ሳናክሬም የሩሳላመ ቦላ ደንድስ
1ካዎይ ህዝቅያስ አማነተን ጎዳስ ኦዳፐ ጉየ አሶረ ካዎይ ሳናክሬም ይሁዳ ቢታ ቦላ ደንድስ፤ ፆንድ ባዉ ኤካናዉ ቆፕድ ግምበትዳ ካታማታ ተቅስ።2ሳናክሬም የሩሳላመ ኦላናዉ ይዳይሳ ህዝቅያስ በእዳ ዎደ፥3ካታማፐ ካረራ ጎግያ ፑልቶ ሃታ ተቃናዉ ባ ሹማታነ ቶራ ሞጮናታ ዞረ ኦይችስ፤ ኤንቲ እያ ማድዶሶና።4ዳሮ አሳይ ሺቅድ፥ “አሶረ ካዎት ይድ አይስ ሃ ደማኔ?” ያግድ ፑልቶታነ ጎግያ ሃታ ተቅዶሶና።5ሄሳፈ ጉየ፥ ህዝቅያስ ምን ኦድ፥ ላለትዳ ድርሳ ግምበ ኡባ ዛሪድ ግምብስ፤ እያ ቦላ አዱሳ ሻኮ ሻክስ። ሄ ድርሳ ግምብያፈ ካረ ባጋራ ሀራ ድርሳ ግምበ ግምብስ። ዳዊታ ካታማን ደእያ ሚሎ ጌተትያ በሳ ምንስ፤ ዳሮ ኦላ ሚሸነ ጎንዳለ ጊግስስ።6ኦላ ሀላቃታ አሳ ቦላ ሹምስ፤ ኤንታ ኡባ ካታማ ፐንግያ ማታን ደእያ ዳባባን ሺሽድ፥7“ምንተ፤ ገንጭተ፤ ኑራ ደኤይስ ኤንታራ ደኤይሳፈ አያ ግሾ አሶረ ካዋነ እያ ኦላንቾታ በእድ ያዮፍተ፥ ዳጋሞፕተ።8እያራ አሳ ዎልቅ ደኤስ፤ ሽን ኑራ ጎዳይ ኑ ፆሳይ ኑና ማዳናዉነ ኑስ ኦለታናዉ ደኤስ” ያግድ ኤንታ ምንስ። ይሁዳ ካዎይ ህዝቅያስ ኦዳን አሳይ ምነትስ።9ሄሳፈ ጉየ፥ አሶረ ካዎይ ሳናክሬም ባ ኦላንቾታራ ላክሶ ካታማ ተቅድ ደእሽን፥ ይሁዳ ካዋ ህዝቅያሳኮነ የሩሳላመን ደእያ ይሁዳ አሳ ኡባኮ ባ ሹማታ ኪትስ።10አሶረ ካዎይ ሳናክሬም፥ “ተቀትዳ የሩሳላመ ካታማን ህንተ ኦናን አማነትድ ኡትደቲ?11ህዝቅያስ፥ ‘ጎዳይ፥ ኑ ፆሳይ ኑና፥ አሶረ ካዋ ኩሸፐ አሻና’ ያግድ ጭምድ ህንተና ኮሻንነ ሳሞን ዎናዉ ሀኔስ።12ቃ ጎይኖ በሳታነ ያርሾ በሳታ ድግድ፥ ይሁዳነ የሩሳላመ አሳ፥ ‘እስ ያርሾ በሳ ስንን ጎይንተ፤ ያርሹዋ እያ ቦላ ፁግተ’ ያገይ ህዝቅያሳ ግደኔ?13“ታነ ታ አዋት ሀራ ካዎተታ ቦላ ኦዳባ ህንተ ኤረከቲ? ኤንታ ፆሳት ባንታ ቢታ ታ ኩሸፐ አሻናዉ ዳንዳእዶና?14ታ አዋት ይስዳ ሀ ካዎተታ ፆሳታ ኡባ ግዶን ባ አሳ ታ ኩሸፐ አሻናዉ ዳንዳእዳይ ኦኔ? ያትን፥ ህንተ ፆሳይ ህንተና ታ ኩሸፐ ዋት አሻናዉ ዳንዳኢ?15ህዛ ህዝቅያስ ህንተና ባለፎ ዎይኮ ሄሳዳ ጭሞፎ። ህንተ ህዝቅያሳ አማኖፕተ። እያ አሳ ታ ኩሸፐ ዎይኮ ታ አዋታ ኩሸፐ አሻናዉ ዳንዳእዳ ሀራ ቢታ ፆሳት ዎይኮ ካዎተታ ፆሳት ባዋ። ያትን፥ ሄስ ህንተ ፆሳይ ህንተና ታ ኩሸፐ አሻናዉ ዋንድ ዳንዳኢ?” ያግዶሶና።16ሳናክሬማ ሹማት ጎዳ ፆሳ ቦላነ እያ አይልያ ህዝቅያሳ ቦላ ሀራ ዳሮባ ሃሳይዶሶና።17ሳናክሬም ጎዳ እስራኤለ ፆሳ ጫይድ፥ “ሳአ ቦላ ደእያ ካዎተታ ፆሳት ባንታ አሳ ታ ኩሸፐ አሾናይሳዳ ህዝቅያሳ ፆሳይካ ባ አሳ ታ ኩሸፐ አሻናዉ ዳንዳኤና” ያግድ ዳብዳበ ፃፍስ።