ESTHER2
Esther tɛ bo nɛ̂ ko pɛ kongapora
1Ha pata hio wi mɔ ndɔng, ngambi pɛ kongapora Assierus gaa. Tazu wa gbaa nɛ Vasti nɛ mɔ ka wɛnɛ bade, hinɛ gɔnanû ka ɛ ba baa sungiri nɛ Vasti.2Hio pɔlɔmbɔ wi ka de tom ha si kongapora tɔa: «Lɛma nde ɔ aki ha kongapora pɛ ɔ, hio zɔnga bhoko ka tɛ ing wei na, nɛ ka lɔka pentɛ.3Yo nɛ dedea nde kongapora aha nû ha hio wan-nɛ̂tom mɔ zang hio kandɔnu mɔ kongakandɔ pɛa, mɔ wesiri hio zɔnga bhoko ka dung nɛ lɔka nɛ ka tɛ ing wei na, mɔ le pɛ mbwa fɛt ha zang twa pɛ hio bhoko mɔ kin pɛ kongapora ha Suze. Yo nɛ̂ Hege, napam hio ko pɛ kongapora ha bezɔk mɔ ha zu mbwa, nɛ yo nɛ wɛnɛ ha beha hio wi mɔ de zɔnga pɛ mbwa ha mbwa.4Zɔnga bhoko ɛngi ka beba sila kongapora pentɛ, beba bhandi pɛ Vasti.» Wena ba sila kongapora, mɛgi, ɛ dea mɔa lɛm nɛ yo.5Ha zang le Suze, ma wei ka dung nɛ̂ Zuif ang, ling wa nɛ̂ Mardose bewei pɛ Yair, Yair nɛ̂ bewei pɛ Simei, nɛ Simei bewei pɛ Kis, mɔ kandɔ pɛ Benzamin.6Ɛ baku wɛnɛ ha Zerusalɛm tɛ̂ nɛ̂ ha soko hio wi ndɔng ka Nebukadnetsar, kongapora mɔ Babylone kaya nɛ mbwa tɛ̂ nɛ̂ mɔsoykisi hinɛ Yekonia kongapora mɔ Zuda.7Tangere, Mardose dungɔ nɛ̂ napam Hadassa ka ɛ sa fin nde Esther. Wɛnɛ dungɔ nɛ bebhoko pɛ ya mɛ bafa mɛ Mardose mɔ wei. Esther nɛ̂ ma bebhoko ka bafa hinɛ nana, mbwa bwa fɛt Fea. Nɛ bebhoko ɛngɛ dungɔ nɛ lɔka pentɛ. Ha pata fio pɛ bafa wa hinɛ nana wa, yo nɛ̂ Mardose ka pam wɛnɛ.8Ka ɛ hea nɛ mbela haanû hinɛ mbonga pɛ kongapora, ɛ wesara hio dɔka zɔnga bhoko tɛ̂ nɛ̂ ha le Suze ha si Hegai. Mɛgi, ɛ kuo Esther tɛ̂ nɛ̂ ha zang kin pɛ kongapora, ha si Hegai, napam hio bhoko.9Wen pɛ Esther baa sila Hegai pentɛ, nɛ wɛnɛ dea dede sila ha tɛ wa. Nɛ hasa, Hegai haa hio wi mɔ ka lɛma mɔ de zɔnga pɛa ha wɛnɛ, nɛ mɔ yɔng, hinɛ hio ma bebhoko tom mɔrkɔ zanga bwa mɔ zang kin ka ɛ sala mbwa mɔ de tom ha Esther. Hegai kuo Esther hinɛ hio bhoko ndɔng, nɛ gde mbwa ha zang ma dede pimbi mɔ twa pɛ bhoko.10Esther tɛ gbasi hio nam pɛa hinɛ kandɔ pɛa ha ma wi ndang na, hazu Mardose badol wɛnɛ mɔ gbasi yo ha hio wi.11Mardose ha yala swe fɛt, zikiri twa pɛ hio bhoko mɔ ing nɛ dungɔnu pɛ Esther, nɛ mɔ ka ɛ de ha tɛ wa.12Ngimɔ pɛ hio zɔnga bhoko ndang ndang mɔ nɛ̂ ha pɛ kongapora Assierus hɔa ha kpogio hio fioze bhukɔ gbala bwa, lɛm nɛ mɔ ka napam