Read እዮባ ማፃፋ 20

እዮባ ማፃፋ20gof_etw

ሶፋራ ሃሳያ

¹ናእማ ቢታ አስ ግድዳ ሶፋር ሀይሳዳ ያግድ ዛርስ፤²“ነ ኦዳይ ታና ላንጭስዳ ግሾ፥ታ ኤለሳዳ ነ ኦዳስ ዛሮ እማና።³ነ ኦዳይ ታ ቦንቹዋ ቃርያ ግሾ፥ታ አኬካይ ነዉ ዛሮ እማና መላ ታና ደንስ።⁴አስ ቢታ ቦላ ደእዳ ዎደፐ ዶምድ፥በንፐ ሀንዳባ ኤራሳ።⁵ኢታ አሳ ጬቆይ ቃን ዎደሳ፤ፆሳ ኤሮና አሳ ኡፋይሳይ ጉ ዎደሳ።⁶ኢታ አሳ ኦቶሮይ ሳሎ ጋካናዉ ቁ ጊኮካ፥እያ ሁጰይ ሻራ ጋክድ ቦችኮካ፥⁷እ ባና መላ ፕተትድ ያና፤እያ ካሰ ኤርያ አሳይ ‘እ አዉን ደኢ?’ ያጋና።⁸ኤልሞዳ ፓልድ ያና፤ ስሚድ በንተና፤ቃማ አሙሆዳ ጮ ያና።⁹እያ ካሰ በእዳ አይፈት ዛሪድ እያ በኦኮና፤እ ባ ደእያ በሳፈ ትምእ ግድ ያና።¹⁰አዋይ ቦንቅ ኤክዳ ሚሸ፥እያ ናይት ባንታ ኩሸን ጉየ ዛራና።¹¹እያ መቀ ኩምዳ ናአተ ዎልቃይእያራ እስፈ ቢታን ዝንአና።

¹²“ኢታተ እያ ዶናን ማልእኮ፥እ ባ እንፃርሳፈ ጋርሳን ቆስኮ፥¹³ዉሮናዳ ባ ዶናን ኦይክድ፥ዎ አግኮ፥¹⁴እያ ኡሉዋን ጫሞ ግዳና፤ዎያ ሾሻ ማርዘ ግዳና።¹⁵ኢታ አስ ምትዳ ሻሉዋ ዛር ጩታና፤እያ ኡሉዋን ደእያ ኡባ ፆሳይ ጮሻና።¹⁶ኢታ አስ ምያባይ እያዉ ማርዘ ግድድ፥እያ ዎና።¹⁷ኤስነ ማ ሃዳ ጎግሽን፥እ በኦና አታና።¹⁸ባ ዳቡራ አይፍያ ሞና ሀራስ እማና፤ዛልእድ ዎስዳ ዎያን ኡፋይተና።¹⁹ሄስ ሀንዳይ እ ማንቆታ ኡንኤዳ ግሾነሀራ አስ ኬፅዳ ኬ ቦንቅዳ ግሾሳ።

²⁰“እያ ኢታ አሞይ ሸምፖ ድግስ፤ሺሽዳ ሻሎይ እያ አሻናዉ ዳንዳኤና።²¹እያ ሻሎይ ዉርያ ግሾ፥እያ ዱረተይ ጋምኤና።²²እያዉ አቆይ ኩምድ ደእሽን፥መቶይ አኬኮና እያ ቦላ ጋክ ዎና።²³እያ ኡሎይ ካልያ ዎደ፥ፆሳይ ዎልቃማ ሀንቁዋ እያ ቦላ ጉሳና።²⁴ብራታ ማሻፈ እ ባቃታና፤ሽን ናሰ ብራታ ዶንገይ እያ ጫዳና።²⁵ሄ ዶንገይ እያ ዞኮራ ካን ከያና፤ጶልያ ፄራይ እያ ትርያ ካን አና፤ዳጋም እያ ዎዛና ዋባቅሳና።²⁶እ ሺሽዳ አቆይ ሳካና ማን ያና፤አስ ኦይቦና ታም እያ ማና፤እያ ኬን አትዳ ሻሎ ኡባ ፁጋና።²⁷ሳሎት እያ ናጋራ ቆንጭሳና፤ሳእካ እያዉ ሞርከ ግዳና።²⁸ፆሳ ሀንቆ ጋላሳን፥እያ ኬነ እያዉ ደእያባ ድኦይ ኤፋና።²⁹ፆሳይ ጌላታስ ዎዳ ቃዳይ፥ኢታ አሳስ ጊግስዳ ጋተይ ሀይሳ” ያግስ።

እዮባ ማፃፋ 20 / gof_etw

ሶፋራ ሃሳያ

እዮባ ማፃፋ20gof_etw