Isra7eele Henthanchota
1Godaa qaalay haysada yaagidi taako yis.2“Asa na7aw, Isra7eele henthanchota bolla haysada yaagada tinbite oda: hinteno, hintena heemmiya Isra7eele henthanchoto, hintena ayye! Hinte dorsata heemmanaw bessennee?3Enta maatha uyeeta; enta ikisiyape dadetida suufiya ma77eeta; entafe modhuwa shukidi meeta; shin dorsata suure heemmeketa.4Daaburidaysata gashtisibeketa; hargidaysata pathibeeketa; meqidaysata koolibeeketa; betidaysata zaaribeeketa; dhaydaysata koybeketa. Hessa aggidi enta wolqan un7ethidi haarideta.5Dorsati ubbay heemmiya asi dhayin laaletidosona; bazzo do7atas kathi gididosona.6Ta dorsati laaletidosona; enti zumata bollanne dereta bolla toylatidosona. Biitta gaxa gakanaw laaletidosona; shin enta xomoosey woyko koyey baawa” yaagees Ubbaa Haariya Goday.7Hessa gisho, hinteno, henthanchoto, Godaa qaala si7ite.8“Taani ta de7uwan caaqayis: Ta dorsata heemmiya asi dhayin, ta dorsati oyketidi, bazzo do7atas kathi gididosona. Ta henthanchoti ta dorsata koyiboona gishonne enti ta dorsata heemmonna aggidi, bantana heemmida gisho,9hinteno, henthanchoto, Godaa qaala si7ite.10Ta hintew, henthanchohotas morke gidana; ta dorsata taani hintefe ekana; ta hintena nam7antho entaw henthancho oothike. Hizape guye hinte hintena heemmishe de7eketa. Ta dorsata ta hintefe ekana; hizape enti hintew kathi gidokona” yaagees Ubbaa Haariya Goday.11“Taani ta huuphen ta dorsata xomoosananne koyana.12Henthanchoy ba dorsatape dhayin koyeysada, taani ta dorsata koyana; shaarinne dhumi goozida gallas enti dhayida bessaafe ta enta shiishana.13Taani kawotethata giddofenne hara biitta ubbaafe shiishanada, entana, enta biitta ehana. Isra7eele deretan, pultotaninne asay de7iya bessatan enta heemmana.14Taani enta lo77o qooron heemmana; Isra7eele zumati enti heemetiya besse gidana. Enti lo77o qooroy de7iya Isra7eele zumata bolla hemetananne allatana.15Taani ta huuphen ta dorsata heemmananne shempisana.16Taani dhayidaysa koyana; betidaysa zaarana; meqidaysa koolana; hargidaysa pathana. Shin taani suure pirdiya henthancho gidiya gisho genen modhidaysanne minnidaysa dhaysana” yaagees Ubbaa Haariya Goday.17Hinteno, ta dorsato, “Hintena ubbaa ta pirdana; keeha iitaape, dorsaa deeshape ta shaakana.18Hinte lo77o qooron heemmeteysi gidonna ixin, attida maata tohon yedheetii? Qassi hinte xillo haathi uyeysi gidonna ixin, attida haatha tohon buulloyetii?19Ta dorsati hinte tohon yedhida maata maanawunne hinte tohon buulloyida haatha uyanaw bessii?” yaagees Ubbaa Haariya Goday.20Hessa gisho, Ubbaa Haariya Goday entako haysada yaagees: “Modho mehiya giddoninne gilqa mehiya giddon ta ta huuphen pirdana.21Daaburanchota, hinte, hinte miyanne hinte hashiyan sugiya gishonne gaxa kessana gakanaw hinte enta hinte kaciyan qayciya gisho,22taani ta dorsata ashshana. Hizape guye oonika enta oykenna; ta keeha dorsata giddoninne iita dorsata giddon ta pirdana.23Ta enta bolla issi henthanchuwa, ta aylliya Dawita shuumana; I enta heemmananne entaw henthancho gidana.24Hizape guye ta Goday enta Xoossaa gidana; ta aylley Dawiti enta giddon halaqa gidana” yaagees Goday.25“Ta entara sarotetha caaqo caaqana; iita do7ata taani biittafe diggana; ta dorsati bazzon saro daana; wora garsan hirgi bayna allatana.26Ta entanne ta zuma yuushon de7iya bessata anjana. Entaw koshshiya ira woden woden immana; he iray entaw anjo gidana.27Gaden de7iya mithati ayfana; biittay kathi dolisana; ubbay banta biittan saro daana. Ta enta qambara menthada, enta aylle oothidi haaridaysata kushepe kessiya wode taani Godaa gideysa enti erana.28Hara kawotethati enta bonqokona; biittan de7iya do7ati enta mookonna; aykoyka daganthonna enti saro daana.29Ta entaw aradda biitta immana; enti zaaridi koshan wurokona; woyko hara kawotethatas cashshas attokona.30He wode enti taani Goday, enta Xoossay entara de7eysanne Isra7eele asay ta ase gideysa enti erana.31Hinteno, Isra7eele asaw, hinte ta wude; ta qooron miya ta wudiya; hinte ta ase, taani hinte Xoossaa” yaagees Ubbaa Haariya Goday.