1Kanaanen ola meezetiboonna Isra7eele asaa paacanaw Goday Kanaanen ashshida asay haysata.2I hessa oothiday haysafe kase ola meezetiboonna Isra7eele yeletethaa ola hiilla tamaarsanaasa.3Hessatika ichashu Filisxeeme halaqata, Kanaaneta, Sidoonatanne Ba7aal-Armoona zumaape doomidi Hamaata gakanaw Libaanose zumaa bolla de7iya Hiweta.4Goday Muse baggara kase Isra7eele mayzatas immida kiita enti kiitetiyakonne kiitetonaako paacanaw enta kessonna aggis.5Yaatin, Isra7eele asay Kanaanetara, Hitetara, Amooretara, Parzetara, Hiwetaranne Yaabusetara issife de7idosona.6Enta macca nayta bantaw ekidosona; banta macca nayta enta adde naytas immidosona. Yaatidi enta xoossata goyinnidosona.
Gotoniyala
7Isra7eele asay Godaa sinthan iitabaa oothidosona. Enti Godaa banta Xoossaa dogidi, Ba7aalenne Asheera geetetiya xoossata goyinnidosona.8Hessa gisho, Godaa hanqoy Isra7eele asaa bolla eexis. Goday Masephexoome kawa Kushan-Rishataymi enta haarana mela aathidi immin, enti iyaw hospun laythi haaretidosona.9Shin Isra7eele asay Godaako waassida wode enta ashshiya, Kaaleba kaalo ishaa Qanaze na7aa Gotoniyala denthis.10Godaa Ayyaanay iya bolla wodhin, I Isra7eele bolla pirdeysa gidis. I olas keyida wode Goday Masephexoome kawa Kushan-Rishatayma iyaw aathidi immin xoonis.11Yaatin, biittay oytamu laythi wopu gidi de7is. Hessafe guye, Qanaze na7ay Gotoniyali hayqis.Naa7oda
12Isra7eele asay zaaridi Godaa sinthan iitabaa oothidosona. Hessa gisho, Goday Moo7abe kawoy Eglooni Isra7eele bolla wolqatanaada oothis.13Eglooni Amoonetanne Amaaleqata shiishidi Isra7eele asa oli xoonidi, Zamba katamaa Iyaarko oykis.14Yaatin, Isra7eele asay Moo7abe kawa Egloonas tammanne hospun laythi haaretidosona.15Shin Isra7eele asay Godaako waassida wode enta ashshiya, Biniyaame koche gidida Geera na7aa Naa7oda, haddirsa kushen ootheysa denthis. Isra7eele asay Naa7oda Moo7abe kawa Egloonako giirara kiittis.16Naa7odi nam7u baggara qaratida issi wadha mashshe giigisidi ushacha baggan ba ma7uwa garsan dancis.17Hessafe guye, daro orde gidida Moo7abe kawa Egloonas giira efidi immis.18Naa7odi giira kawas immidaape guye, giira tookidi bida asaa moyzis.19Shin Naa7odi Galgala matan de7iya masetida shuchata matape Egloonako guye simmi bidi, “Kawaw, ta new odiya issi xuuri de7ees” yaagis. Kawoy, “Si77i ga” yaagis. Iya naageysati ubbay kare keyidosona.20He wode kawoy pooqiya bolla issi kifiliyan barka uttidashin, Naa7odi iyako shiiqidi, “Xoossay new kiittidabay de7ees” yaagin, kawoy ba uttida bessaafe dendi eqis.21Naa7odi ba haddirsa kushiya yeddidi, ushacha bagga xeessan de7iya mashsha shoddidi, kawa uluwan dirgim oothis.22Mashshaa tuytey attonna ulo giddo gelidi, zokuwara kanthi keyis. Modhoy kammida gisho Naa7odi mashsha kawa uluwape shoddiboonna.23Hessafe guye, Naa7odi kare keyidi, kifiliya pengiya gordidi iya bolla qulpis.24Naa7odi bidaape guye aylleti yidi, pengey gordetidaysa be7idi, “Kawoy giddo kifiliyan sheeshas uttonna aggenna” yaagidi qopidosona.25Enti saletana gakanaw naagidosona. Shin kawoy pengiya dooyonna ixin, qulpe ekidi pengiya dooyidi, banta goday hayqidi, wuygen kundidaysa be7idosona.26Enti yan eqidi naagishin, Naa7odi kessi ekidi eeqa shuchata matara aadhidi Sa7iira baqatis.27I bidi derey dariya Efreema biitta gakida wode Isra7eele asay olas shiiqana mela moyze punnin, asay iya kaallidi duge wodhidosona.28I entako, “Tana kaallite; Goday hinte morketa, Moo7abeta hinte kushen aathidi immis” yaagis. Enti iya kaalli wodhidi, Yordaanose shaafa pinniya bessaa oykidosona. Moo7abe asape issi asika yaara aadhona mela teqidosona.29He wode Moo7abe asaape tammu mukulu gidiya dooretida mino olanchota wodhidosona; issi asika kessi ekibeenna.30He gallas Isra7eele asay Moo7abe asaa xoonidosona. Biittay hospun tammu laythi wopu gidi de7is.Samgaara
31Na7odaape guye, Anaata na7ay Samgaari dendidi, Filisxeeme asaape usupun xeetu asaa booru laagiya birata xam7an wodhidi Isra7eele asaa ashshis.