Doloha Bagga Kochati Simmidosona
1Hessafe guye, Iyyasuy Robeela, Gaadenne Minaase kochaafe baggaa xeegidi,2“Godaa aylley Musey hintena kiitida ubbaa polideta; qassi taw kiitetideta.3He ubban hachi gakanaw hinte ishata yeggibeeketa. Godaa, hinte Xoossaa kiitta ubbaa polideta.4Goday hinte Xoossay hintew caaqida qaalada, hinte ishata shempisis. Hessa gisho, Godaa aylley Musey hintew Yordaanose shaafape doloha baggan immida, laata biittan de7iya hinte soo soo simmite.5Godaa aylley Musey hintena kiitida higgiya minthidi naagite. Godaa hinte Xoossaa siiqite. Iya ogiyape deshopite; iya kiita polite. Iyara shiphi gidi de7ite; hinte kumetha wozanapenne kumetha shempuwafe iyaw oothite” yaagis.6Iyyasuy enta anjidi yeddin enti banta soo simmidosona.7Iyyasuy, Minaase kochaa baggaas Baasanen laata biitta immis. Attida bagga kochaas qassi Yordaanosepe wuloha baggan laata biitta immis. Iyyasuy enta anjidi moyzishe,8Hinte, “Daro mehe, bira, worqa, naase, biratanne daro ma7o ekidi hinte soo simmana haneeta. Hessa gisho, hinte morketape di77idaysa hinte ishatara shaaketite” yaagis.9Robeela, Gaadenne Minaase kochaa baggay banta laata biitta simmidosona. Enti, Goday Muse baggara kiittin laattida Galada biitta, Kanaane biittan, Seelon de7iya Isra7eele asaape shaaketidi bidosona.Doloha Bagga Yarsho Bessaa
10Robeela, Gaadenne Minaase kochaafe baggay Yordaanose matan Kanaane biittan de7iya Galiloota yidi, shaafa matan malaalsiya gita yarsho bessi keexidosona.11Robeela, Gaadenne Minaase kochaafe baggay Yordaanose matan, Galilootan, Kanaane biittan yarsho bessi keexidaysa attida Isra7eele asay si7idosona.12Isra7eele asay hessa si7idi, enta olanaw Seelon shiiqidosona.13Hessafe sinthe Isra7eele asay, kahiniya Alaazara na7aa Pinihaasa, Galadan de7iya Robeela, Gaadenne Minaase kochaafe baggatako yeddidosona.14Issi issi kochay ba soo halaqatape issi issi ase dooridi, tammu asi Pinihaasara yeddidosona.15Enti Robeela, Gaadenne Minaase kochaafe baggay Galada bidi,16“Godaa asay, ‘Isra7eele Xoossaa bolla de7iya hinte ammanuwa ayis paciseetii? Hintew yarsho bessi keexidi, Godaape haakideta. Iya bolla ayis makallidetii?17Pe7ooran nu oothida nagaray gidennee? Godaa asaa bolla boshi wodhis; hachi gakanaw nuuni he nagaraape geeyibooko.18Godaa bolla hachi hinte zoko zaarideta. Hachi hinte iya bolla zoko zaariko wonto I kumetha Isra7eele asaa hanqana.19Hinte de7iya biittay tunidaba gidiko, Godaa dunkaaney de7iya biitta, haa nuuko yidi, nu laata shaaketite. Shin Godaa, nu Xoossaa yarsho bessaafe hara yarsho bessi keexidi Xoossaa bolla woyko nu bolla makallofite.20Zaara na7ay Akaani digetidaba ekidi, nagara oothida gisho, kumetha Isra7eele asaa bolla Godaa hanqoy wodhibeenneyee? Iya nagara gaason hayqiday iya xalaala gidenna’ ” yaagidosona.21Yaatin Robeela, Gaadenne Minaase kochaafe baggay haysada yaagidi zaaridosona.22“Godaa xalaali Xoosse! Godaa xalaali Xoosse! Nuuni haysa ayis oothidaako I erees; hinteka erana mela nu koyoos. Nuuni Godaa bolla makallidabaanne kiitetonna ixidaba gidiko, hachi nuna paxa wothofite.23Nu Godaas kiitetonna ixidi, xuussa yarshuwa, katha yarshuwanne issifetetha yarshuwa yarshanaw yarsho bessi keexidaba gidiko, Goday nuna hanqo.24Nu hessa qopidi keexibooko. Nuuni yarsho bessi keexiday, wonto hinte nayti, nu naytako, ‘Hintew Godaa, Isra7eele Xoossara ay gahetethi de7ii?25Goday nu giddoninne Robeelanne Gaade kochaa giddon Yordaanose shaafa zawa wothis. Hessa gisho, Godaara hintew gahetethi baawa’ gandeshsha gidi yayyida gishosa. Qassi hinte kochay nu kochaa Godaa goyinno diggonna aggokona” yaagidi qopida.26“Nu yarsho bessi keexiday hessasa. Xuussa woyko hara yarsho yarshanaasa gidenna.27Nuuni yarsho bessi keexiday, xuussa, issifetethanne hara yarshuwa yarshishe de7idaysasinne Godaa dunkaaniya sinthan goyinnishe de7idaysas, nu giddoninne hinte giddon qassi kaalliya yeleta giddon hessi marka gidana melasa. Hessi hinte nayti nu naytako, ‘Hintew Godaara ay gahetethika baawa’ yaagonna mela maadana.28Enti wodepe nuuko woyko nu kochaako hessada giiko, nu nayti zaaridi, ‘Nu aawati Godaas keexida yarsho bessa leemisuwa haysa be7ite. Hessi hinte giddoninne nu giddon marka gidana melasafe attishin, xuussa woyko hara yarsho yarshanaasa gidenna’ gaanaw danda7ana melasa.29Nu Godaa bolla makallanaysi nuupe haako. Godaa nu Xoossaa dunkaaniya sinthan de7iya yarsho bessaafe haraa xuussa, kathaanne hara yarsho bessi keexidi Xoossaa goyinno aggoko” yaagidi zaaridosona.30Kahiney Pinihaasinne iyara de7iya Isra7eele halaqati, Robeela, Gaadenne Minaase kochaafe baggay odidaysa si7idi, ufaytidosona.31Kahiniya Alaazara na7ay Pinihaasi, Robeela, Gaadenne Minaase kochatako, “Goday nuura de7eysa nu hachi erida. Hinte Godaa bolla makallibeeketa. Hinte Isra7eele asaa Godaa pirdaafe ashshideta” yaagis.32Kahiniya Alaazara na7ay Pinihaasinne iyara de7iya halaqati Galadan de7iya Robeelanne Gaade kochaa matape Kanaanen de7iya Isra7eele asaako simmidi, hanidaba entaw odidosona.33Isra7eele asay ufaytidi, Xoossaa galatidosona. Hessafe guye, Robeelanne Gaade asati de7iya biitta olidi dhaysanaw odetibookona.34Robeelanne Gaade kochay, “Ha yarsho bessay Godaa xalaali Xoossaa gideysas nuus marka” yaagidi, he yarsho bessa “Marka” gidi sunthidosona.