Iyyasu Maxaafa17gof_ltw
1Yoosefa bayra na7aa Minaase kochaas imetida laata biittay kaallidi de7eysa; Galada aaway Makiri Minaase bayra na7a. Makiri mino olancho gidida gisho, Galadanne Baasane biitta ekidosona.2Yordaanose shaafape wuloha baggara de7iya biittay hanko attida Minaase kochaas, Abi7ezeras, Heleqas, Asir7eelas, Seekemas, Hefeerasinne Shamida7as imetis. Haysati Yoosefa na7aa Minaase kochata.3Hefeera na7aa Selophaada, Galada na7aa Hefeera, Makira na7aa Galada, Minaase na7aa Makira. Selophaadas macca na7ape attishin, adde na7i baawa. He macca nayta sunthay Mahilo, No7o, Hoglo, Milkonne Tirxo.4Enti kahiniya Alaazarako, Nawe na7aa Iyyasukonne deriya cimatako bidi, “Nu dabbotada nuuska laata biitta immana mela Goday Muse kiittis” yaagidosona. Yaatin, Goday kiitidaysada enta dabbotada entawuka laata biitta immis.5Minaase kochati Yordaanose shaafape doloha baggan de7iya Galadanne Baasane bolla gujidi tammu biittata saaman ekidosona.6Hessa gisho, Minaase kochaafe macca nayti adde naytara issife laata biitta shaaketidosona. Galada biittay attida Minaase kochaas gidis.7Minaase kochaa biitta zaway Aseerape bidi, Seekemape doloha baggan de7iya Mikmaatata gakees. He zaway yaape kanthidi, dugeha baggan Antapuhan de7iya deriya gujees.8Tapuha biittay Minaase kochaasa, shin Minaase zawan de7iya Tapuha katamay Efreema kochaasa.9Qassi he zaway yaape bidi, Qaana shaafan zawatees. Minaase katamata giddon Efreema katamatika de7oosona. Shin Minaase zaway Qaana shaafape pudeha baggara bidi Medetiraane abban eqees.10Shaafape dugeha baggan de7iya biittay Efreemasa; qassi pudeha baggan de7iya biittay Minaasesa. Minaase biitta zaway Medetiraane abba gakees. Iyaw pudeha baggara Aseeri, qassi doloha baggara Yisakoori zawatees.11Yisakooranne Aseera biittata giddon, Beet-Saana, Yiblaama, Doora, Endoora, Tanakanne Magido geetetiya katamatinne gutati Minaasesa.12Shin Minaase kochati he katamatan de7iya asata kessidi katamata oykanaw danda7ibookona. Hessa gisho, Kanaaneti yan duussi oykidosona.13Isra7eele asay wolqan minnikoka, Kanaaneti wolqa ooso oothana mela un7ethidosonape attishin, enta kumethi gooddidi kessibookona.14Yoosefa kochay, “Goday nuna anjidi, darsis; yaatin, ayis issi saama xalaala laata biitta nuus immadii?” yaagidi Iyyasu oychidosona.15Iyyasuy zaaridi, “Hinte daro gidiko, derey dariya Efreema biittay hintew guuxidaba gidiko, Parzetinne Raafaymeti de7iya biitta bidi wora qeexite” yaagis.16Yoosefa kochay, “He derey dariya biittayka nuus gidenna. Qassi Beet-Saana katamaninne iya gutan de7eysatasinne Izra7eele zangaaran de7iya Kanaanetas birata para gaareti de7oosona” yaagidosona.17Yaatin Iyyasuy Yoosefa koche gidida Efreemanne Minaase, “Hinte daronne wolqaama; hintew issi saama xalaala gidanaw bessenna.18Hessa gisho, derey dariya biittay hintebaa gidana. He gezzey wora gidikoka qeexidi, gaxa gakanaw hintebaa oothite. Kanaanetas birata para gaareti de7ikoka, qassi enti ay mino gidikoka hinte enta gooddidi kessanaw danda7eeta” yaagis.