ኪታንቾነ ጉ ማፃፋ
1ሄሳፈ ጉየ፥ ታ ሀራ ዎልቃማ ኪታንቾይ ሳሎፐ ሳአ ዎሽን በአስ። እ ሻራ ማእስ፤ እያ ሁጵያ ቦላ ዙል ደኤስ። እያ ሶምኦይ አዋ መላ፤ እያ ቶሆይ ታማ ቱሳ መላ።2ሄ ኪታንቾይ ዶያ ደእያ እስ ጉ ፃ ማፃፋ ባ ኩሸን ኦይክድ፥ ባ ኡሻቻ ቶሁዋ አባ ቦላ፥ ባ ሀድርሳ ቶሁዋ ቢታ ቦላ ኤስስ።3ጉድያ ጋሞዳ ባ ቃላ ቁ ኦድ ዋስስ። እ ዋስዳ ዎደ ላፑን ዳዳት ባንታ ጉን ስስዶሶና።4ላፑን ዳዳት ኦደትዳ ዎደ ታ ፃፋናዉ ጊገታስ። ሽን ሳሎፐ፥ “ላፑን ዳዳት ኦድዳይሳ ማታመን ጎርዳፈ አትሽን፥ ፃፎፓ” ግያ ግርሳ ስአስ።5ያትድ፥ አባ ቦላነ ቢታ ቦላ ኤቅዳ፥ ታ በእዳ ኪታንቾይ፥ ባ ኡሻቻ ኩሽያ ሳሎ ፑደ ምጭስ።6እ ምጭድ ሳሎንነ እያ ግዶን ደእያ ኡባ፥ ሳአንነ እያ ግዶን ደእያ ኡባ፥ አባነ እያ ግዶን ደእያ ኡባ መዳ፥ መርናዉ ደእያ ፆሳ ሱንን ጫቅድ፥ “ህዛፐ ጉየ፥ ፆሳይ ጋምኤና።7ሽን ላፑን ኪታንቾይ ባ ሞይዝያ ፑንያ ዎደ ፆሳይ ባ አይለ ግድዳ ናበታ ባጋራ ቆንጭስዳ ፁራ ቆፋይ ፖለታና” ያግስ።8ሄሳፈ ጉየ፥ አባ ቦላነ ቢታ ቦላ ኤቅድ፥ “እያ ኩሸን ዶየትድ ደእያ ፃ ማፃፋ ኪታንቹዋ ኩሸፐ ኤካ” ያግድ ናምአን ታዉ ኦድሽን ስአስ።9ታኒ ሄ ኪታንቹዋኮ ባዳ፥ ጉ ፃ ማፃፋ እማ ጋዳ ኦይቻስ። እ ታኮ፥ “ኤካዳ ማ፤ እ ነ ኡሎን ጫማና፥ ሽን ነ ዶናን ኤሳዳ ማልአና” ያግስ።10ታኒ ኪታንቹዋ ኩሸፐ ሄ ጉ ፃ ማፃፋ ኤካዳ ማስ፤ ታ ዶናን ኤሳዳ ማልእስ፥ ሽን ታ ኡሎን ጫምስ።11ሄሳፈ ጉየ፥ ታኮ፥ “ኔኒ ያራ ኡባስ፥ ደረ ኡባስ፥ ዱማ ዱማ ዶናን ኦደተይሳታስነ ካዎታስ ትንብተ ዛራ ኦዳናዉ በሴስ” ያግስ።