Zozue13
1Zozue gbɛla kari, Wankpoo tɔa ha wɛnɛ: «Zɔk sising mɛ gbɛla pentɛ, bɛlɛ pɛ mɛ tɛ bo nɛ dɔka, tangere mɛ bhɔna nɛ dɔka hio nu ha baa.2Hio nu ka bhɔna nɛ ɛngɛ: nu pɛ hio wi mɔ Filistin nɛ pɛ hio wi mɔ Gesur.3Hio wi zɔka kandɔnua tuka pɛ hio wi mɔ Kanaan ka gutɛ ha nana li mɔ Sihor, ha lingia nu mɔ Ezipte, tee gboa kandɔnu mɔ Ekron, nɛ wal kala. Hio kongapora mɔrkɔ mɔ Filistin ka dung ha le mɔ Gaza, mɔ Asdod, mɔ Askalon, mɔ Gat nɛ mɔ Ekron, fin nɛ nu pɛ hio wi mɔ Avi,4nɛ wal gdɔk. Bhɔna fin nde ɛnɛ baa le pɛ hio wi mɔ Kanaan, angiri ha Ara, ka badung nɛ pɛ hio wi mɔ Sidon, tee gboa Afek lingia pɛ hio wi mɔ Amori.5Nu ka bhɔna nde ɛnɛ baa nɛ kandɔnu mɔ Gebal nɛ mɔ Liban nɛ wal gutɛ swe mɔ Baal-Gad ha nanga ngari mɔ Hermon gboa Lebo-Hamat.6Hio kandɔnnu mɔ zu ngari ka dung ha soko Liban nɛ Misrefot-Maim, hio wi ka ɔnu hazang lea fɛt nɛ̂ hio wi mɔ Sidon. Ha hɔa pɛ ɛnɛ hio wi mɔ Israel, mi beyin hio kandɔ ndɔng fɛt ka dung hazang lea. Mi behaa le ndɔng fɛt ha hio wi mɔ Israel nde mbwa kapini lɛm nɛ kandɔ pɛ mbwa. Mɛ bede mbala mɔ kɛtini hio nu ndɔng ha soko hio wi mɔ Israel tuka ɛngɛ mi baahaa nɛ nu ha mɛ.7Sising, mɛ bekapini hio nu ndɔng ha soko hio kandɔ mɔrkɔ zanga nar nɛ titi kandɔ pɛ Manase ka tɛ kpaa mamɔ ndang na.»8Hio kandɔ pɛ Ruben, pɛ Gad nɛ bosi titi kandɔ pɛ Manase kpaa hio nu ndɔng ha wal gutɛ swe mɔ li Zurdain. Nɛ Moize, wan-tom pɛ Wankpoo ahaa nu ndɔng ha mbwa.9Hio nu pɛ mbwa ha lingia mɔ wal gdɔk ha soko le mɔ Aroer sanga ha nu li mɔ Arnon ka dung ha soko bingɔnu mɔ Arnon. Hio tɛlfɛn nu zu ngari mɔ wal Medeba gboa Dibon,10fin hio le pɛ Sihon kongapora mɔ Amori, ka baa dung wan sɔngsi ha Hesebon tee gboa lingia mɔ Amon.11Nɛ le mɔ Galaad, kandɔnu mɔ Gesur nɛ mɔ Maaka, ngari mɔ Hermon fin nɛ kandɔnu fɛt mɔ Basan, tee gboa Salka.12Konga-kandɔnu pɛ Og nɛ ma ndang kpogio pɛ Refa, ka badung wan sɔngsi hazu le mɔ Asetarot nɛ mɔ Edrei, hazang le mɔ Basan. Moize baa gbɛ mbwa nɛ wɛnɛ baa kandɔnu pɛ mbwa.13Ma hio wi mɔ Israel tɛ yinsi hio wi mɔ kandɔ mɔ Gesur nɛ Maaka na, fin nɛ hio wi ndɔng ka ɔnu ha soko hio wi mɔ Israel.14Hio kandɔ pɛ Levi tɛ kpaa pɛ mbwa nu ka Moize baa kapini nɛ hio kandɔ ndɔng na. Tuka ɛngi, mɔ ka ɛ haa hio kandɔ pɛ Levi bedung nɛ hio sadaka ka ɛ besasa ha we pɛ Wankpoo, Sɔ mɔ Israel tuka ɛngɛ ka Wankpoo nɛ tɛwa bahaa