ፓስካ ባኣለ
1እስራኤለ አሳይ ግብፀፈ ከይዳ ናምአን ላይን ኮይሮ አጌናን ሲና መላ ቢታን ጎዳይ ሙሰኮ ሀይሳዳ ያግስ፤2“እስራኤለ አሳይ ፓስካ ባኣለ እያ ቃማን ቦንቾ።3ሀ አጌናን ታማነ ኦይዳን ጋላሳን እያ ቃማን ኦማርስ እያ ዎጋ ኡባዳነ እያ ኪታ ኡባዳ ቦንቾ” ያግስ።4ሄሳ ግሾ፥ ሙሰይ እስራኤለ አሳይ ፓስካ ባኣለ ቦንቻና መላ ኤንታዉ ኦድስ።5ጎዳይ ሙሰ ኪትዳይሳዳ፥ እስራኤለ አሳይ ኮይሮ አጌናን ታማነ ኦይዳን ጋላሳን፥ ኦማርስ ሲና መላ ቢታን ፓስካ ባኣለ ቦንችዶሶና።6ሽን ኤንታፈ ባጋት አሀ ቦችድ ቱንዳ ግሾ ሄ ጋላስ ፓስካ ባኣለ ቦንቻናዉ ዳንዳእቦኮና። ሄሳ ግሾ፥ ኤንቲ ሄ ጋላስ ሙሰኮነ አሮናኮ ይድ፥7“ኑኒ አሀ ቦችዳ ግሾ ቱንዳ፥ ሽን ሄ ቃማን ሀራ እስራኤለ አሳራ ጎዳስ ያርሾ ያርሾና መላ አይስ ድገትዶ?” ያግዶሶና።8ሙሰይ ዛሪድ፥ “ጎዳይ ህንተባ ታዉ ኦዳና ጋካናዉ ጋምእሽተ” ያግስ።9ጎዳይ ሙሰኮ፥10“እስራኤለ አሳኮ ሀይሳዳ ያጋ፤ ህንተፈ ዎይኮ ህንተ ኮቻፈ ኦንካ አሀ ቦችድ ቱንኮ ዎይኮ ኦገትዳባ ግድኮ፥ ፓስካ ባኣለ ቦንቻናዉ ዳንዳኤስ።11ናምአን አጌናን ታማነ ኦይዳን ጋላስ ኦማርስ ፓስካ ባኣለ ቦንቾ። ፓስካ ዶርሳ ኡይራነ ጫሞ ቦንጮራ ሞ።12ሳአይ ዎንታና ጋካናዉ ዶርሳ አሹዋፐ አይብካ አቶፎ፤ ቃስ እያ መቀፈ እሱዋካ መንፎ። ፓስካ ባልያ ዎጋ ኡባ ኦ።13ሽን ጌሽነ ኦገቶና አስ ፓስካ ቦንቾና እፅኮ፥ እ ታ አሳ ግዶፈ ኩረቶ። ጎዳ ያርሹዋ እያ ቃማን ያርሽቦና ግሾ ባ ናጋራ ግሾ ፕርዳ ኤኬስ።14“ህንተ ግዶን ደእያ በተ አስ ፓስካ ባኣለ ቦንቻናዉ ኮይኮ፥ ፓስካ ዎጋዳ ቦንቾ። በታንቾይነ ቢታ አዉ ናእ ኡባይ ሄ ዎጋ ኦ” ያግስ።ታማ ሻራ
15ጌሻ ዱንካነይ ቶከትዳ ጋላስ ሻራይ ጌሻ ዱንካንያ ማእስ። ኦማርሳፈ ዶምድ፥ ዎንታ ጋካናዉ ጌሻ ዱንካንያ ቦላራ ደእያ ሻራይ ታማ ዳኔስ።16ሄሳዳ ጋላስ ጋላስ ሻራይ ማኤስ፤ ቃማ ቃማ ሄ ሻራይ ታማዳ ፖኤስ።17ሄ ሻራይ ጌሻ ዱንካንያ ቦላፈ ደንድያ ዎደ ኡባን እስራኤለ አሳይ ባንታ ዱንካንዳ ጉታፐ ደንዶሶና። ቃስ ሄ ሻራይ ዎያ በሳን እስራኤለ አሳይ ዱንካኖሶና።18እስራኤለ አሳይ ጎዳ ኪታን ጉታፐ ደንዶሶና፤ ቃስ ጎዳ ኪታን ዱንካኖሶና። ሻራይ ጌሻ ዱንካንያ ቦላ ጋምእያ ዎደ ኡባን ባንታ ዱንካንዳ ጉታን ጋምኦሶና።19ሻራይ ጌሻ ዱንካንያ ቦላ ዳሮ ጋላስ ጋምእኮካ፥ እስራኤለ አሳይ ጎዳ ኪታ ናጎሶናፐ አትሽን፥ አዉካ ቦኮና።20እስ እስ ቶሆ ሻራይ ጌሻ ዱንካንያ ቦላ ጉ ጋላስ ጋምኤስ። ግድኮካ ኤንቲ ጎዳ ኪታን ዱንካኖሶና፤ ቃስ ጎዳ ኪታን ጉታፐ ደንዶሶና።21እስ እስ ቶሆ ሻራይ ኦማርሳፈ ዎንታና ጋካናዉ ፃላላ ጋምኤስ፤ ሻራይ ደንድያ ዎደ ኤንቲ ደንዶሶና። ጋላስ ግድን፥ ቃማ ግድን፥ ሻራይ ደንድያ ዎደ ኤንቲ ደንዶሶና።22ሻራይ ጌሻ ዱንካንያ ቦላ ናምኡ ጋላስ ግድን ዎይኮ እስ አጌና ዎይኮ እስ ላይ ጋምእን እስራኤለ አሳይ ባንታ ዱንካንዳ ጉታን ጋምኦሶናፐ አትሽን፥ ቦኮና። ሽን ሻራይ ደንድያ ዎደ ኤንትካ ደንዶሶና።23ጎዳይ ሙሰ ኪትዳይሳዳ ኤንቲ ጎዳ ኪታን ዱንካኖሶና ቃስ ጎዳ ኪታን ጉታፐ ደንድድ ቦሶና።