Angaramɔ (Genèse)44
1Zozɛf haanu ha wei ka zɔk mɔ hazu hio wi mɔ hazang twa pɛa nde: ‹‹Donsi ngobho pɛ hio wei ndɔng nɛ hio waya ble ka wi ndang ndang lɛma guo, nɛ mɛ gde fin mbɔli ha zanga ngobho pɛ wi ndang ndang.2Hazang ngobho pɛ kpogio bema, mɛ gde mbɔli hɛ mɔ pɛa ha zanga nɛ mɛ gde kɔpɔ bolo pɔm fin ha zang ngobhoa.» Wei ɛngi dea lɛm wen ka Zozɛf tɔa ha wɛnɛ.3Yala ndang ha gdonga, ka mɔ saa kari, mbwa gdea hio wi ndɔng nde mbwa nduki, mbwa nɛ hio toyfok pɛ mbwa.4Ka mbwa gboa ha zang le ɛngɛ nde mbwa ha duki mbwa tɛnɛ ka nɛ nyɛn na, Zozɛf tɔa ha wi ka zɔk mɔ hazu twa pɛa, a tɔa nde: «Gutɛ mɛ Sɔwi hapata hio wi ndɔng. Ka mɛ kpa mbwa mɛ ani mbwa mɛ tɔn nde: “Hawen ge mbwa de gdangamɔ ha wi ka de dede mɔ a mbwa mɛsɛ.5Kɔpɔ bolo ka gasa wi pɔm ha nɔa nɛmɔ ka wɛnɛ ku yo mɔ ki nɛ goto hio wi mɔ ka usi tɛ, ɛnɛ zu yo hawen ge? Mɔ ka ɛnɛ dea kɛ yo nɛ gdanga.”»6Wi kɛ nɛa nɛ kpa mbwa nɛ a tɔa wen ki ha mbwa.7Mbwa kiforowen nde: «Gasa wi mɛ tɔ kandɔ wen tuka ɛngɛ ha wen ge? Ɔ hio wi mɔ si mɛ ɔ lɛm mɔ de kandɔ mɔ tuka ɛngi ma swe ndang na.8Mbɔli kɛ swe ka ɔba kpayo ha zang ngobho pɔ, mɛ zɔka, ɔ guotɛ nɛ nɛ nyɛn nisi ha le mɔ kanaan, ɔ tɛ kifiri nɛyo ha ɛnɛ na nde? Dea mɛng sising ɔ be nɛ zu mbɔli nɛ lɔr ha zang twa pɛ gasa wi pɛ mɛ nde?9Ka ɛ kpa mɔ ndɔng ki ha zang ngobho pɛ ma wi ka dung ha soko ɔ, lɛma nde ɛ gbɛ wɛnɛ! Ka bonɛ pɔ lɛma nde ɛ ba ɔ fɛt tuka bala pɛmɛ!10Wan pamɔ ɛngɛ kiforo wen ha mbwa, nɛ a tɔa nde: «Ɔ be de tuka wen ka ɛnɛ tɔa. Wi ka ɛ be kpa mɔ ki hazang ngobho pɛa, a be tɛ bala pɔm. Ka bonɛ pɛ hio olowa, ma wen ndang bo hazu mbwa na.»11Mbwa gdea ngobho pɛ mbwa ha nu nɛ hasa nɛ wi ndang ndang gbosara nu ngobho pɛa.12Wi kɛ angara kio mɔ ha zang ngobho pɛ wi ndang ndang a angiri ha tɛ gasa wia teee ɔnɛ a tɛ kpogio wia a kpa kɔpɔ bolo kɛ hazang ngobho pɛ kpogio bema.13Mbwa fɛt gba laa a tɛ mbwa. Wi ndang ndang kiforo nɛ toy pɛa hazu toyfok nɛ mbwa nduko fin nɛ pata hazang lea.14Zuda nɛ hio yawa hɔa ha twa pɛ Zozɛf ha ngimɔ ki Zozɛf bhɔna hazang twa. Mbwa fɛt gɔka hanu ha si wa.15Zozɛf tɔa mbwa nde: «ɛngɛ nɛ kpal dea mɔ ge ka ɛnɛ dea ɛnɛ ingɔ nde wi tuka mi, mamɔ mɔ osi nɛ mi bona?»16Zuda kiforowen ha mbwa ha tɔa: «Gasa wi, ɔ be tɔ nɛ ngete wen ha mɛ ge nde? Ngete wen ɔ lɛma tɔa ha mɛ mɔ dung nzeg wi ha li mɛ nde? Sɔ uso gdangamɔ pɔ ha li hio wi kari. Zɔk mi hinɛ wɛnɛ ka ɛ kpa kɔpɔ hazang hio toy pɛa kɔ ɔ tɛ bonɛ bala pɛmɛ kari.»17Zozɛf tɔa ha mbwa: «Way, mi lɛm mɔ de ɛngi na, ka