1 Korintiyawa4
1Tǝ kǝɗu, kǝɗaya nat wun thlǝ tǝr nggaˈan wa fǝ tarchi Kǝristi nakaˈan, thla fǝramǝndǝ fee tera kǝ mbuˈmǝn ichiɗi nech tǝ wuɓtǝ fa i Farta.2Ənɗi yah tǝ fee mǝɗi fee fǝrandǝ fee heˈtǝɗa tanda, kǝ chok ndǝ kǝ fǝ chǝt ter tǝ hwir arta.3Nakanya haɗ wa nenchǝ hur wa ndu kun ndu wur chak mee kǝ ndǝ chi nda wa chinchǝ ɓǝɓifata. Nggǝt tǝ indinchǝ chaka wi mee indinchǝ wa.4Kittaˈan sǝn wi ndu chichǝ ɓǝɓifata wa, kǝɗu paɗ chok wa wa sǝɓawi kaɗ pangngǝn Farta wa. Chinda tǝ indiyan nech ɗǝbandǝ tarɗi chandǝ ndu ndiˈchan ndu ɗǝɗ wa wa.5Kǝthlǝm ndaˈan, kǝ chakawun mee yowuna wa, ǝ saˈwu fartaˈan kwaɗǝn wa. Na fartǝ chak mee ini ɓata fartǝɗi ɓa Chindǝ Yesu kaɗi. Nan pǝn ɗaˈkǝta kǝ ɓǝra ichiɗi wuɓandǝ wuthlǝ tanda, paɗ kǝ kohtantǝ ichiɗi kesh nech hur wanɗǝkaɗati nafcha. Ə fartǝ ini nan chim chikawuni keˈke tǝ tarɗi thlǝnandǝn.6Wanmanchina hǝssa tǝ nǝssa, kǝ ɗar ndiktǝ ichiɗiya, fǝrchi saktaˈan tǝ indinchi, tǝ paɗ Apolos kǝthlǝm kǝ kǝsowun chǝs kǝ sǝnwun. Kǝthlǝm paɗ kǝ chaˈowun mǝɗiyaˈan saktǝ ndik tǝɗi yarandǝ fee ha ndat wa, “Kǝ chǝ yowun ǝna thla nech mɓǝran ndǝ ǝnɗi yarandǝ fee ha hur Laulawati Farta wa.” Tǝ kǝɗu kǝ thlaˈan yowun inda wa, tǝ ndat wa ɓǝrantǝ yowun ha arta kǝthlǝm thlǝ parechan artǝ hur ǝn wa.7Wun nducha wa pǝɗenin takichaˈan ha? Mǝ paɗ nǝsso, thla ngga Farta furucha wa? Maa pafǝn furutǝ fee, michicha thlǝ natu thlaˈandǝ inda kǝɗ ngga pafǝn mbǝstu wa?8Nakan ya tapi mbǝswun nat ǝnɗi yahtǝwun wa? Tapi chokwun kǝ wurumǝncha wa? Ndu chok wun kǝɗ kuturchi fee nech chǝt kutǝrakta ngga tǝ nggaˈan wa? Maa tǝn kǝ kit, nggak wun chǝt kuturakta, kǝthlǝm nggaˈan paɗ kǝ chǝmǝn kuraktǝ tǝ wunchi.9Maa ǝ natinchi, ɗǝf Farta nggaˈansi, nggaˈan fǝ thlǝncha nggaˈan nech naa kǝrsa ǝ kǝrsǝ nafcha. Kǝɗ fee thle ndǝ fee tandǝ chak mii mǝrta ha pangngǝn chikawuni. Kǝthlǝm nggaˈan chok ǝn kǝ ǝnɗi naa nat heshi, fǝ thlǝncha, tǝ nafcha nat ndǝ ɗǝfan wenitǝ tanda.10Chok ǝn kǝ mɓamcha kǝthlǝm Kǝristi, paɗ kun mɓǝr in ˈyowun si hur Kǝristi. Alkǝt ˈyaˈansi wa, paɗ kun alkǝtˈyowun si. Thlǝ chim chǝ nafchǝ wunchi, paɗ thlǝ njirchǝ fee nggaˈan.11Nakanya, nggaˈan mitǝ fiˈyan tǝ kwichimnda. Pawaˈan kapech ndiˈchan wa. Nafchǝ ɓahaˈanda, tǝ paɗ wurchiyaˈan su wa.12Kǝrtǝt ˈyaˈan thlǝ sǝmndǝ ǝn kǝthlǝm thlǝ chi chaˈan ter kaˈan. Maa ˈyari fee nggaˈan kwal kaˈan kaɗ tǝ mbǝs ǝna. Maa tandǝ fǝraˈan ɓahta kǝrǝskaˈan.13Maa mbuˈ nafchǝ ǝnɗi nawak chǝ kǝ kit kǝ indi yaˈan, thlǝ nggǝman chaˈan tandǝ tǝ kafata. Paˈ kǝ ɓukuya, chok chamǝn kǝɗ nggǝmǝn nech kǝ chǝrǝfti heshi, ǝnɗi thlǝ naa chika wun wiɗekta.14Ngga yarechi ǝnɗa kǝthlǝm kǝ ɗǝfiwunchi kǝ har tǝ fata wa. Paɗ kǝthlǝm kǝ tǝɗani thlǝmat ˈyowun kǝthlǝm tǝ nowun kǝ wanchinchi fee yahti.15Chika ndech fee wa, fǝ chaˈanchi ˈyowunsi hur Kǝrǝsti fee thlǝ mbahǝn waktǝ fee shenganda, chinchiwun sǝ terchan wa. Kǝthlǝm ndaˈan chokin chǝ kǝ chinda kǝmɗiyowun hur Kǝrǝsti tǝmɗi ɓowun kwastǝ ndikta yi sǝkta.16Kǝthlǝm ndaˈan, nggǝt shiyowun nda chaˈam tǝ nenchi.17Kǝthlǝm ndaˈan nggǝt thlǝnowun Timoti thla nech kǝɗ waˈinchi. Thla yahti kaˈan, thlǝ chich teri Farta tǝ hwir arta. Nan kuɗu kowun natǝnchǝ ha hur Kǝristi Yesu. Natinchi ha thla thlǝ pǝɗech keˈke tǝ ǝnɗi thlǝ chaˈandi kaɗi chǝk ǝ ayi ǝ chika yen mǝt nggomndi fǝ fǝr kit cha.18Fowun nafchǝ hur wun thlaˈ inda tǝr chanda wa nggǝ ɓǝ kǝmɗiyowun wa wa?19Paɗ maa nggǝman Farta nii ɓat kǝmɗiyowun tolla wa. Kǝ ɗǝbani paɗ weˈti alkǝt mǝ nessi fǝ thlaˈ inchi ɗa, ngga ndikchiyanda ndak wa.20Kǝthlǝm ndik kutǝrakti Farta ngga ndiktǝ ǝ me wa, ndikta yi alkǝta.21Mǝtatǝwun har, kǝ ɓi kǝmɗiyowun tǝ teta wa, ndu hur yah raˈan tǝ hashas tǝ wandǝkaɗata wa?
The Seed Company