ግምበ ድርሳ ኦሳንቾታ
1ካህነ ሀላቃይ ኤልያሴብነ ሀራ ካህነት ዶርሳ ፐንግያ ዛር ግምብድ ፆሳስ ዱማይዶሶና፤ ሳንቃ አዶሶና። ኤንቲ ፄታ ጌተትያ ግምበ ሻኩዋፈ ብድ ሀናንኤላ ጌተትያ ግምበ ሻኩዋ ጋካናዉ ግምብድ ፆሳስ ዱማይዶሶና።2ኤንታ ላንቀን ደእያ በሳ እያርኮ አሳይ ግምብን፥ ካልድ ደኤይሳ እምራ ናአይ ዛኩር ግምብስ።3ሀስናአ ናይት ሞሎ ፐንግያ ግምብዶሶና። ኤንቲ ጎባነ ኤስድ፥ ሳንቃ አዶሶና፤ ሳንቃ ጎርድያ ካሱዋነ ካሱዋ ገልስያ ሳጋዩዋ ጊግስዶሶና።4ኤንታ ካልድ ደእያ በሳ ሀቆፃ ናአ ግድዳ ኡራያ ናአይ ማረሞት ግምብስ። እያፐ ካልድ ደእያ በሳ ማሰዛቤላ ናአ ባራካ ናአይ ማሱላም ግምብስ። እያፐ ካልድ ደእያ በሳ ባአና ናአይ ሳዶቅ ግምብስ።5እያ ማታን ደእያ በሳ ታቆሀ ካታማ አሳት ግምብዶሶና። ሽን ሄ ካታማ ሀላቃት ባንታዉ እመትዳ ኦሱዋ ኦና እፅዶሶና።6ፓሰሀ ናአይ ዮዳሄይነ ባሶድያ ናአይ ማሱላም ጋልአ ፐንግያ ግምብዶሶና። ኤንቲ ጎባነ ኤስድ፥ ሳንቃ አዶሶና፤ ሳንቃ ጎርድያ ካሱዋነ ካሱዋ ገልስያ ሳጋዩዋ ጊግስዶሶና።7ኤንታ ላንቀን ደእያ በሳ ጋባኦና ካታማ አስ ግድዳ ማላፅነ መሮኖታ ካታማ አስ ግድዳ ያዶን ግምብዶሶና። ጋባኦናነ ምፅጳ ካታማ አሳይ ኤንታራ እስፈ ግድድ፥ ኤፍራፂሳ ሻፋፐ ዉሎሀ ባጋ ቢታ ሃረይስ ደእያ ኬ ጋካናዉ ደእያ በሳ ግምብዶሶና።8ዎርቃ ሼሽያ ሀርሀያ ናአይ ኡዝኤል ኤንታ ማታን ደእያ በሳ ግምብስ። ቃስ እያ ማታን ደእያ በሳ ሽቶ ኦያ ሀናን ግምብስ። ኤንቲ ናምአይ እስፈ የሩሳላመ ዳልጋ ግምብያ ጌተትያ በሳ ጋካናዉ ደእያ በሳ ግምብዶሶና።9ኤንታ ማታን ደእያ በሳ ሁራ ናአይ፥ የሩሳላመ ዎራዳስ ባጋ ሃርያ ራፋይ ግምብስ።10ሀሩማ ናአይ ያዳይ ባ ኬፈ ስን ባጋራ ደእያ በሳ ግምብስ። እያ ማታን ደእያ በሳ አሰባና ናአይ ሀቱሽ ግምብስ።11ሀርማ ናአይ ማልከይነ ፓሀት-ሞአባ ናአይ ሀሹብ እያ ማታን ደእያ በሳነ እቶነ ሻኮ ግምብያ ግምብዶሶና።12ኤንታ ማታን ደእያ በሳ ሀሎሄሳ ናአይ፥ የሩሳላመ ዎራዳስ ናምአን ባጋ ሃርያ ሳሉምነ እያ ማጫ ናይት ግምብዶሶና።13ሀኑንነ ዛኖሀ ካታማን ደእያ አሳይ እስፈ ዛንጋራ ፐንግያ ግምብዶሶና። ኤንቲ ጎባነ ኤስድ፥ ሳንቃ አዶሶና፤ ሳንቃ ጎርድያ ምነ ም ገልስያ ሳጋዩዋ ጊግስዶሶና። ፕቶ ፐንግያ ጋካናዉ እስ ሙኩሉ ዋ አዱሳ ግምብያ ጉጅድ ግምብዶሶና።14ራካባ ናአይ፥ ቤት-ሀካሬማ ዎራዳ ሃርያ ማልከይ ፕቶ ፐንግያ ግምብስ። ኤንቲ ጎባነ ኤስድ፥ ሳንቃ አዶሶና፤ ሳንቃ ጎርድያ ካሱዋነ ካሱዋ ገልስያ ሳጋዩዋ ጊግስዶሶና።15ኮልሃዛ ናአይ፥ ምፅጳ ዎራዳ ሃርያ ሳሉም ፑልቶ ፐንግያ ዛሪድ ግምብስ። እ ፐንግያስ ካማ ጊግስድ ሳንቃ አስ፤ ሳንቃ ጎርድያ ካሱዋነ ካሱዋ ገልስያ ሳጋዩዋ ጊግስስ። ቃስ፥ ሰላሀ ተቀ ሃይ ደእያ ባጋራ ካዋ አታክልተ በሳፈ ዶምድ፥ ዳዊታ ካታማፐ ዱገ ዎስያ ደ ጋካናዉ ደእያ ግምብያ ግምብስ።