አዶንያስ ካዎታናዉ ኮይስ
1ካዎይ ዳዊቲ ዳሮ ጭምድ ዎደ ሱግስ። እያ አይለት ማኦ እያ ቦላ ዶርንካ እያ ሆኦና እፅስ።2ሄሳ ግሾ፥ እያ ሞርናት፥ “ካዋ ማታን ዳና መላነ እያ ሄማና መላ እስ ጌላኦ ኑ ነዉ ኮያና። ኑ ጎዳ ካዋ ሆኤናዉ እያ ማታን ዝንአናዉ ዳንዳአዉሱ” ያግዶሶና።3ኤንቲ እስራኤለ ቢታ ኡባን ኮይድ አብሳ ጌተትያ እስ ማላ ሎኦ ጌላኦ ሱናማ ካታማፐ ደምድ፥ ካዋስ ኤህዶሶና።4ሄ ጌላእያ ዳሮ ማላ ሎኦ። እያ ካዋ ሄማሱነ እያዉ ኦሱ፤ ሽን ካዎይ ኢራ አቅ ኤረና።5ሃግታ ናአይ አዶንያስ፥ “ታ ካዎታናዉ ኮያይስ” ያግድ ደንድስ፤ ፓራ ጋረታ፥ ፓራታነ ባ ስንን ዎፅያ እሻታሙ አሳታ ጊግስስ።6እያ አዋይ፥ “ነ ሀይሳ አይስ ኦይ?” ግድ እያ ኦይች ኤረና። አዶንያስ ዳሮ ማላ ሎኦ፤ እ አበሰሎመ ካልድ የለትስ።7አዶንያስ ፃሩያ ናኣ እዮአባራነ ካህንያ አብያታራራ ዞረትን፥ ኤንቲ እያ ማዳናዉ ጊግዶሶና።8ሽን ካህንያ ሳዶቅ፥ ዮዳሄ ናአይ ባናይ፥ ናብያ ናታን፥ ሳም፥ ረስምነ ዳዊቲ ናገይሳት አዶንያሳራ ዶኮና።9እስ ጋላስ አዶንያስ ኤንሮጌላ ፑልቱዋ ማታን ዞሄለታ ዛላ ጌተትያ በሳን ዶርሳታ፥ መሄታነ ማራታ ያርሽስ። ካዎ ናይታ ባ እሻታ ኡባነ ካዋስ ኦያ ይሁዳ አሳታ ኡባ ባ ያርሾ በሳ ፄግስ።10ሽን ናበይ ናታና፥ ባናያ፥ ካዋ ናገይሳታነ ባ እሻ ሶሎሞነ ፄግቤና።11ሄሳፈ ጉየ፥ ናታን ሶሎሞነ አይዉ በርሳበኮ ብድ፥ “ኑ ጎዳይ፥ ዳዊቲ ኤሮና ደእሽን፥ ሃግታ ናአይ አዶንያስ ካዎትዳይሳ ነ ስአብኪ?12ነ ነ ሸምፑዋነ ነ ናኣ ሶሎሞነ ሸምፑዋ ዋታዳ አሻነኮ ታ ነና ዞራይስ።13ካዋ ዳዊታኮ ገላዳ፥ ‘ታ ጎዳዉ፥ ካዋዉ ቱማ፥ ታፐ ጉየ ነ ናአይ ሶሎሞነይ ካዎታና፤ እ ታ አራታን ኡታና’ ያጋዳ ታዉ ነ አይሌስ ጫቃብኪ? ያትን፥ አዶንያስ ዋንድ ካዎትዴ?14ኔኒ ካዉዋራ ሃሳይሽን ታ ገላዳ፥ ነ ኦዳይ ቱማ ግደይሳ ኦዳና” ያግስ።15በርሳባ ካዋ ሃሳይሳናዉ እ ደእያ ኬ ገላሱ፤ ሱናማፐ ይዳ አብሳ ካዋ ሄማዉሱ።16በርሳባ ካዋ ስንን ቦንቾን ሶምኡዋ ሳአ ጋዳ ዝጋሱ። ካዎይ፥ “አይ ኮያዲ?” ያግድ ኦይችስ።17እያ፥ “ታ ጎዳዉ፥ ታዉ ነ አይሌስ፥ ‘ታፐ ጉየ ነ ናአይ ሶሎሞነይ ካዎታና፤ እ ታ አራታን ኡታና’ ጋዳ ጎዳን፥ ነ ፆሳን፥ ታዉ ጫቃዳሳ።18ሄኮ፥ ሀእ አዶንያስ ካዎትስ፤ ነ ታ ጎዳይ፥ ካዎይ ሄሳ ኤራካ።