ፅሎ አጫ
1“ታ ሄን በሳን ደእያ ዶርሳታ ይስያነ ላልያ ሄንንቾታ አየ!” ያጌስ ጎዳይ።2ጎዳይ፥ እስራኤለ ፆሳይ፥ ባ አሳ ሄምያ ሄንንቾታ ሀይሳዳ ያጌስ፦ “ህንተ ታ ዶርሳታ ላልዳ ግሾ፥ ጎድዳ ግሾ፥ ናግቦና ግሾነ ህንተ ኦዳ ህንተ ኢታ ኦሱዋ ግሾ ታ ህንተና ሴራና።3ታ ዉድያፐ አትዳይሳታ ታ ካሰ ላልዳ ቢታ ኡባፈ ታ ሁጰን ሺሻና። ኤንታ ጉየ ኤንታ ሄን በሳ ዛራና፤ ኤንቲ ያን የለትድ ዳራና።4ኤንታ ሎይድ ሄምያ ሄንንቾታ ኤንታዉ ሹማና። ኤንቲ ዛሪድ ያዮኮና፤ ዳጋሞኮና፤ ኤንታፈ እሶይካ የና” ያጌስ ጎዳይ።5“ዳዊታ ኮቻፈ ፅሎ አጫ ደንና ዎደይ ያና። እ ካዎተ ጭንጫተን አይሳና፤ ቢታ ቦላ ሱረነ ፅሎ ኦና።6እያ ካዎተ ዎድያን ይሁድ አታና፤ እስራኤለይ ሳሮ ዳና። እያ ሱንይ፥ ‘ፆሳይ ኑ ፅሎተ’ ጌተታና” ያጌስ ጎዳይ።7ሄሳ ግሾ፥ “አሳይ፥ ‘እስራኤላ አሳ ግብፀ ቢታፈ ከስዳ ጎዳይ ኤርያ መላ’ ያግድ ጫቃናይሳ አግድ፥8‘እስራኤላ ኮቻ ፑደሀ ባጋ ቢታፈነ ኤንታ ላልዳ ቢታ ኡባፈ ኤህዳ ጎዳይ ኤርያ መላ’ ያግድ ጫቃና ዎደይ ያና። ሄሳፈ ጉየ፥ ኤንቲ ባንታ ቡዞ ቢታን ዳና” ያጌስ ጎዳይ።ዎርዶ ናበታ
9ናበታባ ታ ቆፕያ ዎደ ታ ዎዛናይ ዳቡሬስ፤ ታ መቀት ኮኮሮሶና። ጎዳ ግሾነ እያ ጌሻ ቃላ ግሾ ዎይነይ ፆንን ማትዳ አስ ግዳስ።10ቢታይ ላይማተን ኩምስ። ቃንገ ግሾ፥ ቢታይ ዬኬስ፤ ባዞ ሄን በሳት መልዶሶና። ናበት ኢታ ኦገን ሄመቶሶና፤ ባንታ ማታ ልከ ግዶና ኦገን ጎኤቶሶና።11“ናበትነ ካህነት ቱንዶሶና፤ ሀር አቶሽን ታ ኬን ኤንቲ ኦያ ኢታ ታ በአስ” ያጌስ ጎዳይ።12“ሄሳ ግሾ፥ ኤንታ ኦገይ ሀልፃና፤ ኤንቲ ማን የገታና፥ በትድ ኩንዳና። ኤንቲ ሴረትያ ዎደ ኤንታ ቦላ ጋዶ ኤሀና” ያጌስ ጎዳይ።13“ሳማረ ናበታ ግዶን ኢታባ በአስ። ኤንቲ ባኣለ ሱንን ትንብተ ኦዶሶና፤ ታ አሳ እስራኤለ ባለሶና።14ቃስ የሩሳላመ ናበታ ግዶንካ ሀይስ ዴፅያባ በአስ። ኤንቲ ላይማቶሶና፤ ዎርዶትድ ደኦሶና። ኦንካ ባ ኢታ ኦሱዋፐ ስሞና መላ ኤንቲ ኢታ ኦይሳታ ምንሶና። ኤንቲ ኡባይ ታዉ ሶዶማ መላ፤ የሩሳላመ አሳይ ጋሞራ መላ” ያጌስ ጎዳይ።15ሄሳ ግሾ፥ ኡባፈ ዎልቃማ ጎዳይ ናበታባ ሀይሳዳ ያጌስ፦ “የሩሳላመ ናበታ ዶናፐ ቱናባይ ከይድ፥ ቢታ ኡባን ላለትዳ ግሾ፥ ታ ኤንታ ጫምያ ካ ሙዛና፤ ኤንታ ዎያ ሃ ኡሻና” ያጌስ።16“ናበት ኦድያባ ስኦፕተ፤ ኤንቲ ሀኖና ኡፋይሳን ኩንሶና። ጎዳይ ኦዶናሽን ኤንቲ ባንታፈ መ ከስድ ቆንጨ ኦዶሶና።17ታና ካይሳታኮ፥ ‘ህንተ ሳሮ ዳና’ ያጎሶና፤ ቃስ ባንታ ዎዛና ኢታተ ካለይሳታኮ፥ ‘ህንተና ኢታባይ ጋከና’ ያጎሶና” ያጌስ ኡባፈ ዎልቃማ ጎዳይ።18“ሽን በአናዉ ዎይኮ እያ ቃላ ስአናዉ ጎዳይ ዞርያ በሳን ኤንታፈ ኦነ ኤቅዳይ? እያ ቃላ ስእዳይ ኦኔ?19ጎዳ ጎተይ ሀንቆን ደንዳና፤ ዎልቃማ ሆበይ ኢታታ ሁጵያ ሾጫና።