Read እዮባ ማፃፋ 21

እዮባ ማፃፋ21gof_etw

እዮባ ሃሳያ

¹ያትን እዮብ ሀይሳዳ ያግድ ዛርስ፤²አነ ታ ኦዳ አኬክድ ስእተ፤ሄስ ህንተ ታና ምንዳ መላ ግዶ።³ታኒ እስ ቶሆ ኦደታና መላ ታዉ ዎደ እምተ፤ታኒ ሃሳያ ስምኮ ታና ቀልቅስተ።⁴ታኒ ሞተተይ አሳራ ግደና።ያትን፥ ዳንዳአይ ዉርኮ ሄስ ማላልስዬ?⁵አነ ታና ፄልድ ማላለትተ፤ህንተ ኩሽያ ህንተ ዶና ቦላ ዎተ።⁶ታ ሄሳ ቆፕያ ዎደ ታና ዳጋንስ፤ታ አሳተይ ኮኮሬስ።⁷ኢታ አሳት አይስ ፓፃ ደኦና?ኤንታ ላይይ አይስ አዱቂ?ኤንታ ዎልቃይ አይስ ዳር ዳር ብዴ?⁸ኤንታ ናይትነ ናይታ ናይት፥ድጭሽንነ እንጀን ደእሽን ኤንቲ አይስ በኦና?⁹ኤንታ ሶይ ህርግ ባይና ሳሮ ደኤስ፤ፆሳ ፃምአይ ኤንታ ጋከና።¹⁰ኤንታ ሚዛት ብራይስ ኤክድ ኮፆኮና፤የልሸ አዉጫዮኮና።¹¹ባንታ ናይታ ዶርሳ ዉደዳ ከሶሶና፤ኤንታ ናይት ዱሮሶና።¹²ካራቦ ባቅሸ ዲ ዲፅሸ፥ሱሱልኤ ፑንሸ ኡፋይሳን የፆሶና።¹³ኤንቲ ባንታ ደኦ ላይ እንጀን ደእድ፥ዱፎ ሳሮራ ቦሶና።¹⁴ግዶሽን፥ ኤንቲ ፆሳኮ “ኑፐ ሃካ!ኑኒ ነ ኦግያ ኤራናዉ ኮዮኮ” ያጎሶና።¹⁵“ኑ እያ ጎይናናዉ ኡባ ዳንዳእያ ፆሳይ ኦኔ?ኑ እያ ዎስድ አይ ጎኤታኔ?” ያጎሶና።¹⁶ኤንቲ ዱረተ ባንታ ምኖተን ደምዳ ጎሶና፤ሽን ታኒ ኤንታ ቆፋ ኤክከ።

¹⁷“ሀኖሽን፥ ኢታ አሳ ፆምፐይ ቶኢ?ኤንታና ቦሽ ጋክ ኤሪ?ፆሳይ ባ ሀንቁዋን ኤንታ ሴር ኤሪ?¹⁸ጫርኮይ ኤንታ ካለዳ ኤፍዳ ዎደይ፥ጎተይ ኤንታ ባናዳ ደንዳ ዎደይ ደኢ?¹⁹ህንተ፥ ‘ፆሲ አዋታ ባላ ግሾ ኤንታ ናይታ ሴሬስ’ ያጌታ።አነ ፆሳይ ናጋራንቾታ ኤንታ ሁጰን ሴሮ፤ያትኮ ኤንቲ ባንታ ናቁዋ ኤራና።²⁰ናጋራንቾት ባንታ ሴራ ባንታዉ ኤኮ፤ኡባ ዳንዳእያ ፆሳ ሀንቆይ ኤንታ ቦላ ዎ።²¹አስ ሀይቅዳፐ ጉየ፥ባ ናይታባ አይ ኤሪ?

²²“ቃ በሳን ደኤይሳታ ፕርድያ ፆሳ፥ኤራተ ታማርሳናዉ ዳንዳእያ አስ ደኢ?²³እስ እስ አስ ኩመ ዎልቃይነ ሳሮይ ደእሽን፥እንጀ ዱሱ ደእሸ ሀይቆሶና።²⁴ኤንታ አሳተይ ኦርደ ሽን፥ኤንታ መቀ ኮልዘይ ሽጫ ደእሽን ሀይቆሶና።²⁵ሽን ሀራት ሎኦባ በኦና፥መቶን ኡንኤትድ ካዮትዳ መላ ሀይቆሶና።²⁶ናምአይካ ሀይቅድ ቢታን ሞገቶሶና፤ኤንቲ ጉፁንቶሶና።

²⁷“ህንተ ታና ቆሀናዉ ቆፕድ፥ህንተ ዎዛናን ቆፕዳ ቆፋ ታ ሎይዳ ኤራይስ።²⁸ህንተ፥ ‘ሄ ግታ ኡራ ኬይ አዉኔ?ኢታ ኦያ ኡራይ ደእያ ሶይ አዉኔ?’ ያጌታ።²⁹ኦገ አሳታ ኦይችቤከቲ?ኤንታ ማርካተ አማንበከቲ?³⁰ኤንቲ፥ ‘ኢታ አሳይ ዮ ጋላስ ቆሄቶኮና፤ፆሳ ሀንቆይ ቆንጭያ ጋላስ ኤንቲ አታና’ ያጎሶና።³¹ኢታ አስ እያ ኢታተ ግሾ ካጫናይ ኦኔ?እያ ኦሱዋ ግሾ እያ ሴራናይ ኦኔ?³²እ ሀይቅን፥ እያ አሀ ዱፎ ኤፎሶና፤እያ ዱፎይ ቦንቾን ናገቴስ።³³ዛንጋራ ቢታይ እያዉ እንጀቴስ፤ዳሮ አሳይ እያ ስንን ቦሶና፤ታይቦይ ባይና አሳይ እያ ካሎሶና።³⁴ያትን፥ ህንተ ታና ፓና ቃላን ዋት ምንኔ?ህንተ ታ ኦይሻስ ዛርያ ዛሮ ኡባይ ዎርዶ” ያግስ።

እዮባ ማፃፋ 21 / gof_etw

እዮባ ሃሳያ

እዮባ ማፃፋ21gof_etw