Yohanna9
1Nak Yesu mbǝrtǝ ha, nakan nafɗi nggǝttǝ fee kǝ komnda.2Chihan kǝ kǝmsǝchiyan mee. Ndang kanda wa, “Thlǝ Chaˈanan kaɗi, wun chich ɓǝɓifata, nggǝttǝ fee nafɗiya kǝ komnda kǝɗaya? Mǝthlan wa parchaˈan wa?”3Nggǝman kǝ Yesu ndakan wa, “Ngga kǝthlǝm kǝt nafɗiya ndu parchaˈan chich ɓǝɓifata wa, kǝɗu kǝthlǝm kǝ pǝn fee teri Farta ɗar indiyan.”4Nwaat kǝ chimǝn teri thla thlǝnchi nenchi peˈ mǝt ɗaˈ. Na Wiitǝ chita thla nggawaktǝ yowun chit tera.5Ma nggǝt hur heshi, nggǝt nech kǝ ɗaˈkǝti heshi .6Kǝ mbuˈkan kǝɗu, chihakan yahtǝ kǝ haha, tǝhɗankan paˈkan kǝ wenita nafan.7Ndang kan wa, “Ɗu, chapan wenito kaɗi ǝ kwi ˈyam Siluwam,” (Na saktaˈan wa “Thlǝnda”). Kǝɗu pǝɗak nafan kǝ chapandǝ wenitiyan kaɗi nggǝran kan in mǝthlan naa mǝta.8Fee nech nduk nduk tǝ anchi tǝ fee sǝnchi ha tǝ naa ndi mǝthlan shitǝ choh. Nda kan da wa, “Ngga nafɗiya thlǝ nech chokta kǝn shitǝ ya wa?”9Ndak fowun wa mǝthlanni. Fowun paɗ wa, “Auwa, tǝ thlǝ ndǝ raˈan.” Nakan ndat wa, “Nggǝt niya.”10Kǝɗu ndang kanda wa, kan tǝ kǝni indǝ wenitiyo ha? “Chichan in kǝni kǝn wenitiyo indǝ ha?”11Nggǝmkan nda kan wa, “Nafɗi thlǝ ˈya fee wa Yesu yu mǝthlan tǝhɗanchǝ fǝrta tǝ yahta kǝna paˈitǝ kǝ wenita. Ndi kan wa, ‘Ɗu kǝ Siluwam kǝ chepeen wenitiyo kaɗi.’ Pǝɗaki kǝ chapaanda, kǝni mbǝs naa mǝta.”12Ndang kanda wa, “Mǝthlan ǝ ayi?” Nda kan wa, “Sǝnwi wa.”13Kǝn nafchaˈan ɗǝt tǝ nafan thla nech kǝ komndǝ choh yu kǝmɗi Farisiyawecha.14Fartǝɗi tǝhǝɗ Yesu fǝrta inandǝn weniti nafan ha, nechan fartǝ yipti Yahudawecha.15Chika Farisiyawechaˈan chǝhan kandǝ mee, tǝmɗi chit fee kǝna naa mǝta. Ndang kan tanda wa, “Tǝhǝɗ tǝ fǝrta paˈitǝn kǝ wenitinchi, chapanki kaɗi, paɗ naki mǝta.”16Fowun hur Farisiyawechaˈan nda kanda wa, “Nafɗiya ngga ɓechan mǝɗi Farta wa, kǝthlǝm para wa fartǝ yipti Yahudawecha wa.” Fowun paɗ nda kanda wa, “Nech thlǝ ɓǝɓifat mbahǝn chich tar ǝna saka inchiɗiya wa kǝni?” Ɓak chak tǝ ha kǝ hur ɗǝfi tǝ nanda.17Nggǝr kandǝ nda ndǝ komnan wa, “Chi kǝni, Mǝ natu mbahǝn mbuˈta kǝ ɗar nafɗiya kǝthlǝm inantǝ wenitiyo ha?” Nggǝm kǝ komnan wa, “Thlǝ mbandi Fartǝ nakan.”18Paktechi Yahudawechaˈan chika kǝ nakanya fǝrwandǝ kitsi wa komndǝ nakan choh wa, paɗ mbǝstǝ naa mǝta wa. ˈYa kandǝ parchǝ komnan.19Chihan kandǝ meetanda, “Waˈyowun niya wa thlǝ ndat wun wa? Nggǝtchǝ fee anchi kǝ komnda wa? Chichan in kǝni natǝn naa mǝt nakanya?”20Nggǝman kǝ parchaˈan wa, “Sǝn ǝn wa wayaˈan niya, paɗ nggǝt chaˈan ndi kǝ komnda.21Kǝɗu, nggaˈan sǝn waˈǝn ndu chichan in kǝni kǝna mbǝs naa mǝt nakanya wa, ndu wun kǝnanchi kaɗ wa. Chihaman mee, ngga wanwa nakan wa, nan ndikta tǝ indiyan.”22Ndech parchaˈan kǝɗu kǝthlǝm tǝ nandǝ lekandǝ Yahudawechaˈan. Kǝthlǝm choh tapi kǝnandǝ ha, ndat wa, chikawun nggǝmancha wa, Yesu nech kǝ Kǝristi, naa fee rǝk anchi ǝ wur nggomnda .23Kǝthlǝm ndaˈan chicha nda parchaˈan wa, “Chihaman mee ngga wanwa nakan wa.”24Nggǝr kandǝ ˈya komnan, Ndang kanda wa, “Maanandǝ Farta tǝmɗi mbuˈ kit, kǝthlǝm sǝn ǝn wa nafɗiya thlǝ ɓǝɓifat nakan.”25Nggǝrankan tandǝs wa, “Sǝn wi ndu thlǝ ɓǝɓifat nakan wa, nggǝt sǝn wi wa. Ən artǝ ndak sǝndi, Komndǝ naki choh. Nakanya nggǝt naa mǝta.”26Chihan kandǝ mee, “Mǝ chutǝn? Tǝ kǝni inandǝn wenitiyo ha?”27Nggǝman kan tanda wa, “Tapi mbuˈowunchi karkowun nggǝmanda. Mǝ chicha yah tǝ wun si kǝ nggǝrwun sǝkta? Chika kun paɗ tǝ yah wunsi kǝ chok wun kǝ kǝmsichiyan wa?”28Thlaˈan kandǝf tǝ ˈyarata, nakandǝ ndat wa, “Chi nech kǝ kimshaˈyan, nggaˈan kǝmsǝchi Musa.29Sǝn ǝn wa ndik Farta tǝ Musa, ma nafɗiya sǝnwaˈan mǝɗi ɓatǝn wa.”30Nggǝman kǝ nafan wa, “Mǝ chicha ǝna saka inda. Kǝnan tǝ wenitinchi kaɗi, chika kǝɗu sǝnwowun mǝɗi ɓatǝn wa.31Sǝn ǝn wa Farta kaa wa thlǝmat fǝ ɓǝɓifecha wa. Kǝɗu chika wun thla thlǝ parech Farta, paɗ thlǝ thlǝnan chan saktiyan, thlǝ kanchǝ Fartǝ thlǝmata.32Kǝ nggak tǝ fee tǝn heshi, tam wu fee sǝkta wa inan yowun weniti nef ha nggǝttǝ fee kǝ komnda wa.33Mangga ɓech nafɗiya mǝɗi Farta wa, mǝ nggǝ ǝnsi natǝn mbǝlaˈ chita wa.”34Nggǝman kanda nda kanda wa, “Chaɗi gǝttǝ fee wech kǝ hur ponggǝn ɓǝɓifata chinech chaˈa ǝndǝ har wa?” Chat rǝkkan kandǝ kesh chekan kesh.35Kǝ sǝk kǝ Yesu wa rǝkkaa ndǝ kesh wur nggomnda, mbǝsan kan nafan, chǝhan kan wa, “Firin kit kǝ Waˈi nefa wa?”36Nggǝman kan wa, “Thlǝ maanda, mbuˈtǝn wun nakan kǝthlǝm kǝ fǝri kit kǝ anchi.”37Ndang kǝ Yesu wa, “Aa, niin anchi, mǝthlan ni nech shenuˈtǝ tǝ wech nakanya.”38Nda kan wa, “Chinda, fǝrinchi kit.” Paɗ manankan Yesu.39Ndak Yesu wa, “Ɓechi kǝ hur heshi kǝthlǝm chak mee. Kǝthlǝm fee thlǝ nawakchǝ mǝta kǝ nandǝ mǝta, fee thlǝ nech mǝt paɗ kǝ chok ndǝ kǝ komincha.”40Fowun Farisiyawechaˈan fee nech nduk tǝ anchi, kǝ sǝkkandǝ kǝɗu, ndan kanda wa, “Kǝɗu nggaˈan paɗ Komincha wa?”41Ndang kǝ Yesu tanda wa, “Mam wa kominchǝ nakowun, mǝ nǝ fee nda wa ɓǝɓifat fiyowun wa. Kǝɗu ndakowun wa thlǝ nechowun mǝt ya, wathlowunchǝ ɓǝɓifatˈyowun ha.
The Seed Company