ጳዉሎሳ ዛሩዋ
1አግርጵ ጳዉሎሳኮ፥ “ኔኒ ነባ ኦዳናዉ ዳንዳኣሳ” ያግስ። ሄ ዎደ ጳዉሎስ ባ ኩሽያ ደንድ ሀይሳዳ ያግስ፦2“ካዋዉ፥ አግርጳ፥ አይሁደት ታና ሞትዳባስ ዛሮ እማናዉ ሀች ነ ስንን ኤቃሸ ታ ቃዳይ ሎኦ ጋዳ ቆፓይስ።3ኔኒ አይሁደ ዎጋነ ፓላማ ሎይዳ ኤርያ ግሾ ታና ሳለቶና ስአና መላ ነና ዎሳይስ።4“ታኒ ናአተፈ ዶማዳ ታ አሳ ግዶንነ የሩሳላመን ደእዳ ታ ደኡዋ አይሁደ ኡባይ ኤሮሶና።5ታኒ ኮይሮፐ ዶማዳ፥ ኑ ሀይማኖተ ህግያ ምንድ ናግያ ፋርሳወታ ያራፐ ግደይሳ ኤንቲ ማርካታናዉ ኮይኮ ኤሮሶና።6ሀእካ ታኒ ፆሳይ ኑ አዋታስ እማና ግዳ ኡፋይሳ ናግያ ግሾ ሞተታዳ ሀይሳን ኤቃስ።7ቃስ ታማነ ናምኡ ኑ አዋታ ሼሻይ ፆሳ ቃማነ ጋላስ ምንድ ጎይንሸ ፆሳይ እማና ግዳይሳ ኤካናዉ ኡፋይሳን ናጎሶና። ካዋዉ አግርጳ፥ አይሁደት ታና ሞተይ ታኒ ኡፋይሳን ሄሳ ናግያ ግሾሳ።8አይሁደቶ፥ ፆሳይ ሀይቅዳይሳታ ደንይሳ አይስ አማነከቲ?9“ካሰ ታኒ ታ ሁጰንካ ናዝረተ የሱሳ ሱን ተቃናዉ ዳንዳኤትዳባ ኡባ ኦናዉ በሴስ ጋዳ ቆፓስ።10ታኒ የሩሳላመን ኦዳይ ሀይሳ። ካህነ ሀላቃታፐ ማታ ኤካዳ ፆሳ አሳታፐ ዳሮታ ቃሽሳስ። ኤንታ ዎያ ዎደካ ኤንታ ሀይቁዋ ዶሳስ።11ዳሮ ዎደ አይሁደ ዎሳ ኬ ኡባን ኤንቲ ሴረታና መላነ የሱሳ ጫይድ ካዳና መላ ኡንኤስ። ታኒ ዎግ ባይና ኤንታ ሀንቀታዳ ሀር አቶሽን፥ ሀራ ቢታ ካታማታ ጋካናዉ ኤንታ ጎዳስ።12“ታኒ ሀ ኦዳስ ካህነ ሀላቃታፐ ማታነ ኪታ ኤካዳ ዳማስቆ ባይስ።13ካዋዉ፥ ታኒ ሴታ ጋላስ ኦገን ደእሽን አዋ ፖኦፐ ዳሮ አያ ፖኦይ ታ ዩሹዋንነ ታራ በይሳታ ዩሹዋን ሳሎፐ ፖእስ።14ኑኒ ኡባይካ ሳአን ኩንድዳ ዎደ እብራወ ዶናን፥ ‘ሳኦላ፥ ሳኦላ፥ ታና አይስ ጎዳይ? ኔኒ፥ ነና ጫድያ ብራታ ፃምአ ቃክኮ ነና ቆሃሳ’ ያግድ ታዉ ኦድሽን ስአስ።15“ታኒ፥ ‘ጎዳዉ፥ ኔኒ ኦኔ?’ ያጋስ። “ጎዳይ፥ ‘ታኒ፥ ኔኒ ጎድያ የሱሳ፤16ሽን ደንዳ ኤቃ። ሀች ኔኒ ታና በእዳይሳንነ ስንፈ ታ ነዉ በሳናይሳ ሀራታስ ማርካታና መላ ታ ኦሳንቾ ኦዳ ነና ሹማናዉ ነዉ በንታስ።17እስራኤለ አሳታፐነ ታኒ ነና ኤንታኮ ኪትያ አይሁደ ግዶናይሳታፐ ነና አሻና።18ኔኒ ኤንታ አይፍያ ዶያና፥ ማፐ ፖኦኮ፥ ፃላሄ ኩሸፐ ፆሳኮ ኤንታ ዛራና። ኤንቲ ታናን አማንድ ናጋራ አቶተ ኤካና። ፆሳይ ዶርዳ አሳ ግዶን ባንታ ላታ ደማና’ ያግስ።19“ካዋዉ አግርጳ፥ ሄሳ ግሾ፥ ታዉ ሳሎፐ በንትዳ ቆንጨስ ኪተታናይሳ እፃብከ።20ሽን ታኒ ኮይሮታዳ ዳማስቆን ሄሳፈ ጉየ የሩሳላመንነ ይሁዳ ቢታ ኡባን ደኤይሳትነ አይሁደ ግዶናይሳት ባንታ ናጋራፐ ፆሳኮ ስማና መላነ ናጋራፐ ስሙዋ በሲያ ኦሶ ኦና መላ ቃላ ኦዳስ።21ሄሳ ግሾ፥ አይሁደት ታና ፆሳ ኬን ኦይክድ ዎናዉ ኮይዶሶና።22ሀች ጋካናዉ ፆሳ ማደይ ታፐ ሻከትቤና፤ ያንያ ግሾ፥ ጉስነ ግታስ ማርካታሸ ሀይሳን ኤቃስ። ናበትነ ሙሰይ ሀናና ግድ ኦድዳይሳፈ ሀራ እስባካ ታኒ ኦድዳባይ ባዋ።23ሄስካ፥ ‘ክርስቶስ ዋየ ኤካናዉ በሴስ፤ ቃስ ሀይቆፐ ኮይሮ ደንድድ አይሁደታስነ አይሁደ ግዶናይሳታስ አቶተ ፖኦ ኦዳናዉ በሴስ’ ግዳይሳ” ያግስ።24ጳዉሎስ ሄሳ ያግድ ዛርሽን፥ ፍስፆስ ባ ቃላ ቁ ኦድ፥ “ጳዉሎሳ፥ ነ ጎያዳሳ፤ ነ ዳሮ ትምርተይ ነና ጎሻተስ ጋስ” ያግስ።25ሽን ጳዉሎስ፥ “ቦንቾ ፍስፆሳ፥ ታኒ ቱማባነ በሲያባ ኦዳይስፐ አትሽን፥ ጎያብከ።26ታኒ ቆንጨን ኦድያ ኦዳ ካዎይ ኤሬስ። ሀ ኦዳይ ጌማን ኦሰትቦና ግሾ እሶይካ እያፐ ጌሞናይሳ ታኒ ጌሻዳ ኤራይስ።27“ካዋዉ አግርጳ፥ ኔኒ ናበታ አማናሳ ግድኪ? ኔኒ አማነይሳ ታኒ ኤራይስ” ያግስ።28ካዎይ አግርጵ፥ ጳዉሎሳኮ፥ “ሀ ጉ ሳተን ታና ክርስታነ ኦናዉ ኮያይ?” ያግስ።29ጳዉሎስ፥ “ዳሮ ዎደ ግድን ጉ ዎደ ነ ፃላላ ግዶናሽን ሀች ታና ስእያ ኡባይ ሀ ቃሹዋፐ አትሽን፥ ታ መላ ግዳና መላ ፆሳ ዎሳይስ” ያግስ።30ሄሳፈ ጉየ፥ ካዎይ ፍስፆስ፥ ባርንቀይነ ኤንታራ ኡትዳ ኡባይካ ደንድዶሶና።31ያፐ ከይድ ብሸ እሶይ እሱዋራ፥ “ሀ ኡራይ ሀይቆስ ዎይኮ ቃሾስ ጋያባ አይኮካ ኦቤና” ያግድ ኦደትዶሶና።32አግርጵ ፍስፆሳኮ፥ “ሀ ኡራይ ‘ቄሳረይ ታባ ፕርዶ’ ጎናኮ ብለታናዉ ዳንዳኤስ ሽን” ያግስ።