Mikiyaasi Akaabas Odida Tinbite
1Iyosaafexi daro duretethinne boncho demmidaape guye Akaabara bollotis.2Guutha laythafe guye Iyosaafexi Akaaba be7anaw Samaare bis. Akaabi iyawunne iyara de7iya asaas daro dorsinne booru shukis. Yaatidi Iyosaafexa Galadan de7iya Raamota olanaw baara baana mela maqis.3Isra7eele kawoy Akaabi Yihuda kawa Iyosaafexako, “Galadan de7iya Raamota olanaw taara baanee?” yaagidi oychis. Iyosaafexi, “Ee, ta neera baana; ta olanchoti ne olanchota; nu neera baana” yaagis.4Iyosaafexi Isra7eele kawako, “Gidoshin, ne koyrottada Godaa oycha” yaagis.5Isra7eele kawoy oyddu xeetu nabeta shiishidi, “Ta Galadan de7iya Raamota olanaw booye boopo?” yaagidi oychis. Enti, “Ba; Xoossay ne kushen aathidi immana” yaagidosona.6Shin Iyosaafexi, “Nu Godaa oychanaw danda7iya hara nabey haysan baawee?” yaagis.7Isra7eele kawoy Iyosaafexako, “Nu iya baggara Godaa oychanaw danda7iya hara nabey Yimila na7ay Mikiyaasi de7ees. Shin I ubba wode taw iitabaa odeesipe attishin, lo77oba odi eronna gisho ta iya dosike” yaagis. Iyosaafexi, “Kawoy haysada gaanaw bessenna” yaagis.8Isra7eele kawoy ba moorinatape issuwa xeegidi, “Yimila na7aa Mikiyaasa elle ekada ya” yaagis.9Isra7eele kawoynne Yihuda kawoy Iyosaafexi kawo ma7o ma7idi, Samaare katamaa geliya pengen banta araatan uttin nabeti ubbay enta sinthan tinbite odoosona.10Entafe issoy, Kin7ana na7ay Sedeqiyaasi biratape kaceta giigisidi Akaabako, “Goday, ‘Sooreti dhayana gakanaw ne enta ha kacetan qaycana’ yaagees” yaagis.11Hara nabeti ubbay, “Goday Raamota ne kushen aathidi immana gisho ba; olada xoona” yaagidosona.12Mikiyaasa xeeganaw kiitetidi bida uray, “Heko, hara nabeti ubbay issi doona gididi kawoy xoonanaysa odidosona. Ne odayka enta odaa mela gido; lo77oba oda” yaagis.13Shin Mikiyaasi, “De7o Goday eriya mela, Xoossay taw qoncisidaba odana” yaagis.14Mikiyaasi kawako yida wode kawoy, “Mikiyaasa nuuni Galadan de7iya Raamota olanaw biinoye boopino?” yaagidi oychis. Mikiyaasi kawako, “Enti ne kushen aadhidi imetana gisho bada ola” yaagis.15Kawoy, “Godaa sunthan tumaa oda; haraba taw odonna mela taani nena aapun toho caaqiso” yaagis.16Mikiyaasi, “Ta Isra7eele olanchoti ubbay henthanchoy bayna dorsada deriya bolla laaletidaysa be7as. Goday, ‘Hayisata kaalethiya asi baawa; enti ubbay banta soo soo saro boo’ yaagees” yaagis.17Isra7eele kawoy Iyosaafexako, “I taw iitape attishin, lo77o odi erenna gada taani new odabikina?” yaagis.18Mikiyaasi gujidi haysada yaagis; “Ha77i, Goday giyaba si7a! Goday ba araatan uttin salo olanchoti iya ushacha bagganinne iya haddirsa baggan eqidaysata be7as.19Goday, ‘Isra7eele kawoy Akaabi Galadan de7iya Raamota bidi yan hayqanaada iya balethanay oonee?’ ” yaagis. Issoy, “Haysada giya wode hankoy hessada” gis.20Wursethan issi ayyaani keyidi Godaa sinthan eqidi, “Taani iya balethana” yaagis. Goday, “Waatada balethanee?” yaagis.21Ayyaanay, “Ta bada, iya nabeta ubbaa doonan wordo ayyaana gidana” yaagis. Goday, “Ee, ne iya balethana; new hanana; bada baletha” yaagis.22Mikiyaasi, “Heko, Goday nena dhaysanaw qopida gisho ne nabeta doonan wordo ayyaana wothis” yaagis.23Kin7ana na7ay Sedeqiyaasi shiiqidi, Mikiyaasa baqidi, “Godaa Ayyaanay tana aggidi new odanaw awura aadhidee?” yaagis.24Mikiyaasi, “Heko, ne qosetanaw qol7a geliya wode hessa demmana” yaagis.25Isra7eele kawoy ba olanchotape issuwa xeegidi, “Mikiyaasa oyka efada katamaa haariya Amoonesinne ta na7aa Iyo7aasas imma.26Kawoy entako, ‘Ha addiya qasho keethan yeggite; ta saro simmana gakanaw guutha uythafenne haathaafe attishin, haraba aybaka iyaw immopite’ ” yaagidi kiittis.27Mikiyaasi, “Tuma, ne saro simmanaba gidiko, Goday taw odibeenna. Qassi, asaw, ta odiyaba akeekite” yaagis.Akaaba Hayquwa
28Hessafe guye, Isra7eele kawoynne Yihuda kawoy Iyosaafexi Galadan de7iya Raamota bidosona.29Isra7eele kawoy Iyosaafexako, “Taani ta ma7uwa laammada hara asi daanada olaa gelana; shin neeni ne kawo ma7uwa ma7a” yaagis. Isra7eele kawoy ba ma7uwa laammidi hara asi daanidi olaa gelis.30Soore kawoy ba para gaareta kiittiya asatako, “Gita gidin guuthi, hara ooderaka oletofite; Isra7eele kawa xalaala koyidi wodhite” yaagidi kiittis.31Para gaareta kiitteysati Iyosaafexa be7ida wode, “Haysi Isra7eele kawa” yaagidi iyara oletanaw simmidosona. Iyosaafexi waassin Goday iya maaddidi enta kushepe ashshis.32Para gaareta kiitteysati I Isra7eele kawa gidonnaysa be7idi iya gooddeysa aggaagidosona.33Issi uray coo ba dongiya dukiya wode Isra7eele kawa ola ma7oy gahetiya hashiyan caddis. Kawoy ba gaariya laagiya addiyako, “Gaariya guye zaarada tana olaa giddofe kessa; taani iita cache cadetas” yaagis.34Olay goobiya wode Isra7eele kawoy Akaabi ba para gaariya giddon zempidi, omarsi gakanaw Sooreta sinthan gam7is. Awi wulliya wode I hayqis.