1Godato, hintewuka qassi salon Goday de7eysa eridi, hinte aylletas xillotethaninne issuwa issuwafe shaakonna koshshiyaba oothite.2Xoossaa barkidi galatishe qanxonna woossite.3Xoossay ba qaalas penge dooyana melanne taani hessa gaason qashon de7iya Kiristoosa xuuraa awaajana mela nuuska woossite.4Qassi taka besseysada qaala qoncisada odana mela taw Xoossaa woossite.5Injetiya wode ubbaa go7etishe ammanonna asaa matan cincatethan de7ite.6Hinte asa ubbaas koshshiya zaaro imo erana mela hinte oday ubba wode aadho keehatethan kumidaysanne maxineda mal7iyabaa gidanaw bessees.
Sarotho
7Nu siiqo ishay Tikiqoosi, taara issife Godaa oosuwan aylle gidida, ammanetiya oosanchoy, ta de7uwabaa hintew odana.8Taani iya hinteko kiittiday, nu waanidi de7iyako hintew odidi hintena minthethana melasa.9Anasmoosi, ammanetiya siiqo ishay, hinte baggay, iyara hinteko bees. Enti haysan haniyaba ubbaa hintew odana.10Taara qashetida Arisxirokoosinne Barnabaasa ishaa na7ay Marqoosi, hintena saro yaagosona. Ta hintew kase odidaysada Marqoosi hinteko biiko iya mokite.11Yesuusa geetetiya Yasxoosi hintena saro saro yaagees. Xoossaa kawotethaa gisho taara oothiya asata giddofe Ayhude gididaysati ha heedzata; enti tana daro minthethidosona.12Hinte baggay, Kiristoos Yesuusa aylley, Ephafiri hintena saro saro yaagees. I hinte Xoossaa sinthan minnidi eqanaadanne Xoossaa sheniya eridi polana mela ubba wode Xoossaa hinte gisho woossees.13I hinte gishonne Loodoqeninne Hirapolisa kataman de7iya asaa gisho daro daaburidaysa ta markatayis.14Nu siiqo ishay dottorey Luqaasinne Deemasi, hintena saro saro yaagosona.15Loodoqen de7iya nu ishatas, Nimfaasinne I keethan shiiqiya asaas nu sarothuwa odite.16Ha dabdaabiya hinte nabbabidaape guye, Loodoqe woosa keethan nabbabisite. Hinteka Loodoqe woosa keethay hintew yeddiya dabdaabiya nabbabite.17Qassi Arkiphaasa, “Goday new immida oosuwa polanaysa dogopa” yaagidi qofisite.18Taani, Phawuloosi, ha sarothuwa ta kushen xaafas. Ta qashuwa qopite. Xoossaa aadho keehatethay hintera gido.