ምናሰነ ኤፍሬማ
1ሄሳፈ ጉየ፥ አሳይ፥ “ነ አዋይ ሳከቴስ” ያግድ ዮሰፋስ ኦድዶሶና። እ ባ ናምኡ አደ ናይታ ምናሰነ ኤፍሬማ ኤክድ ባ አዋ በአናዉ ብስ።2ያይቆብ፥ እያ ናአይ ዮሰፍ ይዳይሳ ስእዳ ዎደ፥ እስራኤለይ ባና ምንድ ሂፃን ኡትስ።3ያይቆብ ዮሰፋ፥ “ኡባ ዳንዳእያ ፆሳይ ካናነ ቢታን ሎዛ ካታማን ታዉ ቆንጭድ፥ ታና አንጅስ።4እ ታና፥ ‘ታኒ ነ የለተ ዳርሳና፥ ነና ዳሮ ደረ ኦና። ሀ ቢታ ታኒ ኔፐ ጉየ፥ ነ ሼሻስ መርና ላታ ኦዳ እማና’ ” ያግስ።5“ህዛ፥ ነ ናምኡ አደ ናይት፥ ታኒ ኔኮ ሃ ያናፐ ስን ግብፀን ነዉ የለትዳይሳት ታባ። ኤፍሬመይነ ምናሰይ ታዉ ሮቤላ መላነ ስሞና መላ።6ኤንታፈ ጉየ የለታናይሳት ነባ ግዶ። ኤንቲ ላታና ቢታይ ኤፍሬማ ሱንንነ ምናሰ ሱንን ግዶ።7ታኒ ማሰጰፆመፐ ስምሽን፥ ኤፍራታ ጋካናዉ ጉ አትሽን፥ ራሄላ ካናነ ቢታን ሀይቃሱ። ታኒ እዮ ቤተለመ ጌተትያ ኤፍራታ ኤፍያ ኦግያ ጋፃን ሞጋስ” ያግስ።8እስራኤለይ ዮሰፋ አደ ናይታ ናምአታ በእዳ ዎደ፥ “ሀይሳቲ ኦናንቴ?” ያግድ ኦይችስ።9ዮሰፍ ባ አዋኮ፥ “ሀይሳቲ ፆሳይ ታዉ ሀ ቢታን እምዳ ናይታ” ያግስ። ያትን እስራኤለይ፥ “ታኒ ኤንታ አንጃና መላ፥ ኤንታ ታኮ ሃ ሺሻ” ያግስ።10እስራኤለይ ጭምን እያ አይፈይ እፅዳ ግሾ፥ ፄላናዉ ዳንዳኤና። ሄሳ ግሾ፥ ዮሰፍ ባ አደ ናይታ እያኮ ሺሽን፥ ያይቆብ ኤንታ እድምድ ዬርስ።11እስራኤለይ ዮሰፋ፥ “ታኒ ነ አይፍያ በአና ጋዳ ቆፓብከ፥ ሽን ፆሳይ ሄኮ ነ ናይታካ ታና በስስ” ያግስ።12ዮሰፍ ባ ናይታ ያይቆባ ጉልባታፐ ደንድ፥ ባ ሶምኡዋ ሳአ ጋድ ዝግስ።13ዮሰፍ ባ ናምኡ አደ ናይታ፥ ኤፍሬማ እስራኤለስ ሀድርሳ ባጋራ፥ ምናሰ እስራኤለስ ኡሻቻ ባጋራ ኤስስ።14እስራኤለይ ባ ኩሽያ ባርባፅድ ኤፍሬም ካሎ ግድኮካ፥ ባ ኡሻቻ ኩሽያ ሁጰን ዎስ። ምናሰይ ባይራ ግድኮካ፥ እስራኤለይ ባ ሀድርሳ ኩሽያ ምናሰ ሁጰን ዎስ።15ሄሳፈ ጉየ፥ ያይቆብ ዮሰፋ ሀይሳዳ ያግድ አንጅስ፤“ታ አዋት አብራሃመይነ ይሳቅ፥እያ ስንን ደእዳ ፆሳይ፥ታ ደኦ ኡባን ሀች ጋካናዉ ታና ሄምዳ ፆሳይ ነና አንጆ።16ኢታባ ኡባፈ ታና አሽዳ፥እያ ኪታንቾይ፥ ሀ ናይታ ናጎ።ታ ሱንይነ፥ታ አዋታ አብራሃመ ይሳቃ ሱንይ ኤንታን ፄገቶ።ኤንቲ ሳአ ቦላ ዳሮ”ያግድ አንጅስ።17ዮሰፍ ባ አዋይ ባ ኡሻቻ ኩሽያ ኤፍሬማ ሁጰን ዎዳይሳ በእዳ ዎደ ዶስቤና። ሄሳ ግሾ፥ ኤፍሬማ ሁጵያፐ ደንድ፥ ምናሰ ሁጰን ዎናዉ ባ አዋ ኩሽያ ኦይክስ።18ዮሰፍ፥ “ታ አዋዉ፥ ሄሳ ግደና። ባይራይ ሀይሳ ነ ኡሻቻ ኩሽያ እያ ቦላ ዎ” ያግስ።19ሽን እያ አዋይ እፅድ፥ “ታ ኤራይስ፥ ታ ናአዉ፥ ታ ኤራይስ። ምናሰይካ ግታ ደረ ግዳና፥ ሽን እያ ካሎ እሻይ እያፐ አድ ግታታና። እያ ሼሻይካ ዳሮ ግታ ካዎተ ግዳና” ያግስ።20እ ሄ ጋላስ ኤንታ አንጅሸ፥“እስራኤለት አንጆ አንጅያ ዎደ፥‘ፆሳይ ህንተና ኤፍሬማዳነ ምናሰዳ ኦ’ያግድ ህንተ ሱንን አንጃና” ያግስ።ያትድ ኤፍሬማ ምናሰፐ ስንይስ።21ሄሳፈ ጉየ፥ እስራኤለይ ዮሰፋ፥ “ታኒ ሀይቃናዉ ማታስ፥ ሽን ፆሳይ ህንተራ ደኤስ። እ ህንተ አዋታ ቢታ ህንተና ጉየ ዛራና።22ታኒ አሞረታፐ ታ ማሻንነ ታ ዶንገን ኤክዳ ቢታ፥ ነ እሻታራ ነ ሻከታዳ ኤክያ ቢታ ቦላ ነዉ ጉጃዳ እማስ” ያግስ።