ዳዊቲ ቃእላ አሽስ
1ፍልስፄመት ቃእላ ኦልድ፥ ዉዱማን ደእያ ካ ቦንቅዳይሳ ዳዊቲ ስእስ።2ዳዊቲ፥ “ታኒ ባዳ ፍልስፄመታ ኦሎ?” ያግድ ጎዳ ኦይችስ። ጎዳይ፥ “ባ፤ ፍልስፄመታ ኦላ፤ ቃእላ አሻ” ያግስ።3ሽን ዳዊታ ካለይሳት፥ “ኑኒ ሀይሳን ይሁዳ ቢታን ደእሸ ዳሮባን ያዮስ። ፍልስፄመታራ ኦለታናዉ ቃእላ ኑ ቢኮ ኑና ኡባ ሳእ መታና” ያግዶሶና።4ዳዊቲ ዛሪድ ጎዳ ኦይችን ጎዳይ፥ “ፍልስፄመታ ታኒ ነዉ አ እማና፤ ደንዳዳ ቃእላ ባ” ያግስ።5ዳዊቲነ እያ ካለይሳት ቃእላ ብድ፥ ፍልስፄመታራ ኦለትድ ኤንታ መህያ ድእዶሶና። ኤንታፈ ዳሮ አሳ ዎድ፥ ዳዊቲ ቃእላ አሳ አሽስ።6አብመለከ ናአይ አብያታር ዳዊታኮ ቃእላ ባቃትዳ ዎደ ኤፉደ ማኡዋ ኤክድ ብስ።7ዳዊቲ ቃእላ ብዳይሳ ሳኦል ስእድ፥ “ፆሳይ ዳዊታ ታ ኩሸን አድ እሚስ፤ ዳዊቲ ግምበን ድረትዳ ካታማ ገልድ ባና ባዉ ቃችስ” ያግስ።8ቃእላ ብድ፥ ዳዊቲነ እያ አሳ ተቃና መላ ሳኦል ባ ኦላንቾታ ኡባ ፄግስ።9ሳኦል ባ ቦላ ኢታባ ኦናዉ ማቅዳይሳ ዳዊቲ ኤርድ ካህንያ አብያታራኮ፥ “ኤፉድያ ሃ ኤካ ያ” ያግስ።10ዳዊቲ፥ “አቤት ጎዳዉ፥ እስራኤለ ፆሳዉ፥ ታ ጋሶን ሳኦል ቃእላ ይሳናዉ ማቅዳይሳ ታኒ ነ አይለይ ስአስ።11ቃእላ አሳይ ታና ሳኦላስ አድ እማነሻ? ታኒ ነ አይለይ ስእዳይሳዳ ሳኦል ቱማካ ሃ ያነሻ? አቤት ጎዳዉ፥ እስራኤለ ፆሳዉ፥ ታዉ ነ አይልያስ ኦዳ” ያግስ። ጎዳይ ዳዊታኮ፥ “ኤ፤ ሳኦል ያና” ያግድ ዛርስ።12ዳዊቲ፥ “ቃእላ አሳይ ታናነ ታ አሳ ሳኦላስ አድ እማነሻ?” ያግድ ዛሪድ ጎዳ ኦይችስ። ጎዳይ፥ “ኤ፤ ኤንቲ ህንተና አድ እማና” ያግስ።13ዳዊቲነ ኡሱፑን ፄቱ ግድያ አደት ቃእላፐ ከይድ፥ እስ በሳፈ ሀራ በሲ ዩይዶሶና። ዳዊቲ ቃእላፐ ባቃትዳይሳ ሳኦል ስእዳ ዎደ ባናዉ ቆፕዳይሳ አጋግስ።14ዳዊቲ ባዞ ሚፃታንነ ዚፋ መላ ቢታን ደእያ ዙማታ ቦላ ደእስ። ሳኦል እያ ደማናዉ ኡባ ጋላስ ኮዬስ፥ ሽን ፆሳይ እያ ሳኦላ ኩሸን አድ እምቤና።