ኤልያሳ ቁሮይ ሙዝስ
1ጋላዳን ተስባፐ ይዳ ናበይ፥ ኤልያስ ካዋ አካባ ሀይሳዳ ያግስ፤ “ታኒ እያዉ ኦያ ጎዳይ፥ እስራኤለ ፆሳይ ኤሮ! ካልድ ያና ላይታን፥ ታኒ ኦዶና ደእሽን፥ ሳአን እር ቡከና ዎይኮ ፃሳተና” ያግስ።2ሄሳፈ ጉየ፥ ጎዳ ቃላይ ኤልያሳኮ ይድ ሀይሳዳ ያግስ፤3“ሀይሳፈ ደንዳዳ ዶሎሀ ባጋ ባ፤ ያን ዮርዳኖሰ ሻፋፐ ዶሎሀ ባጋራ ደእያ ኮራታ ዛንጋራን ቆሰታ።4ኔኒ ሄ ሻፋፐ ሃ ኡያና፤ ቁሮት ነና ሄ በሳን ካ ሙዛናዳ ታ ኤንታ ኪታስ” ያግስ።5ኤልያስ ጎዳይ ግዳይሳዳ ኦስ፤ ዮርዳኖሰ ሻፋፐ ዶሎሀ ባጋራ ደእያ ኮራታ ዛንጋራ ብድ ያን ኡትስ።6ዎንታነ ኦማርስ ቁሮት ኡይነ አሾ ኤልያሳስ ኤሆሶና፤ እ ሻፋፐ ሃ ኡይስ።7ቢታን እር ቡኮና ግሾ፥ ጉ ዎደፐ ጉየ ሻፋይ መልስ።ኤልያሳነ ሳራፕታ አምእዉ
8ሄሳፈ ጉየ፥ ጎዳ ቃላይ ኤልያሳኮ ሀይሳዳ ያግስ፤9“ሀ በሳፈ ደንዳዳ፥ ስዶና ማታን ደእያ ሳራፕታ ባዳ ያን ደኣሻ። ሄኮ፥ እስ አምእያ ካ ነና ሙዛና መላ ታኒ ኪታስ” ያግስ።10ኤልያስ ደንድድ ሳራፕታ ብድ ካታማ ፐንግያ ጋክያ ዎደ፥ ሄኮ፥ እስ አምእያ ም ምፃዉሱ። ኤልያስ ማጫስዉ ፄግድ፥ “ሀያና፥ ታዉ ሃ ኡያናዉ ቡለራ ኤካዳ ያ” ያግስ።11ማጫስያ ሃ ኤሀናዉ ብሽን እ ፄግድ፥ “ሀያና ጉ ባሶ ኡይካ ኤካዳ ያ” ያግስ።12ማጫስያ ዛራዳ፥ “ጎዳይ፥ ነ ደኦ ፆሳይ ኤሮ! ታዉ ኡይ ባዋ። ታዉ ኦቶን እስ ኩጫ ለይነ ጉ ዛይተ ፃላል ፃሮን ደኤስ። ታኒ ሀይሳ ይዳይ ጉ ም ምፃዳ፥ ሶ ስማዳ፥ ህኖ ታዉነ ታ ናኣስ እስ ቶሆ ኡክድ ምድ ሀይቃና” ያጋሱ።13ኤልያስ ዛሪድ፥ “አይኮይ ባዋ፥ ያዮፋ፤ ባዳ ነ ካ ካ። ሽን ኮይሮ ነ ልያፈ ጉ ኡይ ላቃዳ ታዉ ኤካዳ ያ፤ ሄሳፈ ጉየ፥ ነዉነ ነ ናኣስ ኡካ።14ጎዳይ፥ እስራኤለ ፆሳይ፥ ‘ሳኣ ቦላ እር ቡካና ጋካናዉ ለይ ኦቱዋፐ ዛይተይ ፃሩዋፐ ዉረና’ ያጌስ” ያግስ።15ሄሳ ግሾ፥ ማጫስያ ባዳ፥ ኤልያስ ግዳይሳዳ ኦሱ፤ ሄሳዳ ሀንን፥ ኤልያስ፥ ማጫስያነ እ ሶ አሳይ ዳሮ ዎደስ ግድያ ካ ደምዶሶና።16ጎዳይ ኤልያሳ ባጋራ ኦድዳ ቃላ ናግድ፥ ኦቱዋፐ ለይ ፃሩዋፐ ዛይተይ ዉርቤና።17ጉ ዎደፐ ጉየ ሄ ማጫሰ ናአይ ሀርግስ፤ ሀርገይ ጎብሸ ብን፥ ዉርሰን ናአይ ሀይቅስ።18ማጫስያ ኤልያሳኮ፥ “ፆሳ አድያዉ፥ ነ ታ ቦላ ሀይሳዳ አይስ ኦዲ? ነ ታ ናጋራ ሀሳይሳዳ ታ ናኣ ዎናዉ ያዲ?” ያጋሱ።19ኤልያስ፥ “ነ ናኣ ሃ ኤካዳ ያ” ያግስ። ናኣ እ ክኡዋፐ ኤክድ፥ ፑደ ባ ደእያ ፖቅያ ኤፍድ ባ አርሳን ዝንእስስ።20ያትድ ጎዳኮ ሀይሳዳ ያግድ ዋስስ፤ “አቤት ጎዳዉ፥ ታ ፆሳዉ፥ ሀ ታኒ ደእያ አምኤ ናኣ ዎዳ፥ ሀይሳ መላ መቶ እ ቦላ አይስ ኤሀይ?” ያግስ።21ሄሳፈ ጉየ ናኣ ቦላ ሄ ቶሆ ዛቁልድ፥ “አቤት ጎዳው፥ ታ ፆሳዉ፥ ሀ ናኣ ፓ” ያግድ ዎስስ።22ጎዳይ ኤልያሳ ዎሳ ስእስ። ናኣ ሸምፖይ ስምን፥ ናአይ ፓፅስ።23ኤልያስ ናኣ ኤክድ ፖቅያፐ ዱገ ዎስ፤ ናኣ አየስ እምድ፥ “ሄኮ ነ ናአይ ፓፅስ” ያግስ።24ማጫስያ፥ “ኔኒ ፆሳ አስ ግደይሳነ ነ ዶናፐ ከይያ ጎዳ ቃላይ ቱማ ግደይሳ ታኒ ሀእ ኤራስ” ያጋሱ።