Geeshsha Ayyaana Imotata
1Ta ishato, Geeshsha Ayyaana imotataba hinte erana mela ta koyas.2Hinte Xoossaa ammanonna wode dooni bayna eeqatan gooshetidi, hinte eronna soo bidaysa ereeta.3Xoossaa Ayyaanay kaalethiya asi oonika, “Yesuusi baadeto” yaagenna. Qassi Geeshsha Ayyaanay kaalethonna de7ishin, oonika, “Yesuusi Godaa” gaanaw danda7onaysa hinte erana mela koyayis.4Dumma dumma Ayyaana imotati de7oosona, shin imotata immiya Ayyaanay issuwa.5Nu Godaas oothiya dumma dumma oosoti de7oosona, shin Goday issuwa.6Nu Godaas oothiya dumma dumma ogeti de7oosona, shin he ogetan oothiya asa ubban oothiya Xoossay issuwa.7Shin issuwas issuwas imetida imotatan harata maaddana mela Geeshsha Ayyaanay qoncees.8Geeshsha Ayyaanay issuwas cincatethi kumida qaala immees; qassi issuwas eratethi kumida qaala immees.9He Geeshsha Ayyaanay issuwas ammano, hankuwas qassi pathiya wolqaa immees.10Geeshsha Ayyaanay issuwas malaata oothiya wolqaa, issuwas tinbite odiya wolqaa immees. Issuwas ayyaanape ayyaana shaaki eriya wolqaa, issuwas dumma dumma doonan odiya wolqaa, qassi issuwas dumma dumma doonan odetidaysa birshiya wolqaa immees.11Shin ha ubbaa oothey he issi Geeshsha Ayyaana. I koyiya mela issi issi asaas dumma dumma imota immees.Asatethinne Billiteta
12Issi asatethan daro billiteti de7oosona, shin he dumma dumma billiteti issi asatethi gidoosona. Hessadaka, Kiristoosi dumma dumma billiteti de7iya asatethaa mela.13Nuuni Ayhude gidin Girike gidin aylle gidin womaanno gidin, ubbay issi asatethi gidanaw Geeshsha Ayyaanan xammaqetida. Qassi nu ubbay issi Geeshsha Ayyaana ekida.14Nu asatethan dumma dumma billiteti de7oosonape attishin, issi billite gidenna.15Tohoy, “Taani kushe gidonna gisho billite gidike” giiko, I hessa gida gisho billitetethay attiyee?16Haythi, “Taani ayfe gidonna gisho billite gidike” giiko, I hessa gida gisho asatethafe issi billite gideysi attiyee?17Asatetha ubbay ayfe xalaala gididaako, nu aybin si7anee? Qassi asatethi ubbay haytha xalaala gididaako nu aybin singanee?18Shin Xoossay ba koydaysada, asatethaa giddon dumma dumma billiteta wothis.19Ubbay issi billite gididaako asatethi waanidi daanee?20Shin billiteti daro gidikoka, asatethay issuwa.21Ayfey kusheko, “Ne taw koshshaka” gaanaw danda7enna. Woyko huuphey tohoko, “Ne taw koshshaka” gaanaw danda7enna.22Shin daabura daaniya asatethaa billiteti nuus aadhidi koshshosona.23Boncho koshshenna gidi nu qopiya nu billitetape baggata daro bonchoos. Qassi nu borsetiya nu asatethaa billiteta aathidi bonchidi naagoos.24Nu be7in borsonna asatethaa billitetas boncho koshshenna. Shin Xoossay nu asatethaa billiteta wolira gasethidi borsiya billitetas aadhiya boncho immis.25Asatetha billiteti issoy issuwara shaako medhonna wolis qopana mela oothidi medhis.26Asatetha billitetape issoy saketiko billiteti ubbay iyara saketoosona. Asatetha billitetape issoy bonchetiko billiteti ubbay iyara ufaytoosona.27Hinte ubbay Kiristoosa asatethi; qassi hinte issoy issoy iya billiteta.28Woosa keethan Xoossay, koyro hawaareta, nam7antho nabeta, heedzantho astamaareta, kaallidi malaata ootheyisata, patheyisata, harata maaddeyisata, woosa keetha ayseysatanne, dumma dumma doonan odeteyisata wothis.29Ubbay hawaaree? Ubbay nabee? Ubbay astamaaree? Ubbay malaata oothii?30Ubbay pathiyee? Ubbay dumma dumma doonan odeetii? Ubbay dumma dumma doonan odetoysa birshii?31Shin ubbaafe aadhiya imota minthidi koyite. Qassi ubbaafe aadhiya ogiya ta hintena bessaana.