1 Qorontoosa Kiita10gof_ltw

Eeqa Goyinnofite

1Ta ishato, taani hinte haysa akeekana mela koyayis. Nu mayzati ubbay shaarape garsara hemetidosona; ubbay abba pinnidosona.2Enti Musera issifanaw shaaraninne abban xammaqetidosona.3Enti ubbay issi ayyaana kathi midosona.4Qassi ubbay issi ayyaana ushsha uyidosona. Enti bantana kaalliya ayyaana zaallafe pultida ushsha uyidosona; he zaallayka Kiristoosa.5Shin Xoossay entafe darotan ufaytiboonna gisho, enta ahay mela biittan wodhidi attis.6Enti iitaba amotidaysada, nuka iitaba amottonna mela he ubbay nuus leemiso gidis.7Geeshsha Maxaafan, “Asay maanawunne uyanaw uttidosona; qassi yexanaw dendidosona” geetetidaysada entafe issoti issoti eeqa goyinnidaysa mela hinte eeqa goyinnofite.8Entafe issoti issoti laymatidaysada nu laymatanaw bessenna. Hessa gaason entafe issi gallas laatamanne heedzu mukulay hayqis.9Entafe issoti issoti Godaa paacidi shooshan duketidi hayqidaysada nu Godaa paacanaw bessenna.10Entafe issoti issoti zuuzumidi hayqo ehiya kiitanchuwan dhayidaysada hinteka zuuzumofite.11Ha enta bolla gakida ubbay nu naagetana mela nuus leemiso gidis. Qassi wode wursethaa bolla de7iya nuus timirte gidana mela ha ubbay xaafetis.12Hessa gisho, ta eqas giya oonika kundonna mela bana naago.13Ase ubbaa gakiya paacepe attishin, dumma paacey hintena gakibeenna. Hinte wolqay danda7eysafe aadhiya paacen hinte paacetonna mela aathidi immonna Xoossay ammanetidaysa. Hintena paacey gakiya wode he paaciya I hintena danda7isana. Qassi he paaciyape hinte keyana ogiya I giigisana.14Hiza, ta al7o ishato, eeqa goyinnofe haakite.15Hinte wozanaama asi gidida gisho ta haysa odayis. Taani geysi tuma gideysa hinte hinte huuphen pirdite.16Nuuni Xoossaa galatidi shaaketiya anjo xuu7ay Kiristoosa suuthara issifetethi de7eysa gidenneyee? Qassi nuuni bathiya uythay Kiristoosa ashuwara issifetethi de7eysa gidenneyee?17Nuuni daro gidikoka uythay issino, nu he issi uytha shaaketiya gisho issi asatethi.18Ane Isra7eele asay oothidaysa akeekite. Yarshetida yarshuwa meysati yarsho bessaara issifetethi baaweyee?19Taani ay gaanaw koyada gayna? Eeqas yarshetida kathay woyko eeqay pathiyaba guusseyee?20Gidenna, enti yarshey Xoossas gidonashin, tuna ayyaanatasa. Hessa gisho, hintew tuna ayyaanatara issifetethi daana mela koyke.21Hinte Godaa xuu7ape uyishe, qassi tuna ayyaanata xuu7ape uyanaw danda7eketa. Godaa gaytape mishe qassi tuna ayyaanata gaytape maanaw danda7eketa.22Nuuni hessa oothidi Godaa yiloyno? Nuuni iyape aadhiya minoyee?23Hinte, “Ubbabaa oothonna mela diggiyabay baawa” geeta, shin ubbay maaddenna. Hinte, “Ubbabaa oothonna mela diggiyabay baawa” geeta, shin ubbay dichenna.24Issi issi asi, hara asi maaddiyaba qopanaw besseesipe attishin, bana maaddiyaba xalaala qopofo.25Hinte kaha sidhen gelsiya oysha denthonna giyan bayzetiya ashuwa coo miite.26Ayis giiko, sa7inne sa7an de7iya ubbay Godaaba.27Issi ammanonna asi hintena imatanaw koydi xeegiko baanaw koyko biite. Hinte kahan medhetiya oyshan sidhonna hinte sinthe aathiyaba ubba miite.28Shin issi asi, “Haysi eeqas yarshetidaba” giiko, he hintew odida addiya gishonne kaha gisho he katha moopite.29Taani, kaha gisho gey, he hintew odida ura kaha guussufe attishin, hinte kaha gidenna. Hara asa kaha gisho gada taani ta la77atetha bolla ayis pirdo?30Taani miya katha Xoossa galatada miiko balidada ayis boretiyana?31Hiza, hinte ay miiko ay uyiko, woyko ay oothikoka ubbaba Xoossa bonchoos oothite.32Ayhudeta gidin Giriketa gidin woyko Xoossa woosa keethi gidin oodeska dhube gidopite.33Taani ubba wode darota ashshanaw enti maadetiya oge koyaysipe attishin tana maaddiya oge koyke.
expand_more
Search