16ቤት-ፁራ ዎራዳስ ባጋ ሃርያ አዝቡቀ ናአይ ናህመይ ግምብስ። እ ዳዊታ ዱፉዋፐ ስን ባጋራ ደእያ በሳ ጋካናዉ፥ አስ ኦዳ ተቀ ሃይ ደእያ በሳ ጋካናዉ፥ ኦላንቾታ ኬ ጋካናዉ ደእያ በሳ ግምብስ።17ሀይሳፈ ካለይሳ ባና ናኣ ረሁማ አዋተ ጋርሳን ደእያ ሌወት ግምብዶሶና። ኤንታ ማታን ደእያ በሳ ቅኣላ ዎራዳስ ባጋ ሃርያ ሀሻብ ባ ዎራዳ ሱንን ግምብስ።18እያፐ ካልድ ሄናዳዳ ናአይ፥ ቅኣላ ዎራዳስ ናምአን ባጋ ሃርያ ባው ግምብዶሶና።19ኤንታ ማታን ደእያ በሳ እያሱ ናአይ፥ ምፅጳ ዎራዳ ሃርያ ኤዘር ግምብስ። እ ኦላ ሚሸ ዎያ ኬፈ ስን ባጋራ ግምብያ ማዛንያ ጋካናዉ ደእያ በሳ ግምብስ።20እያፐ ካለይሳ ዛባያ ናአይ ባሮክ፥ ግምብያ ማዛንያፐ ብድ፥ ካህነ ሀላቃ ኤልያሴባ ኬ ፐንግያ ጋካናዉ ደእያ በሳ ግምብስ።21እያፐ ካለይሳ ሀቆፃ ናኣ ግድዳ ኡራያ ናአይ ማረሞት ኤልያሴባ ኬ ፐንግያፈ ዶምድ፥ ዉርሰ ጋካናዉ ደእያ በሳ ግምብስ።22እያፐ ካልድ ደኤይሳ ሄራን ደእያ ካህነት ግምብዶሶና።23ኤንታፈ ካልድ ብንያመይነ ሀሹብ ባንታ ኬ ስንን ደእያ በሳ ግምብዶሶና። ኤንታፈ ካልድ አናንያ ናአ ግድዳ ማእሰያ ናአይ አዛር ባ ኬ ስንን ደእያ በሳ ግምብስ።24እያፐ ካልድ አዛራ ኬፈ ብድ፥ ግምብያ ማዛንያ ጋካናዉ ደእያ በሳ ሄናዳዳ ናአይ በኑይ ግምብስ።25ኡዛያ ናአይ ፓላል ግምብያ ማዛንያፐ ዶምድ፥ እ ናገይሳታ ዳባባ ማታን ደእያ ቆሞ ባጋ ካዎ ጋ ናጎ ግምብያ ጋካናዉ ደእያ በሳ ግምብስ። እያፐ ካልድ ደኤይሳ ፓኖሰ ናአይ ፓዳይነ26ኦፌላ ደርያ ቦላ ደእያ ፆሳ ኬ አይለት ግምብዶሶና። ኤንቲ ሃ ፐንግያ ማታን ዶሎሀ ባጋን ደእያ በሳነ ናጎ ግምብያ ጋካናዉ ደእያ በሳ ግምብዶሶና።27ኤንታፈ ካልድ ታቆሀ ካታማ አሳይ ግምብያ ስንን ደእያ በሳፈ ብድ፥ ኦፌላ ማታን ደእያ ግምብያ ጋካናዉ ደእያ በሳ ግምብዶሶና።28ፓራ ፐንግያፈ ቆሞ ባጋን፥ ባንታ ኬ ስንን ደእያ በሳ ካህነት ግምብዶሶና።29ኤንታፈ ካልድ እመራ ናአይ ሳዶቅ ባ ኬ ስንን ደእያ በሳ ግምብስ። እያፐ ካልድ ዶሎሀ ፐንግያ ናግያ ሳካና ናአይ ሻማየይ ግምብስ።30እያፐ ካልድ ሳላማ ናአይ ሀናንነ ዛላፋ ኡሱፑን ናአ ግድዳ ሀኑኒራ ግምብዶሶና። ኤንታፈ ካልድ ባራካ ናአይ ማሱላም ባ ክፍልያፐ ስንን ደእያ በሳ ግምብስ።31እያፐ ካልድ ፆሞሶ ፐንግያ ስንን ደእያ ፆሳ ኬ ኦሳንቾታነ ዛልአንቾታ ኬ ጋካናዉ ደእያ በሳ ዎርቃ ሼሽያ ማልከይ ግምብስ። ቃስ እ ግምበ ማዛንያስ ቦላ ባጋራ ደእያ በሳካ ግምብስ።32ማዛንያስ ቆሞ ባጋ ክፍልያፐነ ዶርሳ ፐንግያፈ ግዶን ደእያ በሳ ዎርቃ ሼሸይሳትነ ዛልአንቾት ግምብዶሶና።