20ባ ዎዛና ቆፋ ፖሎና ደእሸ፥ ጎዳ ሀንቆይ ስመና። ዉርሰ ዎድያን ሀይሳ ህንተ አኬካና።21ታ ሀ ናበታ ኪታብከ፤ ሽን ኤንቲ ባንታ ኪታ ኤክድ ዎፆሶና። ታ ኤንታዉ ኦዳብከ፤ ሽን ኤንቲ ትንብተ ኦዶሶና።22ኤንቲ ታ ዞርያ በሳን ኤቅዳባ ግድያኮ፥ ታ ቃላ፥ ታ አሳስ ኦዳናሽን። ኤንቲ ኢታ ኦግያፐነ ኤንታ ኢታ ኦሱዋፐ ዛራናሽን” ያጌስ ጎዳይ።23“ታ ማታ ፃላላ ፆሴ? ሃሆ ፆሲ ግድክና?24ታ በኦናዳ፥ አስ ጌማ በሳን ባና ቆሳናዉ ዳንዳኢ? ሳሎንነ ሳአን ኩምዳይ ታና ግድክና?” ያጌስ ጎዳይ።25“ታ ሱንን ዎርዶ ትንብተ ኦደይሳት ግያባ ስአስ። ኤንቲ፥ ‘ታ አሙሆ በአስ፤ ታ አሙሆ በአስ’ ያጎሶና።26ሀ ናበት ባንታዉ መድ ከስድ ኦድያ ዎርዶ ትንብተይ ኤንታ ዎዛናን አዉደ ጋካናዉ ጋምአኔ?27ኤንታ አዋት ባኣለ ኤቃ ጎይንድ ታ ሱን ዶግዳይሳዳ፥ ኤንቲ እሶይ እሱዋስ ኦድያ አሙሁዋን፥ ታ አሳይ ታ ሱን ዶጋና መላ ኦናዉ ቆፖሶና።28አሙሆ አሙህያ ናበይ ባ አሙሁዋ ኦዶ፤ ሽን ታ ቃላ ስእያ ናበይ ታ ቃላ አማነትድ ኦዶ። ዳልነ ግስተይ አዉን ጋሄቲ?29ታ ቃላይ ታማ መላ ግደኔ? ዛላ መንረያ ናርቃ መላ ግደኔ?” ያጌስ ጎዳይ።30“ሄሳ ግሾ፥ ታ ቃላ እሶይ እሱዋፈ ካይሶትድ ታፐ ኤክዳ ዳንስድ ትንብተ ኦድያ ናበታ ታ እፃይስ።31ሄሳዳካ፥ ባንታ ዎዛና ቆፋ ኦድሸ፥ ‘ጎዳይ ያጌስ’ ግያ ናበታካ ታኒ እፃይስ።32ዎርዶ አሙህሸ ትንብተ ኦድያ ናበታ ቦላ ታ ደንዳና። ኤንቲ ባንታ አሙሁዋን ካትድ ትንብተ ኦድያ ናበታ ታኒ እፃይስ። ታ ኤንታ ኪቶናሽን ዎይኮ ሹሞናሽን ዎርዶ ትንብተ ኦዶሶና፤ ታ አሳ ባለሶና። ኤንቲ ሀ አሳ አይኮካ ማዶኮና” ያጌስ ጎዳይ።ጎዳ ኪታ
33“ጎዳይ ታኮ፥ ‘ሀ አሳይ ዎይኮ ናበይ ዎይኮ ካህነይ፥ ጎዳ ኪታይ አይቤ?’ ግድ ኦይችኮ፥ ነ ኤንታኮ፥ ‘ጎዳይ፥ ታ ህንተና ሆላና’ ያጌስ” ጋዳ ኦዳ።34“ናበይ ዎይኮ ካህነይ ዎይኮ አሳይ፥ ‘ሀይስ ጎዳ ኪታ’ ያግድ ኦድኮ፥ ታ ሄ አድያነ እያ ሶ አሳ ሴራና።35ሄሳ አግድ እሶይ እሶይ፥ ‘ጎዳይ ዎይግዴ? ዎይኮ ጎዳይ አይ ኦድዴ?’ ያግድ ባ ላገታነ ባ ዳቦታ ኦይቻናዉ በሴስ።36ህዛፐ ኦንካ፥ ‘ጎዳ ኪታ’ ያግድ ዛሪድ ኦደታናዉ በሰና። ሄሳ ግሾ፥ እያ ዶናፐ ከይያ ቃላይ እያዉ ኪታ ግድያ ግሾ፥ ደኦ ፆሳ፥ ኡባፈ ዎልቃማ ጎዳ፥ ኑ ፆሳ ቃላ ህንተ ምርቄታ።37ኔኒ ናበታኮ፥ ‘ጎዳይ ህንተና ዎይግዴ?’ ዎይኮ ‘አይ ኦድዴ?’ ያጋዳ ኦይቻናዉ በሴስ።38ሽን ህንተ፥ ‘ሀይስ ጎዳ ኪታ’ ጊኮ፥ ጎዳይ ሀይሳዳ ያጌስ፦ ታኒ ህንተና፥ ‘ሀይስ ጎዳ ኪታ ጎፕተ’ ያግንካ ህንተ፥ ‘ሀይስ ጎዳ ኪታ’ ግደታ።39ሄሳ ግሾ፥ ታ ህንተና ዶጋና፤ ህንተናነ ህንተ አዋታስ እምዳ ካታማ ኩመ ታ ስንፈ ድጋና።40ታ ህንተ ቦላ መርና ካዉሻነ ዶገቶና ዬላ ኤሀና” ያጌስ ጎዳይ።