ኡፋይሳን እሞባ
1ኑ እሻቶ፥ ፆሳይ ማቀዶንያን ደእያ ዎሳ ኬታስ እምዳ አ ኬሀተባ ህንተ ኤራና መላ ኑ ኮዮስ።2ኤንቲ ግታ መቶን ፓጨትዶሶና፥ ሽን ኤንታ ኡፋይሳይ ዎልቃማ። ኤንታ ማንቆተስ ዛው ባዋ፥ ሽን ባንታ እሙዋን ዳሮ ኬህዶሶና።3ኤንቲ ባንታ ዎልቃ መላነ ባንታ ዎልቃፈ አይሳ ዶስድ እምዳይሳስ ታ ማርካ።4ኤንቲ ፆሳ አሰ ማድያ ሎኦ ኦሶ ኑራ ኦናዉ ኮይድ ኑና ዳሮ ዎስዶሶና።5ኤንቲ ኑኒ ቆፕዳይሳፈ አድ ኦዶሶና። ፆሳ ሸንያዳ፥ ኮይሮትድ ባንታና ጎዳስ እምዶሶና፤ ካልድ፥ ባንታና ኑስ አድ እምዶሶና።6ሀ ሎኦ ኦሱዋ ዶምዳ ትቶይ፥ ጉጅድ ኦናዳነ ህንተና ማድድ፥ ሄ ኦሱዋ ፖልሳናዳ እያ ዎስዳ።7ሽን ህንተ ኡባባን፥ አማኖን፥ ኦዳን፥ ኤራተን፥ ግታ አሞን፥ ኑና ዶሶንነ ኡባባን ዱረትዳይሳዳ ሀ ሎኦ ኦሱዋንካ ህንተ ኬሀ ግዳና መላ ኑ ኮዮስ።8ታኒ ሄሳ ኪታናዉ ጊከ። ሽን ሀራታ ግታ አሙዋ ህንተ ሲቁዋራ ጋ በአዳ፥ ህንተ አይ ኬና ቱሜኮ ኤራናዉ ጋይስ።9ህንተ፥ ኑ ጎዳ የሱስ ክርስቶሳ አ ኬሀተ ኤሬታ። ክርስቶስ ዱረ ግድ ኡትድ፥ ህንተ እያ ማንቆተን ዱረታናዳ ህንተ ግሾ ማንቅስ።10ታኒ ሀ ኦዳን ህንተና ማድያ ዞረ ዞራናዉ ኮያይስ። ህንተ ዝላይ እማናዉ ፃላላ ግዶናሽን፥ ሄሳ ኦናዉ አሞትሸካ ህንተ ኮይሮ።11ህንተ ኦናዉ ዶምዳ ኦሱዋ ሀእ ፖልተ። ህንተ ህንተዉ ደኤይሳ ኬና እምኮ፥ ሄስ ህንተ እማናዉ ዳሮ አሞተይሳ ቆንጭሴስ።12እስ አስ እማናዉ አሞትኮ፥ እያ እሞይ ፆሳ ስንን ኤከተይ፥ እ ባዉ ደእዳይሳ ኬና እምናፐ አትሽን፥ ባይናባፐ እማናዉ ኡንኤትን ግደና።13ታኒ ሄሳ ገይ፥ ህንተ ኡባይ እስ ግና ግዳና መላሳፈ አትሽን፥ ሀራት ዋያፐ ሸምፕን፥ ህንተ ዋየታና መላሳ ግደና።14ዎደ ኤንታ ፓላሀይ ህንተ ፓጫ ኩንና መላ፥ ሀእ ህንተ ፓላሀይ ኤንታ ፓጫ ኩን። ሄሳን ህንተ ግና ግዳና።15ጌሻ ማፃፋን፥ “ዳሮ ሺሽዳይሳስ ፓላህቤና፤ ጉ ሺሽዳይሳስ ፓጭቤና” ጌተትድ ፃፈትዳይሳ መላ።ትቶነ እያ ላገታ
16ኑኒ ህንተዉ ቆፐይሳዳ ትቶይካ ህንተዉ ቆፓና መላ ኦዳ ፆሳይ ጋላተቶ።17ትቶይ ህንተኮ ብዳይ፥ ኑኒ እያ ደንዳ ግሾ ፃላላ ግዶናሽን፥ እ ባ ሸነን ባናዉ አሞትዳ ግሾሳ።18ዎንገላ ማርካተን ዎሳ ኬ ኡባን ዳሮ ኤረትዳ እሻ፥ ኑኒ ትቶራ እስፈ ኪቶስ።19ሄሳ ቦላ ኑኒ ሀ ኬሀ እሞታ ኤፍያ ዎደ ኑራ ባና መላ፥ ሀ ሎኦ ኦሱዋን ጎዳ ቦንቻናዉነ ሀራታ ማዳናዉ ደእያ አሙዋ በሳናዉ እ ዎሳ ኬታን ዶረትስ።20ሀ እመትዳ ኬሀ እሙዋ፥ ኑኒ ኦሶ ቦላ ፔሽያ ዎደ ቦረቶና መላ ናገቶስ።21ኑኒ ጎዳ ስንን ፃላላ ግዶናሽን፥ አሳ ስንንካ ሎኦ ግድዳባ ኦስ።22ቃስ ዳሮ ዎደ ፓጨን ምንድ አዳ ኑ እሻ፥ ኤንታራ ህንተኮ ኪትዳ። እ ህንተናን ዳሮ አማነትያ ግሾ፥ ሀእ ህንተና ማዳናዉ ዳሮ አሞቴስ።23ትቶባ ኤራናዉ ኮይኮ፥ ህንተና ማዳናዉ ታራ ኦያ ታ ኦሶ ላገ። ሀንኮ እሻታባ ግድኮ ዎሳ ኬት ኪትዳይሳታ፤ ቃስ አሳይ ኤንታ ዱሳ በእድ ክርስቶሳ ቦንቾሶና።24ሄሳ ግሾ፥ ዎሳ ኬት ህንተ ሲቁዋነ ኑ ህንተና ናሽያ ናሾይ ቱማ ግደይሳ ቆንጭሳናዉ ህንተ ሲቁዋ ሀ አሳታ በስተ።