Zozue23
1Wankpoo, haa gaamɔ ha hio wi mɔ Israel ngimɔ nɛ dɔka nɛ wɛnɛ kpasasa mbwa ha kɔ hio ngana pɛ mbwa ka zikoro mbwa. Zozue gbɛla nɛ bɛlɛ pɛa dɔka pentɛ.2Wɛnɛ saa hio wi mɔ Israel fɛt, hio kotowi, hio wan, hio wan gɔn kita nɛ hio kagama bulo. Wɛnɛ tɔa ha mbwa: ‹‹ Mi gbɛla kari bɛlɛ pɔm dɔka pentɛ.3Ɛnɛ zɔka hio mɔ fɛt ka Wankpoo, Sɔ pɛ ɛnɛ dea hazang kandɔnu pɛ hio kandɔ ndɔng hawenzu ɛnɛ. Hazu nɛ Wankpoo Sɔ pɛ ɛnɛ ha bibulo ha wal pɛ ɛnɛ.4Zɔk, mi bakapini nu ha soko hio kandɔ pɛ ɛnɛ nɛ wal dea mbala, hio nu pɛ hio kandɔ ka mi baa ganzu mbwa nɛ hio nu pɛ hio kandɔ ka bhɔna mɔ baa ha soko Zurdain ha wal gutɛ swe nɛ gasa nanali tong mɔ Mediterane nɛ wal ɔnu swe.5Wankpoo Sɔ pɛ ɛnɛ beyin mbwa nɛ tɛwa nɛ nyɛa nɛ ɛnɛ nɛ wɛnɛ begde mbwa ha sɔawi ha sɔngsi ɛnɛ nɛ ɛnɛ bebaa le pɛ mbwa tuka Wankpoo Sɔ pɛ ɛnɛ bahaa nɛ nu.6Ɛnɛ dung nɛ da nɛ ɛnɛ haa tɛ ɛnɛ mɔ de hio mɔ, lɛm nɛ wen ka ɛ ngɛrka hazang tarkarata mɔ mbonga pɛ Moize, ɛnɛ nɛ nɛ̂ nyɛa nɛ yo na.7Ɛnɛ sɔkiri tɛ ɛnɛ nɛ hio kandɔ ndɔng ka bhɔna fin ha soko ɛnɛ na. Ɛnɛ gɔ hio sɔ pɛ mbwa na nɛ ɛnɛ saa ling hio sɔ pɛ mbwa hazang haanu pɛ ɛnɛ na. Ka ɛnɛ agomzu ɛnɛ ha sɔngsi mbwa mɔ gɔ hio sɔ pɛ mbwa na.8Ɛnɛ hɛl tɛ ɛnɛ sɔna ha tɛ Wankpoo Sɔ pɛ ɛnɛ tuka ɛnɛ bade nɛ gbo sising.9Wankpoo bayin ha sɔngsi ɛnɛ hio gasa kandɔ nɛ ngaya; nɛ gbo mɛsɛ ma wi ndang mɔ zati ha sɔngsi ɛnɛ bona.10Wi ndang sɔna ha soko ɛnɛ lɛma mɔ yinsi hio ngana saki ndang, hazu Wankpoo, Sɔ pɛ ɛnɛ bebibulo hazu ɛnɛ tuka ɛngɛ ka wɛnɛ bahaa nɛ nu.11Mɛgi, ɛnɛ pam tɛ ɛnɛ nɛ dedea nɛ ɛnɛ ngoy Wankpoo, Sɔ pɛ ɛnɛ.12Ka ɛnɛ kafa Wankpoo nɛ ɛnɛ sɔkara may nɛ hio kandɔ ndɔng ka bhɔna fin ha soko ɛnɛ. Ka ɛnɛ sio hio bem pɛ mbwa, ka ɛnɛ sɔkara nɛ mbwa nɛ mbwa be sɔkiri nɛ ɛnɛ.13Ka yo mɛgi, ɛnɛ ing nɛ dedea nde Wankpoo, Sɔ pɛ ɛnɛ lɛm yinsi hio kandɔ ndɔng ha sɔngsi ɛnɛ na. Maa mbwa bedung tuka sak, mbwa bedung tuka hio kɔ ka ɛnɛ lɛma teka ang. Mbwa bedung tuka ngbasi mɛl wi ha gdong, mbwa bedung tuka hio tɛn hazang li ɛnɛ. Ha kpogio, ɛnɛ bekum hazang dede le ka Wankpoo Sɔ pɛ ɛnɛ bahaa ɛnɛ.14Mɔ wal pɔm, mi befe hazu nzan ɛngɛ sising. Ɛnɛ ing sising ha sila ɛnɛ fɛt nɛ tunɔ pɛ ɛnɛ fɛt nde hio haanu ndɔng fɛt ka Wankpoo, Sɔ pɛ ɛnɛ tɔa: hazu ɛnɛ bazɔk dɛl, ma ndang bhɔn nɛ gelea na.15Kpasawen hio haanu dɔng fɛt ka wɛnɛ haa, Wankpoo Sɔ pɛ ɛnɛ bede nde hio gdanga hio wen ndɔng fɛt ha kifiri hazu ɛnɛ. Wɛnɛ bekumsi ɛnɛ fɛt hazang dede le ka wɛnɛ nɛ tɛwa bahaa ɛnɛ.16Ka ɛnɛ gdangsa mbon ka Wankpoo, Sɔ pɛ ɛnɛ bahaa ha ɛnɛ nde ɛnɛ zio, ka ɛnɛ ngbio zigolo ha sɔngsi hio ma sɔ mɔ gɔ mbwa. Mɛgi Wankpoo bede ngambi sungiri ɛnɛ nɛ wɛnɛ bekumsi ɛnɛ nɛ hasa hazang dede le ka wɛnɛ bahaa a ɛnɛ.››
The Seed Company