1Muse higgey yaanaw de7iya lo77obatas kuyape attishin, ba huuphen waanna gidenna. Hessa gisho, laythan laythan pacey bayna yarshetiya yarshoy goyinnanaw shiiqiya asaa polo oothanaw danda7enna.2Higgey enta polo oothanaw danda7idaba gidiyako enti yarsho yarsheysa agganashin. Qassi goyinnanaw shiiqiya asay banta nagaraape geeyana; enta kahayka entana bala gidi mootenna.3Shin he yarshoti laythan laythan nagara qofisoosona.4Ayis giiko, korma suuthinne deesha suuthi nagara digganaw danda7enna.5Hessa gisho, Kiristoosi ha alamiya yida wode haysada yaagis:“Neeni yarshonne imo koyabaaka;shin taw asho giigisadasa.6Neeni xuussa yarshoninnenagara yarshon ufaytabaaka.7He wode, ‘Ta gisho maxaafan xaafetidaysada,Godaw, taani ne sheniya oothanaw yas’ yaagas”yaagis.8Yarshoy yarshetana mela higgey kiittiyaba gidikoka, Kiristoosi koyro, “Neeni yarshonne imo, xuussa yarshonne nagara yarsho koyabaaka; entan ufaytabaaka” yaagis.9Kaallidika I, “Godaw, Heko taani ne sheniya oothanaw yas” yaagis. Hessa gisho, Kiristoosi nam7anthuwa essanaw koyroysa shaaris.10Yesuus Kiristoosi Xoossaa sheniya oothidi, zaarethonna ogen issi toho ba ashuwa yarshida gisho nuuni geeyida.11Kahine ubbay, nagara digganaw danda7onna he yarshota gallas gallas yarshishe eqidi ba oosuwa oothees.12Shin Kiristoosi ubba wodes gidiya issi nagara yarshuwa yarshidi, Xoossaafe ushacha baggan uttis.13He wodiyape doomidi iya morketi iya tohoy yedhiyabaa oothana gakanaw naagees.14I zaarethonna ogen issi toho bana yarshida yarshuwan geeshshata merinaw polo oothis.15Qassi Geeshsha Ayyaanay nuus haysa markatees. Koyro haysada yaagis:16“He gallasatape guye,taani entara caaqiya caaqoy haysa:Taani ta higgiya enta qofan wothana;enta wozanan xaafana”yaagees.17Kaallidika,“Taani enta nagaraanneenta iita oosuwa zaara qopike”yaagees.18Hiza, nagari atto geetetidaape guye nagaras yarshetiya yarsho koshshenna.
Ane Xoossako Shiiqoos
19Hiza, ta ishato, nuuni Yesuusa suuthaa baggara Ubbaafe Geeshsha Bessaa gelanaw nuus minotethi de7ees.20Nu gelanay Kiristoosi ba magarajuwa, hessika ba ashuwa baggara nuus dooyida oorathinne de7o gidida ogiyana.21Nuus Xoossa Keetha bolla shuumetida gita kahine halaqay de7ees.22Nuuni iita kahape geeyanaw nu wozanaa wurxetidi, nu asatethaa xillo haathan meecetidi, suure wozananinne polo ammanon Xoossaako shiiqoos.23Nuus ufaysa qaala immida Xoossay ammanetidaysa gidiya gisho nu markatiya ufaysaa ushachi haddirsi goonna minthidi oykoos.24Issoy issuwa siiqosinne lo77o oosos waati denthethaneko ane qopoos.25Issoti issoti meeze oothidi shiiqeysa aggidaysada nuuni issife shiiqeysa aggoko. Shin Godaa gallasay matatidaysa hinte be7iya gisho hessa kaseysafe aathidi oothite.26Nuuni tuma eratethaa ekidaape guye erishe nagara oothiko, hizape nu nagaraa gisho yashetana yarshoy baawa.27Shin hiza attiday yashshiya pirdaanne Xoossaa morketa xuugganaw giigida wolqaama tama.28Muse higgiya kiitetonna ixida oonika nam7u woyko heedzu asi iya bolla markatiko qadhey baynashin hayqees.29Yaatin, Xoossaa Na7aa kadhida uray, bana geeshshida Xoossaa caaqo suuthaa tunabaada qopida uray, qassi aadho keehatetha Ayyaana cayida uray, ay mela iita pirdaa ekanaw bessiyako ane qopite.30Hiza, “Halo kesoy tabaa, ta kushe zaarana” gidaysa nu eroos. Qassika, “Goday ba asa pirdana” yaagis.31De7o Xoossaa kushen kundethi daro yashshees.32Hintew Xoossaa poo7oy poo7idaape guye hinte daro waayen, gita baaxen gencida beni wodiya qopite.33Issi issi toho hinte asa sinthan cayetideta; goodetideta; issi issi toho hessa mela waayey gakida asaara issife waayideta.34Qashon de7iya asaaska qadhetideta. Hintew lo77onne dhayonna shaloy salon de7eysa hinte erida gisho hinte shaloy bonqetiya wode ufaysan danda7ideta.35Hessa gisho, gita woytoy de7iya hinte minotethaa yeggofite.36Xoossaa sheniya polidi, I hintew immana gida ufaysaa ekana gakanaw gencanaw koshshees.37Hiza, Geeshsha Maxaafan,“I, yaana gidaysi yaana; gam7enna.38Shin ta xilloy, tanan ammanetidi daana;oonika guye simmiko tana ufaysenna”yaagees.39Nuuni ammanidi attiya asaa baggafe attishin, guye simmidi dhayiya asaa bagga gidoko.