Dawiti Asaa Taybis
1Xalehey Isra7eele bolla meto ehanaw koyidi, Dawiti Isra7eele asaa taybana mela denthethis.2Dawiti Iyo7aabakonne toora moconatako, “Daanepe Barsaabe gakanaw bidi, Isra7eele asaa taybite. Yaatidi, asaa tayboy aapuneko tana erisite” yaagis.3Shin Iyo7aabi, “Goday, ha de7iya ba asaa bolla xeetu kushe gujo! Ta godaw, kawaw, enti ubbay ta godaa aylleta gidokonaayee? Ta goday hessa melaba oothanaw ayis koyii? Isra7eele bolla ayis bala oothay?” yaagis.4Shin kawa qaalay Iyo7aaba xoonin, Iyo7aabi keyidi Isra7eele biitta ubbaa yuuyidi Yerusalaame simmis.5Iyo7aabi taybida asaa taybuwa Dawitas immis. Isra7eele biitta ubban mashshan oletanaw danda7iya issi 1,100,000 asati de7oosona. Qassi Yihuda biittan mashshan oletanaw danda7iya 470,000 asati de7oosona.6Iyo7aabi kawa kiitta dosiboonna gisho Leewetanne Biniyaame kochata taybeenna.7Xoossay hessan ufaytiboonna gisho Isra7eele seeris.8Dawiti Xoossaako, “Taani haysan gita nagara oothas. Shin ha77i nena woossayis; ne aylliya nagaraa atto ga; taani daro eeyaba hanas” yaagis.9Goday Dawita qoncethi be7iya Gaadeko haysada yaagis;10“Bada Dawitako, Goday, ‘Taani nena heedzu dooro bessayis; taani ne bolla oothana mela entafe taw issuwa doora’ yaagees” yaaga.11Gaadi Dawitako bidi, “Goday haysatape issuwa doora yaagees;12heedzu laytha kosha woyko heedzu ageena ne morketa kushen aadhada imetanaysa woyko heedzu gallas Godaa mashshay ne biitta shocanaysanne gado Isra7eele bolla ehiya hayqo kiitancho kiitteysafe awusa dooray? Tana kiittidaysas odanaba taw oda” yaagis.13Dawiti Gaadeko, “Taani daro un7etas. Godaa maarotay gita gidiya gisho taani iya kushen kundana; asa kushen kundike” yaagis.14Hessa gisho, Goday Isra7eele bolla gado yeddin, 70,000 Isra7eele asati hayqidosona.15Xoossay Yerusalaame dhaysanaw kiitancho kiittis. Shin kiitanchoy Yerusalaame dhaysanaw doomida wode Goday azzanis. Dhaysiya kiitanchuwako, “Agga! Hiza gidana!” yaagis. He wode Godaa kiitanchoy Yaabuse addiya Orna wudumma matan eqis.16Kiitanchoy ba mashsha ba kushen oykidi Yerusalaame dhaysanaw sa7apenne salope giddon eqidaysa Dawiti be7is. He wode Dawitinne cimati kayo ma7o ma7idi, sa7an gufannidosona.17Dawiti, “Asay taybetana mela oothiday tana gidikina? Naaqidaynne iitabaa oothiday tana. Shin ha dorsati ay oothidona? Abeeti Godaw, ta Xoossaw, hayyana ne kushey tananne ta soo asaa seero. Ne kushey ne asaa seeropo!” yaagis.18Godaa kiitanchoy Gaadeko haysada yaagis; “Dawiti Yaabuse addiya Orna wudumma bidi Godaas yarsho bessi gimbana mela oda” yaagis.19Godaa sunthan Gaadi odidaysa si7idi Dawiti bis.20He wode Orninne iya oyddu adde nayti wudumman giste qoxoosona. I guye simmidi kiitancho be7is; iyara de7iya oyddu nayti be7idi qosetidosona.21Dawiti Ornako yida wode Orni iya be7idi, wudummaafe gaxa keyidi ziggidi sarothis.22Dawiti, “Gadoy asaa bollafe kichana mela taani Godaas yarsho bessi keexana mela ne wudumma taw bayza. Taani new kumetha gatiya qanxana” yaagis.23Orni, “Eka; ta goday kawoy bana ufaysiyabaa ootho. Heko, boorat xuussa yarshos, katha bukiya miishiya eethanaw, giste kathaa yarshos immana. Taani ha ubbaa new immana” yaagis.24Shin kawoy Dawiti, “Akay, taani kumetha gate qanxada shammana. Taani nebaanne ta miishen shammonnaba ekada xuussa yarsho oothada Godaas yarshike” yaagis.25Dawiti wudumma usupun xeetu worqa santimen shammis.26Dawiti yan Godaas yarsho bessi keexis. Yaatidi xuussa yarshonne issifetetha yarsho yarshis. Godaa woossin, Goday xuussa yarshuwa bolla salope tama yeddidi iyaw zaaris.27Goday kiitanchuwa kiittin, kiitanchoy ba mashsha shoohuwan zaaris.28Dawiti, Goday iya woosa zaaridaysa be7idi, Yaabuse addiya Orna wudumman zaaridi yarshis.29Musey mela biittan giigisida, Godaa Dunkaaneynne xuussa yarsho bessay he wode Gaba7oonan goyinniya dhoqa bessan de7ees.30Shin Dawiti Godaa kiitanchuwa mashsha yayyida gisho Xoossaa oychanaw he bessaa baanaw danda7ibeenna.