mbwa bhɔngara, hazu ngimɔ dea zɔnga pɛ mbwa ka ɛ haa, kara: Ha zang ze mɔrkɔ zanga ndang, mbwa ha pɛla nɔ mɔ myre, nɛ ha zang hio olo ze mɔrkɔ zanga ndang, mbwa pɛla liyama mɔ aromate hinɛ hio ma dede mɔ de zɔnga pɛ hio bhoko.13Ha ngimɔ ka ma zɔnga bhoko nɛ̂ ha pɛ kongapora, mɔ fɛt ka wɛnɛ ani, ɛ haa yo ha wɛnɛ ha twa pɛ hio bhoko, nɛ̂ nɛ̂ ha kin pɛ kongapora.14Nɛ mbolo, bhoko ndang nɛa ha zang twa pɛ kongapora, nɛ mɔsaa nɛ sutole, wɛnɛ lea ma mbing twa pɛ hio bhoko nɛtɛ fin, mɔ dung ha si Sasgaz, napam hio wanza pɛ kongapora. A lɛm mɔ nduki fin ha pɛ kongapora na, ka kongapora tɛ de hɛl tɛ wa, nɛ sa wɛnɛ nɛ ling na.15Ka ngimɔ pɛa mɔ nɛ̂ ha pɛ kongapora hɔa, Esther, bebhoko pɛ Abisail, ya mɛ bafa mɛ Mardose napam wɛnɛ, tɛ ani fin ma mɔ nɛtɛ pen mɔ ka Hegai, napam hio bhoko pɛ kongapora baosi ha wɛnɛ na. Hio wi fɛt ka zɔk Esther, mbwa ha lukoso wɛnɛ.16Ɛ tɛa tɛ ku Esther nɛ nɛ̂ ha pɛ kongapora, Assierus, ha bhukɔ zea ka dung nɛ̂ ze Tebet, ha mɔrkɔ zanga bwa bɛlɛ mɔ konga pɛa.17Kongapora ngoya Esther pen hio olo zɔnga bhoko ndɔng fɛt, nɛ wɛnɛ dea dede sila ha tɛ wa pen hio olo zɔnga bhoko fɛt ka tɛ ing wei na. Mɛgi, a gdea ndutu kongapora ha zu Esther, nɛ a gdea wɛnɛ ha bhandi pɛ Vasti.18Kongapora haa ma gasa fada ha hio gasa wi mɔ si wa hinɛ hio wantom pɛa fɛt, ha wen zu Esther. Kongapora haa nû nde ɛ futi garama fin na, nɛ a kapana hio wi mɔ ha hio wi nɛ mɔsoykilea.19Ka ɛ wesara hio zɔnga bhoko fin mɔ zebwaa, Mardose tɛ bo nɛ ma tom ha nû kin pɛ kongapora.20Esther tɛ̂ gbasi hio nam pɛa hinɛ kandɔ pɛa ha hio wi na, tuka Mardose baha nɛ nû ha wɛnɛ. Esther dea mɔ lɛm nɛ hio haanû pɛ Mardose, ka wɛnɛ badung ha dea ha ngimɔ ka wɛnɛ bhɔna ha si Mardose.Mardose zea ma gdanga dambari
21Ha ngimɔ ɛngi, Mardose dungɔ ha bhandi tom pɛa ha nû kin pɛ kongapora. Hio ma napam kin pɛ kongapora, ka pam nûtwa pɛ kongapora ha dɛl: Bigtan hinɛ Teres, nɛ wal gasa ngambi pɛ mbwa, zea may mɔ de gdangamɔ ha tɛ kongapora, Assierus.22Mardose zea wena, nɛ a tɔa pataa ha Esther, ko pɛ kongapora. Esther tɔa pata wena ha kongapora nɛ ling Mardose.23Ɛ kio pata wena, nɛ ɛ kpaa nde yo nɛ̂ kpasawen: Ɛ gɛsa hio wantom ndɔng bwa fɛt ha te. Ɛ ngɛraka wen ɛngi ha zang takarata kasiwen mɔ kongakandɔ, ha lî kongapora.The Seed Company