nɛ nu.15Hio nu ka Moize baa kapini nɛ hio pɛl nam mɔ zang kandɔ pɛ Ruben,16nɛ lingia nɛ wal gdɔk ha le mɔ Aroer ha nu li mɔ Arnon nɛ le ka dung ha soko bingɔnu mɔ Arnon. Fin nɛ tɛlfɛn nu zu ngari zu ngari sanga nɛ Medeba.17Fin nɛ Hesebon nɛ hio le fɛt mɔ tɛlfɛn nu zu ngari: Dibon, Bamot-Baal, Bet-Baal-Meon,18Yahas, Kedemot, Mefaat,19Kiriataim, Sibma, Seret-Sahar, bebe ngari ka dung ha zu bingɔnu,20Bet-Peor gɔsi ha hio nanga ngari mɔ Pisga nɛ Bet-Yesimot.21Hio le fɛt mɔ tɛlfɛn nu zu ngari nɛ kongakandɔnu fɛt pɛ Sihon kongapora mɔ Amori ka ba dung kongapora hazu le mɔ Hesebon. Moize baa gbɛ Sihon nɛ hio wan le mɔ Madian ka badung ha siwa nɛ ɛ ndɔng ka ɔnu hazang le pɛa : Evi, Rekem, Sur, Hur nɛ Reba.22Ha soko hio wi ndɔng ka hio wi mɔ Israel gbɛa mbwa nɛ gbapa, Balaam bem pɛ Beor wan mbarimɔ fɛt ang.23Lingia pɛ hio wi mɔ kandɔ pɛ Ruben dungɔ nɛ li Zurdain nɛ wal ɔnu swe. Hio le nɛ hio bebe le fɛt ka ɛ baa sɔngsi ɛ haa ha yo ha hio pɛl nam mɔ kandɔ pɛ Ruben.24Hio nu ka Moize baa haa ha pɛl nam hazang kandɔ pɛ Gad25dungɔ nɛ nu mɔ Yazer, hio le mɔ Galaad fɛt olo titi nu pɛ hio wi mɔ Amon, tee gboa Aroer, sanga nɛ Raba.26Nua gutɛ ha Hesebon gboa Ramat-Mispe nɛ Betonim, nɛ mɔ Mahanaim gboa kandɔnu mɔ Lo-Dabar.27Hazang bingɔnu mɔ Zurdain, osa nde le mɔ Bet-Haram, le mɔ Bet-Nimra, le mɔ Sukot nɛ le mɔ Safon, hio bebe le ndɔng dung hazang konga kandɔnu mɔ Sihon, ka badung hazu le mɔ Hesebon. Hio nu ndɔng dung ha wal gutɛ swe mɔ Zurdain; Zurdain gdea lingia nu pɛa gboa tɔli mɔ Genezaret nɛ wal kala.28Hio le nɛ hio bebe le mɔ pɛtɛa ka Moize haa ha hio pɛl nam mɔ zang kandɔ pɛ Gad nde a tɛ mbwa.29Hio nu ndɔng ka Moize baa haa ha hio pɛl nam mɔ titi-kandɔ pɛ Manase.30Lingia nu ndɔng nɛ wal gdɔk mɔ Mahanaim. Osi nde nu pɛ Basan fɛt nɛ le pɛ Og, kongapora mɔ Basan fin nɛ hio bebe le bhukɔa mɔrkɔ zubhukɔa ndang mɔ Yair.31Ɛngi osa nde titi nu pɛ Galaad fin nɛ hio le mɔ Asetarot nɛ mɔ Edrei, hio koto konga kandɔnu pɛ Og, kongapora mɔ Basan. Hio nu ndɔng fɛt ɛ haa titi pɛl nam pɛ Makir, bem pɛ Manase.32Moize baa kapini hio soko nu mɔ wal gutɛ swe mɔ Zeriko nɛ mɔ Zurdain ha ngimɔ ka wɛnɛ bhɔna ha tɛlfɛn nu mɔ Moab.33Wɛnɛ tɛ kapini nu ha hio kandɔ pɛ Levi na. Hazu Wankpoo, Sɔ pɛ hio wi mɔ Israel gdea mbwa mɔ de tom pɛa tuka ɛngɛ ka wɛnɛ haa nɛ nu.
The Seed Company