15ዳዊቲ ዚፋ መላ ቢታን ደእያ ሆረሳን ደእሽን፥ ሳኦል እያ ዎናዉ ከይዳይሳ ዳዊቲ ኤርስ።16ሳኦላ ናኣ ዮናታን ደንድድ፥ ዳዊታኮ ሆረሳ ብድ ዳዊቲ ጎዳ ዎልቃን ምናናዳ ዞርድ፥17“ያዮፋ፤ ታ አዋ ሳኦል ነና ኩሸራካ ቦቸና፤ ኔኒ እስራኤለ ቦላ ካዎታና፤ ታንካ ኔፐ ጋርሳራ ሃራና፤ ታ አዋይ ሳኦል ሄሳ ሎይድ ኤሬስ” ያግስ።18ኤንቲ ናምአይ ጎዳ ስንን እሶይ እሱዋራ ጫቅዶሶና፤ ዳዊቲ ሆረሳን ጋምእን ዮናታን ባ ሶ ብስ።19ዚፋ አሳይ ሳኦላኮ ግብአ ብድ፥ “ዳዊቲ ያስሞናፐ ዱገሀ ባጋን፥ ሀክላ ዙማ ቦላ ሆረሳ ሚፃታን ኑ ማታን ቆሰትድ ደኤስ።20ካዋዉ፥ ሀእካ ነ ዶስዳ ዎደ ዱገ ዎ፤ ኑኒ እያ ነ ኩሸን አድ እማና” ያግዶሶና።21ሳኦል፥ “ህንተ ታዉ ቆፕዳ ግሾ ህንተና ጎዳይ አንጆ።22ብድ አነ ጉጅድካ ጌሽተ፤ ዳዊቲ ዳሮ ቶሆ አዉ ብያኮካ ኦን እያ በእዳኮ፥ ሻክድ ኤርተ፤ እ ገነ አስ ግደይሳ ታ ስአስ።23ዳዊቲ ቆሰትያ በሳታ ኡባ በእድ፥ ሙሩታ ኦዳ ኤክድ ታኮ ስሚድ ዪተ። ሄሳፈ ጉየ፥ ታኒ ህንተራ ባና፤ እ ሄ ሄራን ደእኮ፥ ታኒ እያ ይሁዳ ቢታ ኡባን ደማና ጋካናዉ ኮያና” ያግስ።24ሄሳ ግሾ፥ ኤንቲ ሳኦላፐ ስንትድ ዚፋ ብዶሶና። ሄ ዎደ ዳዊቲነ እያ አሳይ ያስሞናፐ ዱገሀ ባጋራ ደእያ ማኦና መላ ቢታን አራባ ጋን ደኦሶና።25ሳኦልነ እያ አሳይ ዳዊታ ኮያናዉ ብዶሶና። ዳዊቲ ሄሳ ስእዳ ዎደ ዛላኮ ዎድ፥ ማኦና ባዙዋን ኡትስ። ሳኦል ሄሳ ስእዳ ዎደ ማኦና ባዙዋን ዳዊታ ኮይሸ ብስ።26ሳኦል ዙማፐ እስ ባጋ ምይያራ ቤስ፤ ዳዊቲነ እያ አሳይ ሀንኮ ባጋ ምይያራ ቦሶና። ኤንቲ ሳኦላፐ ባቃታናዉ ኤሶቶሶና፤ ሳኦልነ እያ አሳት፥ ዳዊቲነ እያ አሳታ ኦይካናዉ ማት ኡትዶሶና።27ሽን፥ “ኤለሳዳ ሃያ፤ ፍልስፄመት ኑ ቢታ ኦላናዉ ይዶሶና” ግያ ሀራ ኪት ሳኦላ ጋክስ።28ሳኦል ዳዊታ ኮየይሳ አግድ፥ ፍልስፄመታራ ኦለታናዉ ብስ። ሄሳ ግሾ፥ ሄ በሳይ “ከስ ኤክድ አትያ ዛላ” ጌተትስ።29ዳዊቲ ሄ በሳፈ ከይድ፥ ኤንጋዳ ማታን ደእያ ሚፃታን ኡትስ።