ESTHER5
Esther nɛa ha pɛ kongapora.
1Ka yala tar mɔ zimomɔa kara, Esther yola la pɛa mɔ ko pɛ kongapora, nɛ a nɛa ha lîdɛl mɔ kin pɛ kongapora, ha nûtwa pɛ kongapora. Kongapora ha dungɔ ha zu solowan pɛa ha zang kin ka zɔk may nɛ nûtwaa.2Ka wɛnɛ zɔka ko pɛa ha lîdɛl, a zɔka wɛnɛ nɛ dede sila. Mɛgi, kongapora yɛfafa tongolo pɛa mɔ ɔr ka dung ha kɔ̂ wa ha Esther. Esther tiko sanga, nɛ wɛnɛ ndɔa ndɔng tongoloa.3Kongapora tɔa ha wɛnɛ nde: «Nɛ̂ ge Esther, ko pɛ kongapora? Mɛ ani nɛ̂ ge? Ngase yo adung nɛ̂ kongakandɔ pɔm ka ɛ lɛma gba sokoa ha binsila mɔ ha bhalkɔa ha mɛ, ɛ beha.»4Esther kiforo wen ha wɛnɛ nde: «Ka mɛ ngoya, kongapora pɔm, mɛ tɛ ha pɔm hinɛ Haman ha ma gasa yɔngamɔ ka mi bhɔngara ha wen zu mɛ.»5Kongapora tɔa ha hio ma wantom pɛa: «Ɛnɛ nɛ̂ nɛ hasa, nɛ tɔ ha Haman mɔ kifiri wen ha saa sala pɛ Esther.» Kongapora hinɛ Haman tɛa ha gasa yɔngamɔ ka Esther bhɔngara.6Hapata yɔngamɔa, kongapora tɔa ha Esther: «Mɛ ani nɛ̂ ge nde? Ɛ beha yo ha mɛ. Mɔ ka mɛ ngɔy nɛ̂ ge? Ngase yo adung nɛ̂ kongakandɔ pɔm ka ɛ lɛma gbaa sokoa ha binsila mɔ ha bhalkɔa ha mɛ, ɛ beha.»7Esther kiforo wen nde: «Mɔ ka mi ngoya nɛ mɔ ka mi ani nɛ̂:8«Ka mi kpa dede sila pɛ kongapora pɔm, ka kongapora ngoy mɔ ha mɔ ka mi ana ha mi, nɛ mɔ ka mi ngoy: Lɛma nde kongapora atɛ̂ hinɛ Haman ha gasa yɔngamɔ ka mi bebhɔngiri ha mbwa bhisiri, nɛ mi bekirifi wen long ha kongapora.»Haman bhɔngara ma sala te mɔ gɛsi Mardose ha yo
9Haman gboa ha yala ɛngi, sila wa dona nɛ totɛ, nɛ ha zang dede dungɔnu. Hasam! Haman zɔka Mardose ha nûtwa kin pɛ kongapora. Mardose tɛ gu tɛ mɔ zisi Haman na. Mɛgi, sila Haman doya nɛ gasa ngambi sungiri nɛ Mardose.10Maa, wɛnɛ baa sila nɛ a sio ha twa pɛa. A tomsa mɔ hazu sa hio dan wa ka wɛnɛ ngoy pentɛ hinɛ ko pɛa Zeres.11Haman tɔa pata hio lɛkɛ-lɛkɛ kpaamɔ pɛa, hio dɔka bem pɛa, nɛ wal ka kongapora dea mɔ gde wɛnɛ nɛ zio ha zu hio gasa wi mɔ si wa nɛ hio wantom pɛ kongapora.12Nɛ a tɔa ha mbwa mɔsoykisi nde: «Yo nɛ̂ mi, bonɛ ma wi nɛtɛ na, ka Esther, ko pɛ kongapora saa hinɛ kongapora ha gasa yɔngamɔ ka wɛnɛ bhɔngara. Nɛ bhisiri fin, yo nɛ̂ mi ka wɛnɛ be saa mi hinɛ kongapora.13Maa, mɔ ɛngi fɛt de ma mɔ ha tɛ mi na, ka mi bhɔna ha zɔka Mardose, Zuif ɛngɛ ka de tom ha nûtwa kin pɛ kongapora.»14Mɛgi Zeres, ko pɛa hinɛ hio dan wa fɛt tɔa ha wɛnɛ: «Ɛ bhɔngiri ma sala te ka kusoa lɛma mɛtɛrɛ bhuzebwa zanga mɔrkɔ. Nɛ bhisiri nɛ sutole, mɛ betɔ ha kongapora nde ɛ gɛsi Mardose ha sala tea. Mɛgi, mɛ lɛma nɛ̂ nɛ totɛ ha gasa yɔngamɔa hinɛ kongapora.» Wen ɛngi baa sila wa, nɛ a bɛa tea.The Seed Company