ፆምፐታ ኡተ ማራ
1ጎዳይ ሙሰኮ፥2“አሮን ላፑን ፆምፐታ ኮጫ ቦላ ዎያ ዎደ ፖኦይ ስን ባጋራ ደእያ ሄራ ፖእሳና መላ ኦድ ዎ ጋዳ ኦዳ” ያግስ።3ጎዳይ ሙሰ ኪትዳይሳዳ፥ አሮን ፆምፐታ ኮጫ ቦላ ዎድ ስን ባጋራ ደእያ ሄራ ፖእሳና መላ ኦስ።4ፆምፐ ዎያ ኮጫይ፥ ጎዳይ ሙሰ በስዳይሳዳ ቶማፐ ብድ ቦላ ጪሻ ጋካናዉ ቆፀትዳ ዎርቃፈ ኦሰትስ።ሌወታ ጌሾ ዎጋ
5ጎዳይ ሙሰኮ፥6“እስራኤለ አሳ ግዶፈ ሌወታ ሻካዳ ዎጋዳ ኤንታ ጌሻ።7ኔኒ ኤንታ ጌሻናዉ ሀይሳዳ ኦ፤ ጌሽያ ሃ ኤካዳ ኤንታ ቦላ ዉርፃ፤ ኤንቲ ባንታ አሳተ ኡባ ሜደቶ፤ ባንታ ማኡዋ ሜጮ፤ ያንድ ኤንቲ ዎጋዳ ጌሽ ግዳና።8ካልድ ኤንቲ እስ ዎፋኖነ ካ ያርሾስ ግድያ ዛይተራ ዋላሄትዳ ሎኦ ለ ኤኮ፤ ቃስ ኔኒ ናጋራ ያርሾስ ሀራ እስ ዎፋኖ ኤካ።9ሄሳፈ ጉየ እስራኤለ አሳ ኡባ ሺሻዳ፥ ሌወታ ጌሻ ዱንካንያ ስን ኤሀዳ ኤሳ።10እስራኤለ አሳይ ኤንታ ሁጵያ ቦላ ባንታ ኩሽያ ዎ።11ሌወት እስራኤለ አሳ ግዶፈ ታዉ ዱማትድ ኦና መላ ዩሾ ያርሾ ኦድ አሮን ታ ስን ሺሾ።12ሌወት ባንታ ኩሽያ ናምኡ ዎፋኖታ ሁጰን ዎ። ሌወታ ናጋራ አቶተስ እሱዋ ናጋራ ያርሾ፥ ቃስ ሀንኩዋ ፁሳ ያርሾ ኦዳ ጎዳስ ያርሻ።13“ሌወታ ሻካዳ ታዉ ዱማያ፤ አሮናነ እያ አደ ናይታ ኤንታ ቦላ ሹማ።14ሄሳዳ ኦዳ ሌወታ እስራኤለ አሳፐ ታዉ ዱማያ፤ ኤንቲ ታባ ግዳና።15“ኔኒ ኤንታ ጌሽዳፐነ ዱማይዳፐ ጉየ ሌወት ጌሻ ዱንካንያን ባንታ ኦሱዋ ኦናዉ ዮ።16እስራኤለ አሳ ግዶፈ ኩመ ኤንቲ ታዉ እመትዶሶና፤ እስራኤለን ባይራ የለትዳ አደ ናይታ በሳን ሌወታ ታዉ ኤካስ።17እስራኤለ አሳ ግዶን ባይራ የለትዳ አሰ ግድን መሄ ግድን ኡባይ ታባ። ታኒ ግብፀ ቢታን ባይራ ኡባ ዎዳ ዎደ ኤንታ ታዉ ዱማያስ።18እስራኤለን ባይራ የለትዳ አደ ናይታ በሳን ታዉ ሌወታ ኤካስ።19እስራኤለ አሳ ግዶፈ ሌወታ አሮናስነ እያ አደ ናይታስ እማስ። እስራኤለ አሳይ ጌሻ ዱንካንያኮ ሺቅድ ቆሄቶና መላ ሌወት እስራኤለ አሳ ግሾ ጌሻ ዱንካንያን ኦናዉነ ናጋራ አቶተ ኤሀናዉ ዶረትዶሶና” ያግስ።20ጎዳይ ሙሰ ኪትዳይሳዳ፥ ሙሰይ፥ አሮንነ እስራኤለ አሳ ኡባይ ሌወታ ዱማይዶሶና።21ሌወት ባንታና ጌሽዶሶና፤ ባንታ ማኡዋ ሜጭዶሶና። አሮን ኤንታ ጎዳስ ዱማ እሞ ኦድ ሺሽስ፤ ኤንታዉ ናጋራ አቶተስ ያርሽድ ኤንታ ጌሽስ።22ሄሳፈ ጉየ፥ ሌወት አሮናነ እያ አደ ናይታ አዋተ ጋርሳን ግድድ ጌሻ ዱንካንያ ግዶን ባንታ ኦሱዋ ኦናዉ ይዶሶና። ጎዳይ ሙሰ ሌወታ ዱማያናዉ ኪትዳይሳዳ ኤንቲ ኦዶሶና።23ጎዳይ ሙሰኮ፥24“ሀይስ ሌወት ኦና ዎጋ፤ ላይ ላታማነ እቻሻነ እያፐ ቦላ ግድዳ ሌወ አደ ኡባይ ጌሻ ዱንካንያን ኦናዉ ዮ።25ሽን ላይ እሻታሙ ግድያ ዎደ ባንታ ኦሱዋፐ ሸምፖ፤ ዛር ኦፎ።26ኤንቲ ጌሻ ዱንካንያን ኦያ ባንታ እሻታ ኦ ማዳናዉ ዳንዳኦሶና። ሽን ኤንቲ ባንታዉ አይ ኦሶካ ኦፎ። ህዛ ኔኒ ሌወታ ሀይሳዳ ኦስሳ” ያግስ።