Isra7eele asaa simuwa
1Godaape Ermiyaasako yida qaalay haysa.2“Ermiyaasa, ta new odida qaala ubbaa xaatha maxaafan xaafa.3Taani ta asaa Isra7eelenne Yihuda di7ope guye zaariya wodey matatis. Enta mayzatas immida biitta enta zaarana; enti iya laattana” yaagees Goday Isra7eele Xoossay.4Goday Isra7eelebanne Yihudaba odida qaalay haysa.5“Ta yashshanne dagama waaso si7as; dagama waasope attishin, saro waaso gidenna.6Ane oychite; be7ite; addey na7a yelanaw danda7ii? Yaatin, adde ubbay iqethi oykida maccasada, ba kushen ba uluwa oykidashin ta be7eysi aybee? Asa ubbaa som7oy ayis kareexidee?7He gallasay ay mela un7ethiya gallasee? Hessa mela gallas baawa. He gallasay Yayqooba zerethaas un7a wode gidana. Gidoshin enti he ubbaafe attana” yaagees Goday.8Ubbaafe Wolqaama Goday haysada yaagees: “He gallasan ta enta gannaafe qambara menthana; enti qashetida santhalaata duuthana. Hessafe guye, allaga biitta asay enta aylleyena.9Shin enti Godaas, banta Xoossaas, oothana; ta entaw denthiya kawa Dawitas haaretana.10“Hessa gisho, ta aylleto, Yayqooba kochato, yayyofite. Hinteno, Isra7eeleto, dagammopite. Hinte haaho bessan de7ishin, ta hintena ashshana; hinte kochata enti di7etida biittafe zaarana. Yayqooba zareti simmidi, saro daana; enta oonika yashisenna.11Ta hintena ashshanaw hintera de7ayis. Hintena laallida kawotethata ubbaa dhaysana; shin hintena dhaysike. Ta hintena xillo pirdan seerana; shin seeronna hintena coo yeddike” yaagees Goday.12“Hinte meqoy kooletenna; hinte madunthay paxenna.13Hintew mootetey baawa; hinte madunthaas dhaley deenna; hintew paxoy baawa.14Hinte doseysati hintena dogidosona; enti hintebaa wuda gookona. Hinte balaynne hinte nagaray daro gidiya gisho, ta hintena morkeda shocas; qadhey bayna seeras.15Paxoy bentonna hinte hargiyasinne hinte madunthaas ayis waassetii? Hinte balaynne hinte nagaray darida gisho ta haysa hinte bolla oothas.16“Shin hintena gaashidi mida ubbay meetetana; hinte morketi ubbay di7etana. Hintena bonqidaysati bonqetana; hintebaa ekidaysati eketana.17Enti, ‘Oonika koyonnanne boretida Xiyoone’ gidoosona; shin ta hintew keehana; hinte madunthaa pathana” yaagees Goday.18“Yayqooba kochata di7etida bessaafe guye zaarada, keexana; enti de7iya bessaasika qadhetana. Yerusalaame katamay kase ba laaletida bessan, kawo gadhoy kase ba bessan simmidi keexetana.19Yan de7iya asa ubbay galata mazmurenne ufaysa yethi yexana. Ta enta taybuwa darisanape attishin, guuxenna. Taani enta bonchetida dere oothana; enti kawuyokona.20Enta nayti beni duussaada daana; enta maabaray ta sinthan minnidi daana. Enta un7ethiya ubbaa ta seerana.21Enta kaalethanay enta giddofe keyana; enta haaranay enta giddofe dendana. Taani iya taw mata ehana; I taako shiiqana. Taani iya shiishonna de7ishin, minnidi taako shiiqanaw danda7ey oonee?” yaagees Goday.22Hessa gisho, hinte ta ase gidana; taka hinte Xoosse gidana.23Heko, Godaa hanqoy goteda dendees; shireti shireti wodhishe iitata huuphen wodhana.24Goday ba wozanaa qofaa wursidi polana gakanaw eexiya iya hanqoy guye simmenna. Hessa sinthafe yaana wodetan hinte akeekana.