ኡሩታ ቦኤዛ ጋደን
1ኑሃምስ እ አዝና አበመለከ ባጋራ ዳቦያ፥ ቦኤዛ ጌተትያ እስ ኤረትዳ ዱረ አደይ ደኤስ።2እስ ጋላስ ሞአበ ኡሩታ ኑሃሞ፥ “ታዉ ቃትያ አስ ካላዳ ቡ ቆራናዉ ካ ጫክያ በሲ ቦሻ?” ያጋሱ። እያካ፥ “ኤ ታ ናተ ባ” ያጋሱ።3ሄሳ ግሾ፥ ኡሩታ ባዳ ካ ጫክያ አሳ ጌዱዋፐ ቡ ቆሮ ዶማሱ። ፕኮ መላ ቡያ ቆርያ ጋደይ አበመለከ ዳቡዋ ቦኤዛ ጋደ ግድስ።4ሄኮ፥ ጉ ዎደፐ ቦኤዝ ቤተለመፐ ጋደ ብድ፥ ካ ጫክያ አሳ፥ “ጎድ ዎልቃ እሞ” ግድ ሳሮስ። ኤንቲ ዛሪድ፥ “ጎድ አንጆ” ያግዶሶና።5ያትን፥ ቦኤዝ ካ ጫከይሳታ ካፑዋ፥ “ሀና ናአተ ማጫስያ ኦኔ?” ያግድ ኦይችስ።6ካ ጫከይሳታ ካፖይ ዛሪድ፥ “ሀና የገልስያ ኑሃምራ ሞአበ ቢታፈ ይዳ ሞአበ ማጫስ።7እያ ታና፥ ‘ካ ጫከይሳታ ጌዱዋ ካላዳ ምርቅያ ግዶፈ ቡ ቆሮ?’ ጋዳ ኦይቻሱ። ሀእ ቡሮ ሸምፓናዉ ኡታውስ፤ ዎንታ ጉራ ዮደፐ ሀኖ ጋካናዉ ሀይሳን ቆራሸ ጋምአሱ” ያግስ።8ቦኤዝ ኡሩቶ፥ “ታ ናተ ስአ፤ ህዛፐ ቡ ቆራናዉ ሀራ ጋደ ቦፓ። ቃስ ሀይሳፈ አዉካ ቃፆፋ። ታ ማጫ አይለታራ ሀይሳን ፔአ።9አሳይ ካ ጫክያ በሳ ፄላ ፄላዳ ማጫ አይለታራ ግዳዳ ኤንታ ጌዶ ካላዳ ቆራ። አደ አይለት ነና ቦቾናዳ ታኒ ኤንታዉ ኦዳስ። ቃስ ነና ሳምኮ፥ አደ አይለት ትክድ ዎዳ ሃፈ ፓቃዳ ኡያ” ያግስ።10ኡሩታ ሾጫ ዝጋዳ፥ “ታኒ አላጋ ግድክና? ኔኒ ሀይሳ መላ ታዉ ቃትዳይ አይባሰ?” ያጋሱ።11ቦኤዝ ዛሪድ፥ “ነ አዝናይ ሀይቆሳፐ ዶምን፥ ኔኒ ነ አዝና አየስ ኦዳባ ኡባ፥ ኔኒ ነ አይዉ፥ ነ አዋነ ነ የለትዳ ቢታ አጋዳ፥ ነ ኤሮና ደርያራ ዳናዉ ይዳይሳ ታኒ ጌሻዳ ስአስ።12ኔኒ ኦዳባስ ጎድ ነዉ ኩሸ ዛሮ። ኔኒ እያ ቀፍያ ጋርሳን አታና ጋዳ ይዳ፥ እስራኤለ ጎዳይ ፆሳይ ነዉ ኩመባ እሞ” ያግስ።13ኡሩታ፥ “ታ ጎዳዉ፥ ኔኒ ታዉ ዳሮ ቃታዳሳ፤ ታኒ ነ አይለታፐ እስንዉካ ጋክከ፥ ሽን ታዉ ኬሀባ ሀሳያዳ፥ ታና ምንዳሳ” ያጋሱ።14ቁማ ምያ ዎደ ቦኤዝ፥ “ሃ ሺቃ፤ ኡይ ኤካዳ ዎይንያን ቱሻዳ ማ” ያግስ። እያካ ካ ጫክያ አሳ ማታን ኡታሱ። ቦኤዝ እዉ ባንጋ ሻሽ እሚስ፤ እያ ማዳ ካልን ካይ ግድድ ፓላህስ።15እያ ቡ ቆራናዉ ደንድያ ዎደ፥ ቦኤዝ ባ አይለታ፥ “ምርቅያ ግዶፈካ እያ ቆርኮ እዮ ዬላዮፕተ።16ኡባካ ምርቅያፈ ሾድድ እዉ የግተ እያ ኤኮ፤ እዮ ካጮፍተ” ያግስ።17ሄሳን ኡሩታ ኦማርስ ጋካናዉ ቆራሱ። እያ ቆራ ፐእዳይሳ ቆፅን፥ ታሙ ክሎ ግራመ ባንጋ ግደይሳ ኤካሱ።18እያ ሄ ካ ባአ ኤካዳ ካታማ ስማሱ፤ እያ አይ መላ ቆርዳኮ ኤሀዳ ባ አዝና አይዉ በሳሱ። ቃስ እያ ምሽን አትዳ ካ ኤህዳይሳ ከሳዳ እዉ እማሱ።19እ አዝና አይያ፥ “ሀች ሀይሳ አዉፐ ቆራዲ? አዉን ኦ ፔአዲ? ነዉ ሀይሳዳ ኬህዳ ኡራይ አንጀቶ” ያጋሱ። ያግን ኡሩታ እያ ባ ኦ ፔእዳ ጋድያ ጎዳባ ባ አዝና አየስ ኦዳሱ። “ታኒ ሀች ኦዳ ፔእዳ ጋድያ ጎዳ ሱንይ ቦኤዛ ጌተቴስ” ያጋሱ።20ኑሃማ ዛራዳ፥ “ሀይቅዳይሳታስነ ደኦን ደኤይሳታስ ባ ኬሀተ አግቦና ጎዳይ እያ አንጆ” ያጋሱ። ጉጃዳካ፥ “ሀ አደይ ኑስ ማታ ዳቦ፤ ኑና ኡባ ዎዛናዉ ጋያ አሳታፐ እሶይ እያ” ያጋሱ።21ሞአበ ኡሩታ፥ “እ ታና፥ ‘ታ ካይ ጫከትድ ዉራና ጋካናዉ፥ ታ ኦሳንቾታፐ ሻከቶናሽን ያዳ ቡ ቆራ’ ያግስ” ያጋሱ።22ኑሃማ ባ ናአ ማቸ ኡሩትኮ፥ “ታ ናተ፥ ቱማካ ቦኤዛ ጋድያን ኦያ ማጫሳታራ ቢኮ ነዉ ሎኦ። ሀራ አሳ ጋደ ቢኮ ነና መቶና” ያጋሱ።23ሄሳ ግሾ፥ ባንጋይነ ግስትያ ጫካይ ዉራና ጋካናዉ ኡሩታ ቦኤዛ ማጫ አይለታኮ ሺቃዳ፥ ቡያ ቆራሸ ጋምአሱ። ቃስ ባ አዝና አየራ እስፈ ደአሱ።