19እ ዳሮ መሄታ፥ ማራታነ ዶርሳታ ያርሽድ፥ ካዋ ናይታ ኡባ፥ ካህንያ አብያታራነ ቶራ ሞጮና እዮኣባ ፄግስ፤ ሽን ነ አይልያ ሶሎሞነ ፄግቤና።20ታ ጎዳዉ ካዋዉ፥ ታ ጎዳፐ ካዉዋፐ ጉየ ኦን ነ አራታን ኡታኔኮ ኤራናዉ እስራኤለ አሳ ኡባ አይፈይ ነና ፄሌስ።21ሄስ ሀኖና እፅኮ ታ ጎዳይ ካዎይ ሀይቅድ ባ ማይዛታን ጋሄትያ ዎደ ታነ ታ ናአይ ሶሎሞነይ ዳፋባ ኦዳ አሳዳ ታይበታና” ያጋሱ።22በርሳባ ቡሮ ካዉዋራ ሃሳይሽን፥ ናበይ ናታን ካዎ ኬ ጋክስ።23ናበይ ይዳይሳ አሳይ ካዋስ ኦድዶሶና። ናታን ካዋ ስን አድ፥ ባ ሶምኡዋ ሳአ ጋድ ዝግስ።24ናታን፥ “ታ ጎዳዉ ካዋዉ፥ ኔፐ ጉየ አዶንያስ ካዎታናይሳነ ነ አራታን ኡታናይሳ ኦዳዲ?25ሀች እ ዳሮ መሄታ፥ ማራታነ ዶርሳታ ያርሽድ፥ ካዋ ናይታ ኡባ፥ ቶራ ሞጮናታነ ካህንያ አብያታራ ፄግስ። ኤንቲ ሀእ እያራ ምሸነ ኡይሸ፥ ‘ካዎይ አዶንያስ ብራታ ቱስ ግዶ’ ያግሸ ደኦሶና።26ሽን ታና ነ አይልያ፥ ካህንያ ሳዶቃ፥ ዮዳሄ ናኣ ባናያነ ነ አይልያ ሶሎሞነ ፄግቤና።27ሀይስ ታ ጎዳ ካዉዋፐ ጉየ እያ አራታን ኦን ኡታኔኮ ባ አይለታ ኤርሶና ደእሸ ታ ጎዳይ ካዎይ ኦዳባዬ?” ያግስ።ዳዊቲ ሶሎሞነ ካዎስ
28ካዎይ ዳዊቲ፥ “በርሳቦ ታዉ ፄግተ” ያግን ካዎይ ደእያ በሳ ገላዳ እያ ስንን ኤቃሱ።29ሄ ዎደ ካዎይ፥ “ታና መቶ ኡባፈ አሽዳ ጎዳይ ኤርያ መላ።30ጎዳን፥ እስራኤለ ፆሳን ታ ነዉ ጫቅዳ ጫቁዋ ቱማ ሀች ፖላና፤ ታፐ ጉየ ነ ናአይ ሶሎሞነይ ካዎታና፤ ታ አራታን፥ እ ታ በሳን ኡታና” ያግድ ጫቅስ።31በርሳባ ካዋ ስንን ባ ሶምኡዋ ሳአ ጋዳ ዝጋዳ፥ “ታ ጎዳይ፥ ካዎይ ዳዊቲ መርናዉ ካዎቶ!” ያጋሱ።32ሄሳፈ ጉየ ካዎይ ዳዊቲ፥ “ታዉ ካህንያ ሳዶቃ፥ ናብያ ናታናነ ዮዳሄ ናኣ ባናያ ፄግተ” ያግን፥ ኤንቲ ገልድ፥ ካዋ ስንን ኤቅዶሶና።33ካዎይ “ታ አይለታ ህንተራ ኤክድ ብድ፥ ታ ናኣ ሶሎሞነ ታ ቶግያ ባቁሉዋ ቶግስድ፥ ግዮነ ፑልቱዋኮ ኤፍተ።34ያን ካህንያ ሳዶቅነ ናብያ ናታን እያ ትይድ እስራኤለ ቦላ ካዎዮ። ሞይዘ ፑንሸ፥ ህንተ ቃላ ቁ ኦድ፥ ‘ካዎይ ሶሎሞነይ ብራታ ቱሱ ግዶ’ ያግተ።35ህንተ እያ አጃብድ እያራ ቢተ፤ እ ታ አራታን ኡትድ፥ ታ በሳን ካዎቶ። ታኒ እስራኤለነ ይሁዳ ሃርያ አስ ኦዳ እያ ሹማስ” ያግስ።36ዮዳሄ ናኣ ባናይ ዛሪድ፥ “አምንእ! ጎዳይ፥ ታ ጎዳ ካዋ ፆሳይ ሄሳ ፖሎ!37ጎዳይ ታ ጎዳራ ካዉዋራ ግድዳይሳዳ ሶሎሞነራ ግዶ፤ እያ አራታ ታ ጎዳ ካዋ ዳዊቲ አራታፐ አድ ግታዮ” ያግስ።