ሃም ካቀትስ
1ካዎይነ ሃም አስትር ግብራ ማናዉ ብዶሶና።2ሄ ናምአን ጋላስ ግብራስ ብድ፥ ኤንቲ ዎይነ ኡሻ ኡይሽን፥ ካዎይ፥ “ካወ አስትረ፥ ኔኒ ዎስያባይ አይቤ? ታኒ ነዉ እማና። ኔኒ ታና ኦይችያባይ አይቤ? ሀር አቶሽን ታ ካዎተፈ ባጋ ግድኮካ፥ ታኒ ነ ኦይሻ ፖላና” ያግድ ኦይችስ።3ካውያ አስትራ ዛራዳ፥ “ካዋዉ፥ ኔኒ ታናን ኡፋይትዳባ ግድኮ፥ ቃስ ታ ኦይሻካ ፖላናዉ ዶስያባ ግድኮ፥ ታ ዎሳይነ ታ ኦይሻይ ታነ ታ አሳይ ሀይቆና አታና መላሳ።4ታነ ታ አሳይ እሶይካ አቶና ኡባይ ሀይቆስ ባይዘትዳ። ኑኒ ባይዘትዳይ ማጫ አይለነ አደ አይለ ግድድ ደአናሳ ግድያኮ፥ ታኒ ስእ ጋና። ሄሳ መላ መቶይ ካዋ ዋይሳናዉ በሲያባ ግደና” ያጋሱ።5ካዎይ አርፀክስስ ዛሪድ፥ “ሄሳ ኦናዉ ፃልታምዳይ ኦኔ? እ ሄ አደይ አዉን ደኢ?” ያግድ ካውዉ አስትሮ ኦይችስ።6አስትራ፥ “ኑ ሞርከይ፥ ኑና ይሳናዉ ኮየይ፥ ሀ ኢታ አድያ ሃማ” ያጋሱ። ሄ ዎደ ሃም ካዋ ስንንነ ካወ ስንን ዳሮ ዳጋምስ።7ካዎይ ዳሮ ሀንቀትድ፥ ባ ኡትዳ በሳፈ ደንድ፥ ካዎ ጋ አታክልተ በሳ ብስ። ሽን ሃም ካዎይ እያ ቦላ ኢታባ ኤሀናዉ ቆፕዳይሳ ኤርዳ ግሾ፥ አስትራ እያ ሀይቆፐ አሻና መላ ዎሳናዉ ጉየ አትስ።8ካዎይ አታክልተ በሳፈ ስሚድ ገልያ ዎደ፥ ሃም ካዊዉ አስትሮ ማሮታ ዎሳናዉ፥ እያ ኡትዳ አርሳ ቦላ ጉፋንዳይሳ በእስ። ካዎይ ይሎ ኤፅድ፥ ባ ቃላ ቁ ኦድ፥ “ላ ሀ አደይ ሀይሳን ካዎ ኬን፥ ታ ስንን፥ ካውዉ ካዉሻናዉ ኮይዬ?” ያግስ። ካዎይ ቡሮ ሄሳ ሃሳይሽን፥ ካዎ ሹፋት ይድ፥ ሃማ ሶምኡዋ ጎዝዶሶና።9ኤንታፈ እሶይ፥ ሀርቦና ጌተትያ ሹፋይ፥ “ካዋዉ፥ ሃም ነና ሀይቆፐ አሽዳ ማርድክዮሳ ካቃናዉ ኤስዳ እሻታሙ ዋ ም እያ ሶን ደኤስ” ያግስ። ካዎይ ዛሪድ፥ “ሃማ ኤፍድ፥ ሄ ምን ካቅተ” ያግድ ኪትስ።10ሄሳ ግሾ፥ ማርድክዮሳ ካቃና ግድ ጊግስዳ ምን ሃም ካቀትስ። ሄሳፈ ጉየ፥ ካዋ ሀንቆይ ዶችስ።