nɛ wi ka ɛ kpa kɔpɔ kɛ hazang mɔ pɛa be nɛ dung bala, maa pɛ ɛnɛ hio oloa ɛnɛ nduki ha pɛtɛ bafa ɛnɛ.»18Zuda nɛa ha pɛ Zozɛf nɛ atɔa: «Mi baa nanga mɛ gasa wi, mɛ gde mi hasi mɛ mia tɔ ma wen ha mɛ. Mɛ de ngambi nɛ ngaya sungiri nɛ mi na, hawen zu ɛngɛ mɛ dung tuka Faraon.19Gasa wi, mɛ ana Sɔngsi ɔ, hio wi mɔ si mɛ, mɛ tɔa ha ɔ: “Bafa ɛnɛ mana ma ya ɛnɛ mɔ bewei kɛ wɛnɛ ayo?”20Ɔ kiforo nɛ wen ha mɛ ɔ tɔa: “Bafa ɔ wɛnɛ a yo wɛnɛ tɛ bonɛ gbɛlwi kari, wɛnɛ nɛ ma bebe ya ɔ mɔ bewei ha si wa wɛnɛ gbɛla kari, ma yaɔ mɔ bewei feya ka nɛ wɛnɛ ndang hazang nana ka bhɔna nɛ zutunɔ hawezua bafa wa ngoya wɛnɛ pentɛ.”21Mɛ tɔa ha ɔ: “Ku wɛnɛ tɛnɛ ha mi, mi ngoya mɔ zɔk wɛnɛ.”22Ɔ kiforo wen ha mɛ nde: “Ɔ tɔa ha mɛ bem kɛ lɛm mɔ pen hasi bafawa na ka a pena bafawa be fe.”23Maa mɛ batɔ ha ɔ nde: “Mɛ lɛm mɔ baa ɔ nɛ dede kɔ na, ka kpogio ɔ tɛ tɛ hinɛ ɔ na. Wan-pam mɔ ki kiforowen nde: Ɛnɛ kari sɛm, ke ade ɛnɛ na.”24Ɔ bhɔna nduki ha pɛtɛ bafa ɔ, wan tom pɛ mɛ, nɛ ɔ tɔa hio pata wen fɛt ka mɛ ba tɔ ha ɔ.25Hapata, a ana ha ɔ fin nde ɔ nduki ɔ tɛ hɛ hio ma yɔngamɔ,26ɔ tɔa ha wɛnɛ nde: “Ɔ lɛm mɔ nɛ na, ka wɛnɛ tɛ mɛkiri nde kpogio ɔ ha nɛ hinɛ ɔ na. Ka wɛnɛ bo ha pɛtɛ ɔ na, ɔ lɛm mɔ zɔk may hinɛ gasa wi ɛngi na.”27Bafa ɔ kiforo wen a ɔ: “Ɛnɛ ingɔ nɛ dedea nde, ko pɔm Rasɛl bhɛa ka nɛ bem bwa Sɔna ha mi.28Ndanga yɔamɔ, mi takara nɛ hio ma da sari a yɔnga wɛnɛ, gbo sising mi tɛ zɔk fin li wa na.29Maa, ka ɛnɛ baa fin bebe ya ɛnɛ ha pɛtɛ tɛ mi penɛ, ka ma gdangamɔ nɛ kpaa wɛnɛ ha kɔ ɛnɛ, sising ɛnɛ de ɛngi nde mi ka mbui hɔa hazu mi kari, mi be fe nɛ ngɔtɛ hazang sila mi ha bhandi ka hio fio nɛ ang.”»30«Sising, ka mi sio ha pɛtɛ bafa mi, nɛ ka bewei ɛngɛ bo hinɛ ɔ na, hazu bebe ya ɔ nɛ ndɔng sila bafa mi hawenzu a ngoya pentɛ.31Ha ngimɔ ka wɛnɛ bezɔk nde bem pɛa bo hinɛ ɔ na, wɛnɛ be fe. Mɛgi, bedung nde nɛ ɔ hio wantom pɛ mɛ, ɔa de nde bafa ɔ, wan de tom hasi mɛ, ka mbui hɔa hazu wa afe nɛ ngɔtɛ sila wa ha soko hio fio.32Hazu mi, wantom pɛ mɛ, mi gɔna nu ha li bafa mi nde bewei pɛa bedung ha kɔ mi. Mi tɔa ha wɛnɛ nde: “Ka mi ku bewei pɛ mɛ penɛ ha mɛ na, yo bedung nɛ gdangamɔ ka mi dea atɛ mɛ, fin nɛ bafa mi ka dung ha li mi kpoo nɛ kpoo.”33Mɛgi gasa wi pɔm, mi baa nanga mɛ! Gde mi abhɔn hakɛ tuka bala pɛ mɛ, nɛ mɛ gde bewei ɛngɛ aduki hinɛ hio ya wa.34Maa, ka bewei pɛa bo ha pɛtɛ mi na, mi be nɛa ha pɛtɛ bafa mi mɛng nde? Mi lɛm mɔ baa sila mi nɛ gdangamɔ ɛngɛ ka ngoy mɔ hɔa tɛ bafa mi na.»
The Seed Company