38ሄሳ ግሾ፥ ካህነይ ሳዶቅ፥ ናበይ ናታን፥ ዮዳሄ ናአይ ባናይነ ካዋ ናገይሳት ሶሎሞነ ካዎይ ዳዊቲ ቶግያ ባቁሉዋ ቶግስድ፥ ግዮነ ኤፍዶሶና።39ካህነይ ሳዶቅ ጌሻ ዱንካንያፐ ዛይተ ካጨን ትግ ኤክድ፥ ሶሎሞነ ትይድ ካዎስ። ኤንቲ ሞይዘ ፑንን፥ አሳ ኡባይ ባ ቃላ ቁ ኦድ፥ “ካዎይ ሶሎሞነይ መርናዉ ካዎቶ!” ያግዶሶና።40አሳ ኡባይ እያ ካልድ ብዶሶና፤ ኤንቲ ቢት ቃፃና ጋካናዉ ሱሱልኤ ፑንሸነ ዱርሸ ዳሮ ኡፋይትዶሶና።41አዶንያስነ እያራ ደእያ እማት ግብራ ምድ ዉርስሸ ሄሳ ስእዶሶና። እዮኣብ ሞይዘ ፑኖ ስእድ፥ “ሀ ካታማን ስኤትያ ዎጫማ ግርሳይ አይቤ?” ያግድ ኦይችስ።42እ ቡሮ ኦደትሽን፥ ካህንያ አብያታራ ናአይ ዮናታን ጋክ ዎስ። አዶንያስ፥ “አነ ሃ ገላ። ነ መላ ሎኦ አስ ሎኦ ዎረ ኤሆና አገና” ያግስ።43ዮናታን፥ “አካይ፥ ታኒ ሎኦ ዎረ ኤሀብከ! ኑ ጎዳይ ካዎይ ዳዊቲ ሶሎሞነ ካዎስ።44እያ አጃባና መላ ካዎይ ካህንያ ሳዶቃ፥ ናብያ ናታና፥ ዮዳሄ ናኣ ባናያነ ካዋ ናገይሳታ እያራ የድስ፤ ኤንቲ ካዎይ ቶግያ ባቁሉዋ እያ ቶግስዶሶና።45ካህነይ ሳዶቅነ ናበይ ናታን፥ ግዮነ ፑልቱዋ ማታን እያ ትይድ ካዎዶሶና፤ ኤንቲ እልልሸነ ዱርሸ ብዶሶና፤ ካታማን ስኤትያ ግርሳይ ሄሳ።46ሶሎሞነይ አራታን ኡትስ።47ሄሳ ቦላካ፥ ካዋ ሞርናት ኑ ጎዳ ካዋ ዳዊታኮ ሺቅድ፥ ‘ነ ፆሳይ ሶሎሞነ ሱን ነይሳፈ አድ ከሶ፤ እያ አራታ ነይሳፈ አድ ግታዮ!’ ያግድ አንጅዶሶና። ካዎይ ባ አልጋን ደእሸ ሆክድ ፆሳ ጎይንስ።48ጉጅድካ፥ ‘ታ በሳን ካዎድ፥ ታ አራታን ኡትስድ፥ ታና ሀች ታ አይፈን በሲያ ጎዳይ፥ እስራኤለ ፆሳይ ጋላተቶ!’ ” ያግስ።49አዶንያሳ እማት ኡባይ ሄሳ ስእዳ ዎደ ዳጋምድ፥ ላለትዶሶና።50አዶንያስ ሶሎሞነ ያይድ፥ ያርሾ በሳ ካጨታ ኦይክድ ዎስስ።51አሳይ ሶሎሞነ፥ “አዶንያስ ካዋ ሶሎሞነ ያይድ፥ ያርሾ በሳ ካጨታ ኦይክድ፥ ‘ካዎይ ሶሎሞነይ ታና ባ አይልያ ማሻን ዎከ ግድ ሀች ታዉ ጫቆ’ ” ያጌስ ግድ ኦድዶሶና።52ሶሎሞነይ ዛሪድ፥ “እ ባ ሀኑዋ ሎይኮ፥ ሀር አቶሽን እያ ሁጰ ብናናፐ እሶይካ ቦሸተና፤ ሽን እያን ኢታተ በንትኮ እ ሀይቃና” ያግስ።53ካዎይ ሶሎሞነይ፥ አዶንያሳ ያርሾ በሳፈ ኤሀና መላ አሰ ኪትስ። አዶንያስ ይድ፥ ሶሎሞነስ ዝግስ፤ ሶሎሞነይ እያኮ፥ “ነ ሶ ባ” ያግስ።