18ሳናክሬማ ሹማት ካታማ ኦይካናዉ ኮይድ፥ ድርሳ ግምበ ቦላ ኡትዳ የሩሳላመ አሳ ያሽሳናዉነ ዳጋንናዉ ባንታ ቃላ ቁ ኦድ፥ እብራወ ዶናን ኤንታ ቦላ ዋስዶሶና።19አሳ ኩሸን ኦሰትዳ፥ ሀ ሳአን ደእያ ሀራ ካዎተታ ፆሳታ ቦላ ኦደትዳይሳዳ የሩሳላመ ፆሳ ቦላካ ኦደትዶሶና።20ካዎይ ህዝቅያስነ አሞፀ ናአይ፥ ናበይ እሳያስ ሄሳ ግሾ ዎሳን ሳሎ ፆሳኮ ፑደ ዋስዶሶና።21ፆሳይ ባ ኪታንቹዋ ኪትድ አሶረ ኦላንቾታነ ቶራ ሞጮናታ ይስስ። ሄሳ ግሾ፥ አሶረ ካዎይ ካዉይድ፥ ባ ቢታ ስምስ፤ እ ባ ፆሳ ኬ ገልዳ ዎደ እያ ናይት እያ ሄ በሳን ማሻን ዎዶሶና።22ሄሳዳ ኦድ፥ ጎዳይ ህዝቅያሳነ የሩሳላመ አሳ አሶረ ካዋ ሳናክሬማ ኩሸፐነ ሀራ ሞርከታ ኩሸፐ አሽስ፤ ኤንታ ሾሮ ቢታታ ኡባፈ ኤንታ ሸምፕስስ።23ዳሮ አሳይ ጎዳስ እሞታ፥ ይሁዳ ካዋ ህዝቅያሳስ አልኦ ሚሸ ኤህዶሶና። ሄ ዎደፐ ዶምድ ካዎተ ኡባይ ህዝቅያሳ ዳሮ ቦንችዶሶና።ህዝቅያሳ ኦቶሩዋነ እያ ሀይቁዋ
24ሄ ዎደ ህዝቅያስ ሀርግድ፥ ሀይቃናዉ ማትድ ጎዳ ዎስስ። ጎዳይ ዎሰትድ እያ ፓናዉ ማላ እሚስ።25ሽን ህዝቅያስ ኦቶርትዳ ግሾ ጎዳይ እያዉ ኬህዳ ኬሀስ በሲያ ዛሮ እምቤና። ሄሳ ጋሶን፥ እያ ቦላ፥ ይሁዳ ቦላነ የሩሳላመ ቦላ ጎዳ ሀንቆይ ይስ።26ግዶሽን፥ ዉርሰን ህዝቅያስ ባ ኦቶሩዋ አግድ የሩሳላመ አሳታራ ባናተ ካዉሽስ። ህዝቅያስ ካዎ ግድድ ደእያ ዎደ ጎዳ ሀንቆይ ኤንታ ቦላ ይቤና።27ህዝቅያሳስ ዳሮ ዱረተነ ቦንቾይ ደኤስ። ህዝቅያስ ባ ብራ፥ ዎርቃ፥ አልኦ ሹቻ፥ ሳዎ፥ ጎንዳለነ ሀራ አልኦ ሚሸ ኡባ ምንጅያ ኬ ኬፅስ።28ካ፥ ዎይነ ኡሻነ ዛይተ ዎያ ኬ ኬፅስ። መሄ ዳራነ ዶርስነ ዴሽ ኤቅያ ግርበ ኦስ።29ፆሳይ እያዉ ዳሮ አቆ እምዳ ግሾ ባዉ ካታማታ ኬፅስ፤ ዳሮ ዶርሰነ መሄ ሺሽስ።30ቆሞ ባጋን ደእያ ግዮነ ፑልቶ ሃ ዜርድ፥ ሃይ ዉሎሀ ባጋን ደእያ ዳዊታ ካታማኮ ዱገ ጎጋና መላ ኦዳይ ህዝቅያሳ። ህዝቅያስ ኦዳባ ኡባን እንጀትዳ አስ።31ሽን ይሁዳ ቢታን ሀንዳ ማላልስያ ኦሶታባ ኦይቻናዉ ባብሎነፐ ኪተትዳ አሳት ህዝቅያሳኮ ይዳ ዎደ ጎዳይ እያ ፓጫናዉነ እያ ዎዛናን ደእያባ ኤራናዉ እያ የድ በስስ።32ህዝቅያስ ኦዳ ሀራባይነ እያ ኬሀተይ አሞፀ ናኣ፥ ናብያ እሳያሳ ቆንጨ ማፃፋንነ ይሁዳነ እስራኤለ ካዎታ ታርከ ማፃፋን ፃፈትስ።33ህዝቅያስ ሀይቅድ፥ ባ ማይዛታን ጋሄትን ቆሞ ባጋራ ደእያ ዳዊታ ኮቻታ ዱፎን እያ ሞግዶሶና። እ ሀይቅን፥ ይሁዳ አሳይነ የሩሳላመ አሳይ እያ ቦንችዶሶና። እያ በሳን እያ ናአይ ምናሰይ ካዎትስ።