Yohanna15
1Ndan kǝ Yesu kǝmsichiyan wa: “Nggǝta nech kǝ ɗǝftǝ inabi yi kittaˈan, Papa paɗ nech kǝ thlǝ ɗǝpa hǝngga inabi taˈan har.2Thlǝ chathlanchan chika yen njartaˈan kaɗi ǝ finchi kǝ mǝkanchi kaɗi, thla thlǝ nggǝt wakchǝ wancha. Kǝɗu thlǝ kwetanchan chika yen njarchaˈan kaɗi thla thlǝ nggǝtcha, kǝthlǝm kǝ chekantǝ nggǝttǝ kaˈan.3Chika nakanya tapi chap wun kaɗi tǝmɗi chaˈatinchi thla fǝrowundi.4Chokam ǝ hwirinchi, nggǝt paɗ ni choktǝ hurˈyowun. kǝɗ ǝnɗi thlǝ nggǝt waktǝ njaartǝ ɗǝftǝ inabi ichiɗan ma tǝn fi ɗǝftǝ inabi taˈan. Kǝɗu paɗ nowun mbǝlaˈ nggǝt wancha wa mangga tǝ chokwun hwirinchi wa.5Nggǝt nech kǝ ɗǝftǝ inabi paɗ kun nech kǝ njaarchaˈan. ma chokwun e hwirinchi, paɗ kǝ choki ǝ hwirˈyowun, kǝthlǝm ndaˈan nowun nggǝt wanchǝ terchan. kǝthlǝm nowun mbahǝn chit ǝna wa mangga tǝ nenchi wa.6Nat thla chok wakchǝ hwirinchi, naa fee mǝkandǝ kaɗ kǝ michiɗi, kǝɗ njartǝ tǝ ɗǝfta, kǝ hwarkaɗi. Paɗ kǝ nggoman fee weˈtǝnanda kǝ cham fee kǝ wata, kǝ njang fee kaɗi.7Ma chokwun ǝ hwirinchi paɗ ndiktinchi nan chok tǝ ǝ hwirˈyowun, nowun shi ǝnɗi nat yahtǝwun, paɗ naa fee chowun nda.8Maandi Papa inchi thlǝ pinchan tǝmɗi nggǝt wanchǝyowun, thleya nech pǝnda wa kun kimsichinchi.9Kǝɗ ǝnɗi pǝnitǝ Papa thlǝrɗakta kǝɗu paɗ nati pǝnowun thlǝrɗakta. Chokam hur thlǝrɗaktinchi.10Ma fǝrwun maanda kǝ kusiˈ inchi, nowun chokta hur thlǝrɗaktinchi, kǝɗ ǝnɗi fǝrandi maandǝ kusiˈ i Papa paɗ chokki hur thlǝrɗaktiyan.11Mbuˈowunchi kǝɗaya kǝthlǝm mbǝn fatinchi kǝ chok hur yowun, paɗ kǝthlǝm mbǝn fatˈyowun kǝ chok kǝ ndiiɗan.12Thleya nech kǝ kusiˈ inchi, pǝnaman thlǝrɗaktǝ raˈan, kǝɗ ǝnɗi pǝnowundi thlǝrɗakta.13Nggǝ thlǝrɗaktǝsi pǝɗanchǝ thleya ha wa, nefa kǝ fǝrtǝ shishingndiyan kǝ shikechaˈan.14Paɗ kun nech kǝ shikechina ma thlǝ wun ǝnɗi mbuˈowun ndi wa kǝ chiwun.15Nggǝta ˈya wi wunchi wa mafech paɗ wa, kǝthlǝm mafata sǝn wa ǝnɗi naa thlǝ wirˈyan chita. kǝɗu, ˈyechi wunchi wa shikechina, kǝthlǝm ndaˈan ˈyechi wa shikechina kǝthlǝm ǝnɗi chaˈati mǝɗi Papa mbuˈowunchi.16Taɗwowun nenchi wa nggǝt taɗchǝwunchi, paɗ ɗǝf ki wunchi kǝ ɗuwun chit wancha, weˈtǝ wanɗǝfchiɗi nawakchi sǝɓchǝ kaɗi. Kǝthlǝm Papa kǝ fǝrowun tǝ chika mǝ shitǝwun tǝ thlǝmna.17Thleya nech kǝ kusiˈ tǝɗi mbuˈti, pǝnaman thlǝrɗaktǝ raˈan.”18Ma fee sǝn wakchi Farta karndǝ wunchi, kǝ sǝn wun wa nggǝt latǝn karta.19Ma tǝ chokwun kǝ yi heshi, mǝ naa nafchǝ heshi pǝnowun thlǝrɗakta kǝɗ yaˈan. Kǝɗu kǝthlǝm ngga kun yi heshiɗiya wa nggǝt taɗchǝ wunchi kǝthlǝm ndaˈan heshi nan karwinchi.20Kuɗ kam har tǝ ǝnɗi mbuˈondi, “Mafata mbǝra wa thlǝ wiryan ha wa.” Ma nafchi heshiɗiya fǝri pancha, kun paɗ nandǝ fǝrowunchi pancha. Ma fǝrndǝ maanda kǝ chaˈatinchi, nandǝ fǝran maanda chika yuwun paɗ.21Nat ichiɗiya nechandǝ naa chowunda kǝthlǝm thlǝm na, kǝthlǝm sǝn wandǝ thla thlǝnchi nenchi wa.22Mangga kǝthlǝm ǝnɗi ɓaki mbuˈowun ndikta wa, mǝ nggǝ ɓǝɓifat fiyanda wa. Paɗ nakanya, mii ndiktiyandǝs kǝ ɗar ɓǝɓifechˈyanda wa.23Chika wun karchǝ nenchi kartǝ Papa paɗ.24Mam wa chiwi tarchiɗi chiti hur nanda wa, thla tamwaktǝ yowun chita wa mǝ nggǝta wa. Mǝ nggǝ ɓǝɓifat fiyanda wa kǝɗu nakanya nii nda, paɗ karkandǝ nggaˈan, tǝ Chindǝ nat.25Ichiɗiya ndiiɗan tǝ ǝnɗi ha yara fee hur chak mee ˈyandǝ. Yari fee wa, “Karndǝ nenchi saktaˈansǝ wa.”26Keɗu fartǝɗi ɓa thlǝ kǝsamǝndǝsi, thla nati thlǝnda mǝɗi Chinda. Ndat wa Shemeta yi kit, thla nech chet kesh mǝɗi Chinda, mǝthlan nech fǝr sǝndǝsi kǝ nenchi.27Kun paɗ nowun fer sǝndǝsi, kǝthlǝm ǝ tǝrkwathl kanan kun tǝ nenchi.
The Seed Company