Gita Kiita
1Hinte laattanaw biya biittan hinte oothana mela ta hintena tamaarsana mela Goday, hinte Xoossay tana kiitida kiitay, awaajoynne higgey haysa.2Ne laythay aduqana mela ne, ne naytinne ne nayta nayite Godaa ne Xoossaa yayya; ta hachi new immiya Godaa awaajiyanne higgiya ne laytha ubban naaga.3Neno, Isra7eele si7a; ubbabay new injetana melanne Goday ne aawata Xoossay, new gidaysada maathinne eessi goggiya biittan ne darana mela ha higgeta si7a; minthada naaga.4Neno, Isra7eele si7a; Goday nu Xoossay issi Xoossi.5Ne Godaa, ne Xoossaa ne kumetha wozanaape, ne kumetha shempuwafenne ne kumetha wolqaafe dosa.6Hachi ta nena kiittiya ha kiitaa ne wozanan wotha.7Enta neeni ne nayta tamaarsa; neeni ne son uttiya wode, oge hemetiya wode, zin7iya wodenne dendiya wode entaba haasaya.8Malla oothada ne kushen enta qacha; qassi ne som7on mallada wotha.9Ne penge zizgeta bollanne ne dirsa pengiya bolla enta xaafa.10Goday, ne Xoossay new immana gidi ne aawatas Abrahaames, Yisaaqasinne Yayqoobas caaqida, ne keexaboonna gitanne lo77o katamati kumida biitta new immana.11Neeni shiishaboona duretethan kumida keethata, ne bookaboona haatha ollata, ne tokaboonna woynenne shamaho new immiya wode, neeni mada kallida wode,12nena Gibxe aylletetha biittafe kessida, Godaa dogonna mela naageta.13Godaa, ne Xoossaa yayya; iya xalaala goyinna; iya sunthan caaqa.14Ne yuushon de7iya asay goyinniya hara xoossata goyinnofa.15Ne giddon de7iya Goday, ne Xoossay qanaatiya Xoossu. Iya hanqoy ne bolla eexana; I nena biitta bollafe pitidi dhaysana.16Masahan hinte iya paacidaysada Godaa hinte Xoossaa paacopite.17Goday, hinte Xoossay hintena kiitida iya kiita, iya wogaanne iya awaajuwa minthidi naagite.18New ubbabay injetana mela Godaa sinthan ne surebaanne lo77oba ootha. Hessa oothiko, new immanaw Goday ne aawatas caaqida, he lo77o biitta ne laattana.19Goday gidaysada neeni, ne morketa ubbaa ne sinthafe gooddana.20Wodepe ne nayti, “Goday, nu Xoossay hintena kiitida ha wogaa, awaajiyanne higgiya birshethay aybee?” yaagidi hintena oychiya wode,21ne entaw haysada yaagada zaarana; “Nuuni Gibxe biittan Gibxe kawa aylleta, shin Goday ba mino kushiyan nuna Gibxefe kessis.22Goday nu xeellishin, Gibxe biitta bolla, Gibxe kawa bollanne iya shuumata ubbaa bolla gitanne yashshiya malaatatanne malaalsiyabata oothis.23Shin I nu mayzas immana gidi caaqida biitta nuus immanaw nuna Gibxefe kessis.24Yaatidi hachi hinte be7eysada nuus ubba wode lo77o gidana melanne nuuni de7on daana mela, Goday, ha awaajota ubbaa nuni naagana melanne Godaas nu Xoossaas yayyana mela kiittis.25I nuna kiittidaysada, Godaa, nu Xoossaa sinthan ha kiita ubbaa minthidi naagiko, hessi nuus xillotethi gidana” yaagite.