosi betiki nam nɛ war nam. Hio wei mɔ nam ka mi beosi betiki ndang nɛ war ndang.15Mɛgi, mi beosi ha soko mbwa wi ka kuo mɔ ka mi bakafi nde ɛnɛ ku na kɛ. Ɛ bepi wɛnɛ ha li we, nɛ hio wi mɔ fɛt ka yo nɛ pɛa, ha wen zu a gdangsa mbon pɛ Wankpoo, wɛnɛ dea mɔ nɛ gdanga gdang ha Israel.»16Ha mɔsaa nɛ sutele sut, Zozue dea nde hio wi mɔ Israel a tikisi kandɔ nɛ kandɔ. Ɛ osa kandɔ pɛ Zuda.17Wɛnɛ tikoso mbwa pɛl nu gala nɛ pɛl nu gala, nɛ ɛ osa pɛ Zera. Wɛnɛ tikoso kandɔ ɛngɛ nam nɛ nam, nɛ ɛ osa pɛ Zabdi.18Wɛnɛ tikoso hio wei ndang ndang mɔ nam, nɛ Akan, bem pɛ Karmi, beata pɛ Zabdi ka dung nɛ bem pɛ Zera, mɔ kandɔ pɛ Zuda, ɛ osa.19Zozue tɔa ha wɛnɛ: «Bem pɔm, ing gasa pɛ Wankpoo, Sɔ Israel, nɛ mɛ haa lukosomɔ ha wɛnɛ. Gbasi mɔ ka mɛ dea, usi ma mɔ ndang ha mi na.»20Akan kiforo wen ha Zozue: «Ey, yo nɛ mi ha dea sɛmbɔ sungiri nɛ Wankpoo, Sɔ mɔ Israel. Zɔk mɔ ka mi dea ga:21Mi zɔka hazang hio wi mɔ ka ɔ kuo hapata bulo, ma gasa la nɛ dedea mɔ Mesopotami, nɛ gbala faranga gɔmmay bwa nɛ kili ɔr nɛ ma titia kiloa ndang. Mi dea wɔa pentɛ nɛ mi kuo yo. Ɛnɛ bekpa yo hazang twa pɔm mi gunɔ ha si nu nɛ mi gdea mbɔli ha sia.»22Zozue tomsa hio wei hazang twa pɛ Akan ka ɛ dea nɛ la. Mbwa nɛ̂a kpasa wen nɛ kpa hio wi mɔa hazang twa ka gunɔ hinɛ mbɔlia ha si nu.23Mbwa kaya hio wi mɔa tɛnɛ ha Zozue nɛ hio wi mɔ Israel. Ɛ gdea hio wi mɔa haa nu ha Sɔngsi Wankpoo.24Zozue nɛ hio wi fɛt mɔ Israel baa Akan, bem pɛ Zera, hinɛ mbɔli, la nɛ kili mɔ ɔr. Mbwa kuo fin hio bewei nɛ bebhoko pɛ Akan, hio nday, toefɔk, sami nɛ hio mbori, twa la nɛ hio dede mɔ pɛa fɛt. Nɛ hio wi mɔ pɛa fɛt mbwa kuo nɛnɛ hazang bikɔnu mɔ Akor .25Zozue tɔa ha Akan: «Mɛ pio ngɔtɛ ha soko ɔ hawen zu ge? Ma sising Wankpoo bepi ngɔtɛ fin ha zu mɛ.» Ha wen zua hio wi Israel fɛt loa wɛnɛ nɛ ta mbwa gbɛa wɛnɛ. Ndangi tɛ mɔ ka ɛ dea nɛ Akan mbwa dea fin nɛ hio bem nɛ besasa hio wi mɔ pɛ mbwa fɛt.26Hapata ɛ kaya ta lum ha zu wa gboa sising. Ha wenzua, sising, ɛ saa bhandia bikonu mɔ Akor.
Hapata, ngambi pɛ Wankpoo gaa.
Hapata, ngambi pɛ Wankpoo gaa.
The Seed Company