Sedeqiyaasas Odetida Tinbite
1Babiloone kawoy Nabukadanaxoori, iya olanchoti ubbaynne I haariya kawotethatan de7iya asa ubbay, Yerusalaamenne Yerusalaame yuushuwan de7iya katamata ubbaa oliya wode, ha qaalay Godaape Ermiyaasako yis:2Goday Isra7eele Xoossay haysada yaagis; “Bada Yihuda kawa Sedeqiyaasako haysada yaaga: ‘Taani ha katamaa Babiloone kawa kushen aathada immana; I katamaa taman xuuggana.3Neeni iya kushepe kessa ekaka; neeni oyketana; iyaw aadhada imetana. Neeni ne ayfen Babiloone kawa be7ana; ika neera odetana. Neeni Babiloone biitta baana’ yaagees Goday.4“Gidoshin, Yihuda kawaw Sedeqiyaasa, Goday giyaba si7a. Neeni olan hayqaka.5Ne saro hayqana. Neepe kase de7ida kawota bonchuwas, ne mayzatas ixaane cuyisidaysada, asay ne bonchuwas ixaane cuyisana. Woo! nu kawaw, yaagidi new yeekana. Taani Goday haysa odayis” yaagees.6Hessafe guye, nabey Ermiyaasi ha tinbitiya Yihuda kawa Sedeqiyaasas Yerusalaamen odis.7He wode Babiloone olanchoti Yerusalaame katamaanne Yihudan attida Laakisonne Azeeqa katamata olidosona. Yihudan attida gimbetida katamati enta xalaala.Aylletethafe La77a Kessi
8Kawoy Sedeqiyaasi aylleta la77a kessiya awaajuwa awaajanaw Yerusalaamen de7iya asa ubbaara caaqidaape guye, Godaa qaalay Ermiyaasako haysada yaagidi yis:9He awaajoy, issi issi Ibraawe asi addenne macca aylle aylletethafe la77a kesso. Oonika Ayhude asi gidida ba ishaa aylle oothofo.10Hessa gisho, asaynne halaqati ubbay caaqida caaquwan banta addenne macca aylleta aylletethafe la77a kessanawunne zaaridi aylletethan haaronna agganaw giigidi enta aylletethafe la77a kessidosona.11Shin enti banta qofaa laammidi, aylletethafe la77a kessida banta addenne macca aylleta zaaridi haaridosona.12Hessafe guye, Godaa qaalay Ermiyaasako yaagis.13Goday, Isra7eele Xoossay haysada yaagees: “Taani hinte mayzata Gibxefe, aylletetha biittafe kessida wode entara haysada yaagada caaqas.14He caaquwa maaran, ‘Ibraawe aylley de7iya ase ubbay, aylleta usupun laythi oosisidi, laapuntha laythan aylletethafe kessidi yeddite’ yaagada kiittas. Shin hinte mayzati ta odiyaba si7onna ixidosona; taw kiitetibookona.15Hinteka mata wodepe kase hinte nagaraape simmidi, aylleta la77a kessanaw awaajideta; ta sinthan suureba oothideta. Qassi hessa oothanaw ta sinthan, ta sunthay xeegetiya ta keethan caaqideta.16Shin hinte, hinte qofaa laammidi, ta sunthaa tunisideta. Enti koyida bessaa baana mela la77a kessida addenne macca aylleta zaaridi haarideta.”17Hessa gisho, Goday, “Hinte taw kiitetonna ixidi, hinte ishaa woyko hinte shooruwa aylletethafe la77a kessiya awaajuwa awaajibeketa. Hinte bolla oli, boshinne koshi keyana mela ta awaajayis. Ta hintena sa7a bolla de7iya kawotethatas dagama oothana.18Ta caaquwa menthida asaa, ta sinthan caaquwa naagonna ixida asaa, shukidi, nam7u bessan shaakidi, iya giddora aadhida maraa mela ta enta oothana.19He asay Yihuda halaqata, Yerusalaame halaqata, biitta ayseysata, kahinetanne nam7u bessan shaakida maraa ashuwa giddora aadhida asa ubbaa.20Ta enta, enta morketa kusheninne enta wodhanaw koyiya asa kushen aathada immana; enta ahay salo kafotasinne sa7a do7atas kathi gidana.21“Taani Yihuda kawa Sedeqiyaasanne iya halaqata, enta morketa kushen, enta wodhanaw koyeyisata kusheninne hintena oleysa aggida Babiloone olanchota kushen aathada immana.22Taani Babiloone olanchota kiittin; enti ha katama simmana. Enti ha katamaa olana, di7ananne taman xuuggana. Yihudan de7iya katamata asi doonna baysa bessi oothana” yaagees Goday.